នៅថ្ងៃទី២៧ ខែមករា ឆ្នាំ២០២២ ពិធីបើកកិច្ចប្រជុំ​បូកសរុបលទ្ធផលការងារឆ្នាំ២០២១ និងលើកទិសដៅ​អនុវត្តការងារឆ្នាំ២០២២ របស់អគ្គនាយកដ្ឋានកៅស៊ូ បានប្រារព្ធធ្វើនៅអគ្គនាយកដ្ឋានកៅស៊ូ ដោយបានការអញ្ជើញចូលរួមជាគណៈអធិបតីពីសំណាក់ឯកឧត្តម ម៉ាន សុគ្រី រដ្ឋលេ​ខាធិ​​ការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់​របស់ឯកឧត្តម​រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងមានការអញ្ជើញចូលរួម​ពី​ឯកឧត្តម អ្នកឧកញ៉ា ឧកញ៉ា លោក លោកស្រី អ្នកនាងកញ្ញា ជាថ្នាក់ដឹកនាំអង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ មន្រ្តីរាជការនៃអគ្គ​នាយក​ដ្ឋាន​កៅស៊ូ ​ វិទ្យាស្ថានស្រាវជ្រាវកៅស៊ូកម្ពុជា មន្ទីរកសិកម្ម  រុក្ខាប្រមាញ់ និងនេសាទរាជធានី​ខេត្ត តំណាង​សមាគម​អភិវឌ្ឍន៍កៅស៊ូកម្ពុជា សហគមន៍កសិកម្មកៅស៊ូ​គ្រួសារ​តាមតំបន់ តំណាងក្រុមហ៊ុនចម្ការកៅស៊ូកសិឧស្សាហកម្ម​ ម្ចាស់រោងចក្រ សិប្បកម្មកែច្នៃជ័រនិងឈើកៅស៊ូ តំណាងធនាគា​រ​អភិវឌ្ឍន៍កសិកម្មនិងជនបទ (ARDB) និងមជ្ឃមណ្ឌលសហប្រតិបត្ដិការអន្ដរជាតិស្រាវជ្រាវកសិកម្ម សម្រាប់ការអភិវឌ្ឍ (CIRAD) អង្គការមូលនិធិសកលសម្រាប់ធម្មជាតិ (WWF) អង្គការអុកស្វាម (OX-FAM) វេទិការនៃអង្គការមិនមែនរដ្ឋាភិបាលស្ដីពីកម្ពុជា (NGO Forum on Cambodia) និងអង្គការ សង្គ្រោះសត្វព្រៃ (SCW) សរុបចំនួន ១៧០នាក់ (ស្រី២៨នាក់)។​ ក្នុងគោលបំណង៖ (១) ពិនិត្យ​ឡើង​វិញ​លើ​លទ្ធផល​ការងារ​​របស់អគ្គនាយកដ្ឋានកៅស៊ូដែលបាន​អនុវត្តក្នុងឆ្នាំ២០២១​កន្លងមក ដើម្បីពិភាក្សា​​​រក​ចំណុច​ខ្លាំ​ង ចំណុច​ខ្សោយ និងបញ្ហាប្រឈម (២) ​ប្រមូលធាតុ​ចូលសំខាន់ៗ​និង​កាលានុវត្តភាព​ថ្មីៗ​បន្ថែមទៀតពី​គ្រប់​ភាគីពាក់ព័ន្ធសម្រាប់ពង្រឹងនិងជំរុញការអភិវឌ្ឍអនុវិស័យ​​កៅស៊ូនិង (៣) កំណត់​​​​ទិស​ដៅការងាររបស់អគ្គនាយកដ្ឋានកៅស៊ូ ដែលត្រូវ​អនុវត្តបន្ត​ដោយអនុលោមតាមកម្មវិធីដែលបានអនុម័ត​សម្រេចផ្តល់​ថវិកា សម្ភារៈ និងមធ្យោបាយចាំបាច់​នានា​សម្រាប់​បំពេញ​​​​ការងារនៅក្នុង​ឆ្នាំ​២០២២ ក៏ដូចឆ្នាំខាងមុខ។

ជាកិច្ចចាប់ផ្តើម ឯកឧត្តម ហ៊ឹម អូន ប្រតិភូរាជ​រដ្ឋាភិបាលទទួលបន្ទុក ជាអគ្គនាយក នៃអគ្គនាយកដ្ឋានកៅស៊ូ បានថ្លែងសុន្ទរកថាស្វាគមន៍ដល់គណៈអធិបតីនិងអង្គពិធីនូវស្ថានភាពនៃការអភិវឌ្ឍកៅស៊ូធម្មជាតិនៅទូទាំង​​ប្រទេសក្នុងឆ្នាំ២០២១ មានជាអាទិ៍ដូចជា ផ្ទៃដីផលិត​កម្មនិងការនាំចេញមាន ការកើនឡើងបើធៀបនឹងឆ្នាំ​កន្លងទៅ ដោយ​ទទួលបានទឹកប្រាក់ចំណូលសរុបពីការនាំចេញកៅស៊ូនិងឈើកៅស៊ូមានចំនួន​៦១១,៨លាន​ដុល្លារអាម៉េរិក។ ទឹកប្រាក់នេះ​មានការកើនឡើងប្រមាណជាង១៤២, ៧​លាន​ដុល្លារ​​​អាម៉េរិក ស្មើនឹង៣០,៥%។ រីឯថ្លៃលក់​​កៅស៊ូ​ជាមធ្យម​​គឺ១ ៦៦៦​​​​​ដុល្លារ​អាម៉េរិក​/​​​​តោន ថ្លៃនេះបាន​កើន​​ឡើង​ចំនួន​២៨៤ដុល្លារអាម៉េរិក/តោន ស្មើនឹង២០,៥%​ ធៀប​នឹ​ង​​​​ឆ្នាំ​២០២០ ដែលថ្លៃលក់​មធ្យម​មាន​តែ​១ ៣៨២ដុល្លារអា​ម៉េ​រិក/តោនប៉ុណ្ណោះ។

ចំពោះការងារនៅលើឆាកអន្តរ​ជាតិវិញ អគ្គនាយកដ្ឋានកៅស៊ូបានបំពេញតួនាទីក្នុងឋានៈ​ជា​សមាជិក​ពេញ​សិទ្ធិរបស់​​សមាគមបណ្ដា​ប្រទេស​ផលិត​​​កៅស៊ូធម្មជាតិ (ANRPC) ក្រុមប្រឹក្សាស្រាវ​ជ្រាវនិងអភិវឌ្ឍន៍កៅស៊ូ​អន្តរជាតិ (IRRDB)​ ​សមាគម កៅស៊ូអន្តរជាតិ (IRA) និងជា​ដៃគូ​សហប្រតិបត្តិការ​ទ្វេភាគីឬពហុភាគី​។

ជាកិច្ចបន្ទាប់មក ឯកឧត្តម ម៉ាន សុគ្រី បាន​ថ្លែង​​សុន្ទរកថាបើកកិច្ចប្រជុំបូកសរុបលទ្ធផលការងារ ឆ្នាំ​២០២១ និងលើកទិសដៅអនុវត្តការងារឆ្នាំ២០២២ របស់​​អគ្គនាយកដ្ឋានកៅស៊ូ​​។ ឯកឧត្តម​បានសម្តែងនូវការកោតសរសើរនិងវាយតម្លៃខ្ពស់​ចំពោះកិច្ចខិតខំប្រឹងប្រែងរបស់​ថ្នាក់ដឹកនាំនិង​មន្រ្តី​រាជការ នៃអគ្គនាយកដ្ឋានកៅស៊ូ ដែលបានខិតខំបំពេញភារកិច្ចរបស់ខ្លួន ដើម្បីធ្វើឱ្យអនុវិស័យ​កៅស៊ូមានការវិវត្តន៍ឈានឡើងគួរជាទីមោទនៈ។​ ទន្ទឹមនឹង​នេះ ឯកឧត្តមរដ្ឋលេខាធិការបានជម្រាបជូនអង្គ​ប្រជុំទាំងមូលជ្រាបថា​ កន្លងមកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាតែងតែបានរំឭកអំពីការរីកចម្រើននិងសក្តានុពលនៃ​ឧស្សាហកម្មកៅស៊ូធម្មជាតិនៅកម្ពុជា ដោយដំណាំនេះ ​បានបង្កើនប្រាក់ចំណូល បង្កើតអាជីពនៅជនបទ ជួយ​កាត់បន្ថយភាពក្រីក្រ និងការធ្វើចំណាកស្រុក។ បន្ថែម​ពី​នេះ ឯកឧត្តមរដ្ឋលេខា​ធិការក៏បាន កត់សម្គាល់លើបញ្ហាប្រឈមចម្បងៗមួយចំនួនក្នុងអនុវិស័យ​នេះរួមមាន៖​ លិខិត​បទដ្ឋាន​គតិយុត្ត កិច្ចសហការក្នុងការអនុវត្តការងារ មធ្យោបាយ និងធនធានមនុស្សនៅមាន​កម្រិតនៅឡើយ ដែលបញ្ហាទាំងអស់នេះចាំបាច់ត្រូវខិតខំបន្ថែមទៀតដោយ​មានកិច្ចសហការពីគ្រប់ភាគីពាក់ព័ន្ធ ដើម្បីស្វែងរកដំណោះ​ស្រាយ​​​​ឱ្យបាន​សមស្រប និងទាន់ពេលវេលាក្នុងគោលដៅ​​ជំរុញការអភិវឌ្ឍអនុវិស័យកៅស៊ូ​ឱ្យកាន់តែមានប្រសិទ្ធភា​ព​និងមាននិរន្តរភាព។

អង្គប្រជុំបានជជែកពិភាក្សាគ្នាលម្អិតអំពីបញ្ហានានាដែលពាក់ព័ន្ធនឹងការអភិវឌ្ឍឧស្សាហកម្ម​កៅស៊ូធម្មជាតិ ការធ្វើពាណិជ្ជកម្មកៅស៊ូ និងកិច្ចសហប្រតិបត្តិការជាមួយ​ដៃគូ​អភិវឌ្ឍន៍នានា តាមរយៈសំណួរ មតិយោបល់ សំណូម​ពរ និងបញ្ហាប្រឈមមួយចំនួនដូចខាងក្រោម៖

i.គាំទ្រឲ្យមានច្បាប់និងលិខិតបទដ្ឋានគតិយុត្តពាក់ព័ន្ធនានាមួយចំនួនដើម្បីធានាការគ្រប់គ្រង​ និងការអភិវឌ្ឍ​វិស័យកៅស៊ូឲ្យមាននិរន្តរភាព

ii.ជំរុញការអនុវត្តសារាចរណែនាំលេខ១០.សរណន ចុះថ្ងៃទី២៣ ខែមិថុនា ឆ្នាំ២០០៣  របស់រាជរដ្ឋាភិបាល​​​​​​កម្ពុជាស្តីពីវិធានការទប់ស្កាត់ការនាំចេញជ័រកៅស៊ូនិងឈើកៅស៊ូមិនទាន់កែច្នៃទៅបរទេសឱ្យមានប្រសិទ្ធភាព

iii.​ជំរុញនិងពង្រឹងសកម្មភាពដឹកនាំនិងគ្រប់គ្រងសហគមន៍កសិកម្មកៅស៊ូគ្រួសារតាមតំបន់ និងជួយគាំទ្ររកប្រភពថវិកាដល់ដំណើរការរបស់សហគមន៍ឱ្យមានដំណើរដោយរលូន និងអាចសម្រេចតាម​គោលដៅដែលបានគ្រោងទុក

iv.បន្តការចុះផ្សព្វផ្សាយនិងបណ្តុះបណ្តាលបច្ចេកទេសឱ្យបានច្រើនថែមទៀតដល់កសិករក្នុងការដាំដុះ​​ ការយកផល និងការបង្កើនគុណភាព​ផលិតផលជ័រកៅស៊ូ

v.ពង្រឹងនិងស្វែងរកកិច្ចសហការនិងការចូលរួមពីដៃគូអភិវឌ្ឍនានា​ ​និងអង្គការមិនមែនរដ្ឋាភិបាល​ដើម្បីអភិវឌ្ឍវិស័យកៅស៊ូ​​និងដោះស្រាយបញ្ហានានា

vi.សូមទីភ្នាក់ងារបារាំងសម្រាប់ការអភិវឌ្ឍ (AFD) បន្តជួយគាំទ្រការអភិវឌ្ឍវិស័យកៅស៊ូនៅកម្ពុជា​​​តាមរយៈការផ្តល់ប្រាក់កម្ចីសម្បទានសម្រាប់ គាំទ្រដល់កសិករ​​​កៅស៊ូគ្រួសារ

vii.សូមធនាគារអភិវឌ្ឍន៍ជនបទនិងកសិកម្ម (ARDB) ជួយគាំទ្រដល់សហគមន៍កសិកម្មកៅស៊ូគ្រួសារតាមរយៈការអនុគ្រោះនូវលក្ខខណ្ឌមួយចំនួន គឺការផ្តល់ប្រាក់​កម្ចីដែលមានអត្រាការប្រាក់ទាប និងមានរយៈពេលវែងដើម្បីពង្រឹងសមត្ថភាពសហគមន៍កសិកម្មកៅស៊ូគ្រួសារឱ្យក្លាយទៅជាសហគ្រិនពេញលេញ។

ចំពោះបញ្ហាប្រឈមនិងសំណូមពរដែលបានលើកទ្បើងខាងលើ ឯកឧត្តម ហ៊ឹម អូន បានឆ្លើយតបនិង​ទទួលយកទៅតាមចំណុចនីមួយៗ ដើម្បីជម្រាបជូ​ន​ក្រសួង​កសិកម្ម រុក្ខាប្រមាញ់ និងនេសាទ ដើម្បីកំណត់ជាវិធានការសម្រាប់ដោះស្រាយនាពេលខាងមុខ៕​