នៅថ្ងៃទី០៧ ខែតុលា ឆ្នាំ២០២០ វេលា ម៉ោង០៧:៤៥នាទីព្រឹក នៅសាលប្រជុំផ្ទះសំណាក់ សុខសាន្ត មានបើកការធ្វើមហាសន្និបាតកំណើត ដំបូងរបស់​សហគមន៍​កសិកម្ម​កៅស៊ូគ្រួសារនៅ ស្រុកអូរយ៉ាដាវ ខេត្តរតនគិរី  ដោយមានការចូលរួម ក្រោមអធិបតីភាព លោក ហ៊ឹម អូន អគ្គនាយករង នៃអគ្គនាយកដ្ឋានកៅស៊ូ និងមានការចូលរួមពី លោក ស្រេង ជាហេង អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តរតនគិរី លោក រចំ ហ្វា អភិបាលរង នៃគណៈអភិបាលស្រុកអូរយ៉ាដាវ និងមានកសិករកៅស៊ូគ្រួសារ​ចូលរួម​សរុប​ចំនួន​​​៤៥នាក់។

          ជាកិច្ចចាប់ផ្តើមលោក​ ស្រេង ជាហេង បានថ្លែង សុន្ទរកថាស្វាគមន៍និងសម្តែងនូវក្តីរីក រាយដែល ក្រុមការងារនៃអគ្គនាយកដ្ឋានកៅស៊ូ បានមកធ្វើការចងក្រងសហគមន៍កសិកម្មកៅស៊ូគ្រួសារនៅក្នុងស្រុកអូរយ៉ាដាវនេះ។ លោកក៍បាន ជម្រាបជូនពីស្ថានភាពទូទៅ ពិសេសស្ថានភាព អនុវិស័យកៅស៊ូនៅក្នុងស្រុក ជូនដល់អង្គសន្និបាត ឱ្យបានជ្រាបផងដែរ។

         បន្ទាប់មក លោក រចំ ហ្វា បានថ្លែង អំណរគុណដល់ក្រុមការងារអគ្គនាយកដ្ឋានកៅស៊ូដែលបានយកចិត្តទុកដាក់ជួយជ្រោមជ្រែង និង​សហការ​ជាមួយមន្រ្តីជំនាញរបស់មន្ទីរកសិកម្ម រុក្ខាប្រមាញ់ និងនេសាទ ខេត្តរតនគិរី ក្នុងការចង ក្រង​សហគមន៍កសិកម្មកៅស៊ូគ្រួសារនេះឡើង។ លោកបានបន្ថែមទៀតថា ការបង្កើតសហគមន៍ កសិកម្មកៅស៊ូគ្រួសារនេះ នឹង​ជួយ​​ដល់​កសិករដាំ ដុះដំណាំកៅស៊ូក្នុងការរកស៊ីរួមគ្នាជាក្រុម ងាយ ស្រួលក្នុងការទិញ-លក់ផលិតផលរបស់កសិករ និងជួយពង្រឹង​​សមត្ថភាពកសិករកៅស៊ូគ្រួសារផង​ដែរ​។​ ជាចុងក្រោយលោកបាន សំណូមពរដល់​កសិករកៅស៊ូគ្រួសារ​ដែល​ចូលរួម​ទាំងអស់ គួរតែ ចូលរួមក្នុងសហគមន៍កសិកម្មកៅស៊ូគ្រួសារ ឱ្យ បានគ្រប់គ្នា ដើម្បីទទួលបានអត្ថប្រយោជន៍​ពី​សហ​គម​ន៍​​​កសិកម្មនេះ ក៏ដូចជាលើកស្ទួយអនុវិស័យ កៅស៊ូឱ្យរីកចម្រើនផងដែរ។

          ជាកិច្ចបន្ទាប់ លោក ហ៊ឹម អូន បានមានមតិបើកមហាសន្និបាតកំណើតដំបូងសហគមន៍កសិកម្ម​កៅស៊ូគ្រួសារស្រុក​អង្គរជុំ ដោយ លោក បានលើកឡើងពីគោល​បំណង​ចំបង នៃការ បង្កើតសហគមន៍កសិកម្មកៅស៊ូគ្រួសារនេះគឺដើម្បី៖ ១)លើក​​​កម្ពស់​​ស្ថានភាពសេដ្ឋកិច្ច សង្គម និង វប្បធម៌ របស់កសិករជាសមាជិកសហគមន៍ និង២) ចូលរួមអភិវឌ្ឍន៍សេដ្ឋ​កិច្ច​ជនបទ និងសេដ្ឋកិច្ច សហគមន៍ជនបទ និងសេដ្ឋកិច្ចជាតិផងដែរ។ លោក ក៏បានបញ្ជាក់បន្ថែមទៀតថា ការ​បង្កើត​សហគមន៍​កសិកម្ម​​​កៅស៊ូ​គ្រួសារ​នេះ កសិករយើង​នឹងទទួលបាន​នូវអត្ថ​ប្រយោ​ជន៍​​ជាច្រើនដូចជា៖

• ទទួលបានទីផ្សារ និងពង្រីកឱកាសទីផ្សារ កសិផលរបស់កសិករ និងលើកកម្ពស់អំណាច​​​ចរចា​ថ្លៃ​ផលិត​​ផលលើទីផ្សារដែលកាត់បន្ថយ ការកេងប្រវ័ញ្ចរបស់ឈ្មួញកណ្តាល ​តាម​រយៈ ការទិញ-លក់ ធាតុចូល​កសិកម្ម និង​កសិ​ផល​រួម​គ្នា
• លើកកម្ពស់គុណភាពកសិផលឬផលិតផល និងកាត់បន្ថយថ្លៃដើមផលិត​កម្មកសិកម្ម​របស់សមាជិក ​សហគមន៍ តាមរយៈការ​ទិញ​សម្ភារ​ឬឧបករណ៍​កសិកម្មនៅ​មូលដ្ឋាន​​របស់​គេ​ព្រមទាំង​ធានា​គុណ​ភាព​ល្អ
• ផលិតកសិផល ឬផ្តល់សេវាកម្មណាដែល កសិករម្នាក់ៗមិនអាចធ្វើបាន 
• ផ្តល់សេវាឥណទានដល់សមាជិកក្នុងអត្រាការប្រាក់ទាបជាងឯកជន
• បង្កើនប្រាក់ចំណូល​គ្រួសាររបស់​សមាជិក​សហគមន៍ តាមរយៈការ​ទទួលបាន​ប្រាក់​ចំណេញ​ពី​មុខ​របរ​ជំនួញទៅតាមសមាមាត្រ ភាគហ៊ុនដែលបានជាវ
• បង្កើនចំណេះដឹង និងសមត្ថភាព លើផ្នែក បច្ចេកទេសកសិកម្ម ការធ្វើជំនួញ និងការ​គ្រប់​គ្រងតាមបែប​ប្រជាធិបតេយ្យ
• មានការទទួលស្គាល់ និងទទួលបានការគាំទ្រ លើកទឹកចិត្តពីរដ្ឋាភិបាល និង​ស្ថាប័ន​ពាក់ព័ន្ធនានា

          ជាចុងក្រោយ លោក ហ៊ឹម អូន ក៏បានអរគុណដល់មន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទ ខេត្តរតនគិរី ដែលបាន សហការយ៉ាងជិតស្និទ្ធជាមួយមន្ត្រីជំនាញរបស់អគ្គនាយកដ្ឋានកៅស៊ូ ក្នុង​ការរៀបចំចងក្រង សហគម ន៍នេះឡើង និងបានផ្តាំផ្ញើដល់ក្រុមប្រឹក្សាភិបាល សហគមន៍ គណៈកម្មាធិការត្រួតពិនិត្យ និង​សមាជិកទាំងអស់ ត្រូវសហការគ្នាឱ្យបានល្អ ទុក ចិត្តគ្នាទៅវិញទៅមក មានតម្លាភាព និងគណ នេយ្យភាព ដើម្បី​បម្រើ​ផល​ប្រយោជន៍សហគមន៍ ឱ្យមានភាពរីកចម្រើន ជាពិសេសត្រូវពង្រឹងជំនាញ ក្នុងការដឹកនាំ និង​គ្រប់គ្រង​សហគមន៍​របស់ខ្លួនឱ្យ មានដំណើរការទៅរលូនល្អនិងជោគជ័យ។

ជាលទ្ធផល៖

• មហាសន្និបាតបានធ្វើការបោះឆ្នោតជ្រើស តាំងក្រុមប្រឹក្សាភិបាលចំនួន០៨រូប និងជ្រើស​តាំងគណៈកម្មាធិការត្រួតពិនិត្យចំនួន០៤រូប។
• ឈ្មោះសហគមន៍កសិកម្មនិងអាសយដ្ឋាន

  1. អនុម័តឈ្មោះសហគមន៍គឺ សហគមន៍កសិកម្ម កៅស៊ូគ្រួសារអូរយ៉ាដាវឦសាន​“ស.ក.ក.គ.អ.ឥ” ឈ្មោះ​ជា​ភាសាអង់គ្លេស ៖ Ou Ya Dav Eysan Rubber Smallholding Agricultural​ Cooperative " O.E.R.S.A.C "

  2. អាសយដ្ឋានសហគមន៍ ៖ ភូមិអុន  ឃុំលំជ័រ  ស្រុកអូរយ៉ាដាវ ខេត្តរតនគិរី ។

  3. អនុម័តប្រតិបត្តិការមុខរបររបស់សហគមន៍មាន ដូចជា ៖

     ក.ផលិតកម្មកសិកម្ម

-ផលិតកម្មកសិកម្ម៖ ផលិតកូនកៅស៊ូ និងច្បារពូជ កៅស៊ូ

-ផលិតកម្មស្វាយចន្ទី​ ​ស្វាយ ប័រ ដំឡូងមី ម្រេច

ខ-កសិឧស្សាហកម្ម

-កែច្នៃជ័រកៅស៊ូសន្លឹក(RSS) និងកៅស៊ូដុំ (TSR) សម្រាប់ទីផ្សារ

-កែច្នៃគ្រាប់ស្វាយចន្ទី  

គ-កសិពាណិជ្ជកម្ម

-ទិញ លក់ទឹកជ័រ ជ័រកក ជ័រកៅស៊ូ សន្លឹក(RSS) និងកៅស៊ូដុំ(TSR)

-ទិញ លក់ ផលិតផលកសិកម្ម

-លក់ប្រេងឥន្ទនៈ

-ផ្គត់ផ្គង់ធាតុចូលកសិកម្ម (ឧបករណ៍ កសិកម្ម សម្ភារកសិកម្ម ជីកសិកម្ម ថ្នាំគីមីកសិកម្ម)

ឃ-សេវាកម្មពាក់ព័ន្ធផលិតកម្មកសិកម្ម

-ឥណទានសាច់ប្រាក់និងប្រាក់សន្សំ

-ប្រាក់បញ្ញើធនាគារ

-សេវាកម្មដឹកជញ្ជូន ភ្ជួររាស់

       4.  អនុម័តប្រាក់សមាជិកភាពត្រូវបង់ប្រចាំឆ្នាំចំនួន ១០.០០០រៀល/នាក់/ឆ្នាំ

      5.   អនុម័តតម្លៃភាគហ៊ុនស្មើនឹង៥០.០០០ រៀល/ ហ៊ុន។

​​​​សន្និដ្ឋាននិងសំណូមពរ៖

          តាមរយៈការចងក្រងសហគមន៍កសិកម្មកៅស៊ូគ្រួសារស្រុកអូរយ៉ាដាវ ខេត្តរតនគិរី បាន​បង្ហាញ​ឱ្យ​ឃើញ​ថា កសិករកៅស៊ូគ្រួសារមានការ ចាប់អារម្មណ៍ ក្នុងការបង្កើតសហគមន៍កសិកម្ម កៅស៊ូគ្រួសារ និង​ចូល​រួម​ពិភាក្សាយ៉ាង​ផុស​ផុល ជាមួយមន្រ្តីជំនាញរបស់អគ្គនាយកដ្ឋានកៅស៊ូ និងមន្ទីរកសិកម្ម រុក្ខាប្រមាញ់ និងនេសាទ ខេត្ត រតនគិរី ព្រមទាំងសំណូមពរដល់អគ្គនាយកដ្ឋាន កៅស៊ូ ជួយសម្របសម្រួលផ្តល់ជាគំនិតយោបល់ និង​ជួយ​រៀបចំឯកសារ ពាក់ព័ន្ធនានាបន្តទៀត ដើម្បីអាចឱ្យសហគមន៍ដែលទើបបង្កើតថ្មីនេះចុះ បញ្ជីនៅមន្ទីរកសិកម្ម រុក្ខាប្រមាញ់ និងនេសាទ ខេត្ត រតនគិរី បានដោយជោគជ័យ និងបន្តជួយពង្រឹង​សមត្ថភាព​សហគមន៍​នៅឆ្នាំ​ក្រោយ​បន្ថែមទៀត។