១.ទិដ្ឋភាពទូទៅនៃទីផ្សារកៅស៊ូធម្មជាតិក្នុងពាក់កណ្តាលចុងខែតុលា ឆ្នាំ២០២១

ការពិនិត្យឡើងវិញដោយសង្ខេបអំពីដំណើរវិវត្ត​នៃថ្លៃកៅស៊ូធម្មជាតិនៅពាក់កណ្តាលចុងខែតុលា ឆ្នាំ២០២១ ដោយយោងទៅលើថ្លៃនៅក្នុងបណ្តាទីផ្សារសំខាន់ៗទាំងទីផ្សារទិញលក់ភ្លាមៗនិងទីផ្សារទិញលក់តាមកិច្ចសន្យាក្នុងតំបន់អាស៊ី។ ចំណែក តារាងទី១នឹងបង្ហាញអំពីនិន្នាការថ្លៃកៅស៊ូប្រចាំថ្ងៃឲ្យកាន់តែច្បាស់បន្ថែមទៀត។

តារាងទី១៖ តម្លៃកៅស៊ូធម្មជាតិក្នុងពាក់កណ្តាលចុងខែតុលា ឆ្នាំ២០២១ នៅក្នុងទីផ្សារទិញលក់ភ្លាមៗនិងទីផ្សារទិញលក់តាមកិច្ចសន្យានៅតំបន់អាស៊ី

២.ទស្សនវិស័យ

1. ទោះបីជាមានការដកចេញវិញស្ទើរតែទាំងអស់នូវរបាំងរឹតបន្តឹងដែលបានដាក់ទាក់ទងនឹងជំងឺកូវីដ​១៩ នៅក្នុងប្រទេសផលិតកៅស៊ូធំៗនិងទោះបីជាមានការស្ទុះ​ងើបឡើងវិញគួរឱ្យកត់សម្គាល់នៃ​ថ្លៃកៅស៊ូ​ធម្មជាតិក៏ដោយ ក៏ផលិតកម្មកៅស៊ូធម្មជាតិរបស់ពិភពលោកត្រូវបានរំពឹងថានឹងនៅតែមិនមានការប្រែប្រួល​​នៅក្នុងខែ​វិច្ឆិកា និងខែធ្នូ ឆ្នាំ២០២១នេះឡើយ បើប្រៀបធៀបទៅនឹងពីរខែកន្លងមក (គឺ ខែកញ្ញានិងខែ​តុលា ឆ្នាំ២០២១)។ តារាងទី២នឹងបង្ហាញអំពីនិន្នាការប្រចាំខែក្នុងផលិត​កម្មកៅស៊ូធម្មជាតិ​នៅក្នុង​ប្រទេស​​ថៃ ឥណ្ឌា ឥណ្ឌូនេស៊ី វៀតណាម ចិន និងប្រទេសម៉ាឡេស៊ី ចាប់ពីខែកញ្ញារហូតដល់ខែធ្នូ ឆ្នាំ២០២១។ គួរបញ្ជាក់ផងដែរថា ប្រទេសទាំងប្រាំមួយនេះតំណាងឱ្យចំណែក ៨១% នៃការផ្គត់ផ្គង់កៅស៊ូធម្មជាតិនៅទូទាំង​​ពិភពលោក។

តារាងទី ២៖ និន្នាការប្រចាំខែក្នុងផលិតកម្មកៅស៊ូចាប់ពីខែកញ្ញា ដល់ខែធ្នូ ឆ្នាំ២០២១ ('000តោន)

2.ការ​នាំ​ចូល​កៅស៊ូ​ធម្មជាតិ​ទៅក្នុង​ប្រទេស​ចិន​ត្រូវ​បាន​​រំពឹង​ថា​ នឹង​កើន​ឡើង​បន្តិច​បន្តួចប៉ុណ្ណោះនៅ​ក្នុង​ខែ​វិច្ឆិកានិង​កើនខ្ពស់​ជាង​នេះ​ក្នុង ​ខែ​ធ្នូ ឆ្នាំ​២០២១។ ទោះបីជាមានឧបសគ្គខ្លះកើតឡើងដូចជាកង្វះខាតប្រេងឥន្ធនៈ ថ្លៃធ្យូងថ្ម ថ្លៃប្រេងឥន្ធនៈឡើងខ្ពស់ និងការរអាក់រអួលក្នុងការផ្គត់ផ្គង់អគ្គិសនីក៏ដោយ ក៏យើងរំពឹងថា ប្រទេសចិននឹងប្រើប្រាស់កៅស៊ូច្រើនជាង ៥០០ ០០០តោន ក្នុងអំឡុងខែវិច្ឆិកានិងខែធ្នូ ឆ្នាំ ២០២១នេះ (តារាងទី៣)។ ម៉្យាងវិញទៀត ឧបសគ្គដែលបណ្តាលមកពីការផ្គត់ផ្គង់អគ្គិសនីត្រូវបានរំពឹងថា នឹងអាចបានធូរស្រាលឡើងវិញនៅក្នុងខែវិច្ឆិកានិងខែធ្នូ ឆ្នាំ២០២១។

តារាងទី ៣៖ការនាំចូលនិងការប្រើប្រាស់កៅស៊ូធម្មជាតិនៅក្នុងប្រទេសចិន ('000 តោន)

3. តម្រូវការប្រើប្រាស់កៅស៊ូធម្មជាតិនៅក្នុងសហភាពអឺរ៉ុប សហរដ្ឋអាមេរិក ឥណ្ឌា និងនៅប្រទេសជប៉ុនត្រូវបានរំពឹងថានឹងទទួលបានការកើនឡើងក្នុងរយៈពេលខ្លី ព្រោះយើងមើលឃើញពីសន្ទុះកើនឡើងដែលបណ្តាលមកពីការលុបចោលបន្ថែមទៀតនូវរបាំងរឹតបន្តឹងទាក់ទងនឹងជំងឺកូវីដ១៩ ការបើកដំណើរការឡើងវិញនៃប្រព័ន្ ធដឹកជញ្ជូន និងសកម្មភាពសេដ្ឋកិច្ចផ្សេងទៀត។ គេគួរតែទាញការចាប់អារម្មណ៍នៅក្នុងការកត់សម្គាល់មួយថា ការប្រើប្រាស់កៅស៊ូធម្មជាតិនៅលើពិភពលោកបានបង្ហាញពីកំណើនមិនធម្មតាក្នុងរយៈពេលប៉ុន្មានឆ្នាំថ្មីៗនេះ បន្ទាប់ពីគ្រោះមហន្តរាយជាប្រវត្តិសាស្ត្រក្នុងពិភពលោកមានដូចជា ក្រោយសង្គ្រាមលោក (លើកទី១និងទី២)  ក្រោយជំងឺគ្រុនផ្តាសាយអេស្ប៉ាញ (១៩១៨-១៩២០) និងក្រោយវិបត្តិសេដ្ឋកិច្ចដ៏ធំដែលគេប្រសិទ្ធនាមឱ្យថា «Great Depression» (១៩២៩-១៩៣៩)។ យើងនៅចាំបានថា ការប្រើប្រាស់កៅស៊ូធម្មជាតិពិភពលោកបានកើនឡើងចំនួន ៣៣% នៅក្នុងឆ្នាំ១៩១៩ (ភ្លាមៗ បន្ទាប់ពីសង្គ្រាមលោកលើកទី១) ក្រោយមកបានហក់ឡើង ៤៥% នៅឆ្នាំ១៩២២ (បន្ទាប់ពីជំងឺគ្រុនផ្តាសាយអេស្ប៉ាញ) ហើយ​​នៅឆ្នាំ១៩៣៣ វាបានកើនឡើង ១៩% (បន្ទាប់ពីវិបត្តិសេដ្ឋកិច្ចធំ Great Depression) និងចុងក្រោយបានកើនឡើង ១២១% ក្នុងឆ្នាំ១៩៤៦(ភ្លាមៗបន្ទាប់ពីសង្គ្រាមលោកលើកទី២)។ ទោះបីកំណើនមិនធម្មតាដ៏ធំសម្បើមបែបនេះមិនត្រូវបានរំពឹងទុកនៅក្នុងសេណារីយ៉ូបច្ចុប្បន្ននេះក៏ដោយ តែការជំរុញកំណើនកម្រិតមធ្យមក្នុងរយៈពេលខ្លីអាចមានសង្ឃឹមនៅពេលសេដ្ឋកិច្ចវិលត្រឡប់ទៅរកភាពប្រក្រតីឡើងវិញបន្ទាប់ពីការបិទរួមនិងការរឹតបន្តឹងអស់រយៈពេលជិតពីរឆ្នាំកន្លងមកនេះ។ បន្ទាប់ពីបានធ្លាក់ចុះអស់ ៦,៩% កាលឆ្នាំ២០១៩ តម្រូវការប្រើប្រាស់កៅស៊ូធម្មជាតិពិភពលោកត្រូវបានរំពឹងថា នឹងកើនឡើងវិញចំនួន ៨,៣% ទៅដល់បរិមាណ ១៤លានតោននៅក្នុងឆ្នាំ២០២១។ ជាមួយនឹងការផ្គត់ផ្គង់កៅស៊ូពិភពលោកក្នុងឆ្នាំដដែលនេះរំពឹងថា នឹងមានចំនួន ១៣,៨ លានតោនប៉ុណ្ណោះ ដូច្នេះនៅឆ្នាំ២០២១ ជាភាស្តុតាងបញ្ជាក់ថាពិភពលោកនឹងជួបប្រទះការខ្វះខាតកៅស៊ូជាសាកលប្រមាណ ២០០ ០០០តោន។ ថ្វីត្បិតតែកង្វះ ខាតនេះមិនទាន់ទាក់ទងសំខាន់ទៅនឹងតម្រូវការសាកលក៏ដោយ តែយើងអាចឆ្លុះបញ្ចាំងមើលឃើញការវិវត្តនៅក្នុង ទីផ្សារជាក់ស្តែងក្នុងរយៈពេលពីរខែចុងក្រោយនៃឆ្នាំនេះ។

4. សេដ្ឋកិច្ចកៅស៊ូធម្មជាតិក្នុងរយៈពេលប្រាំឆ្នាំចុងក្រោយនេះ (ចាប់ពីឆ្នាំ២០១៦រហូតមក) បានស្ថិតនៅក្រោមការកាន់ក្តាប់នៃសមត្ថភាពផលិតជ័រកៅស៊ូច្រើនលើស ដែលបណ្តាលមកពីការពង្រីកផ្ទៃដីចៀរជ័រ ច្រើនខុសធម្មតា។ ទោះបីជា ផ្ទៃដីចៀរជ័រកៅស៊ូនៅទូទាំងពិភពលោកនឹងត្រូវពង្រីកថែមទៀតប្រមាណជិត ២៥០ ០០០ហិកតា ក្នុងឆ្នាំ២០២២ក៏ដោយ ក៏កំណើននៃផលិតកម្មកៅស៊ូនេះទំនងជា​ត្រូវបានស្រូបយក​ដោយតម្រូវការប្រើប្រាស់សាកលដ៏រឹងមាំផងដែរ។ បន្ទាប់ពីបានកើនឡើងចំនួន ៨,៣% នៅក្នុងឆ្នាំ២០២១រួចមក ការប្រើប្រាស់កៅស៊ូពិភពលោកត្រូវបានរំពឹងថា នឹងកើនឡើងក្នុងអត្រាចន្លោះពី ៤%-៥% ក្នុងឆ្នាំ​២០២២ខាងមុខ។ យើងអាចសន្និដ្ឋានបែបនេះ ដោយផ្អែកលើទស្សនវិស័យសេដ្ឋកិច្ចពិភពលោកដែល​ចេញផ្សាយដោយស្ថាប័ន IMF ក្នុងខែតុលា ឆ្នាំ២០២១ មានន័យថាកៅស៊ូធម្មជាតិនឹងមិនមានបរិមាណ​ជន់​​លើស​ក្នុងកំឡុងឆ្នាំ២០២២នេះទេ។ ដោយហេតុថាការប្រើប្រាស់កៅស៊ូពិភពលោកក៏កើនឡើងនៅ​ឆ្នាំ២០២២ យ៉ាងហោចណាស់ក៏ ៤% ដែលជាក់ស្តែងវានឹងអាចសម្រេចបាន។ លើសពីនេះទៅទៀតចាប់​​ពីឆ្នាំ២០២៣តទៅ យើងប្រមើរទុកថានៅទូទាំងពិភពលោកនឹងជួបប្រទះកង្វះការផ្គត់ផ្គង់កៅស៊ូធម្មជាតិ ហើយឱនភាពបែបនេះនឹងកើនឡើងជាលំដាប់នៅក្នុងបណ្តាឆ្នាំបន្តបន្ទាប់រហូតដល់ឆ្នាំ២០២៨។ ដំណាក់កាលដ៏វែងនៃឱនភាពផ្គត់ផ្គង់កៅស៊ូអាចនឹងត្រូវពង្រីកបន្ថែមទៀតរហូតដល់ឆ្នាំ ២០៣១ នេះបើយោងតាម ការព្យាករណ៍ដែលបានធ្វើឡើងដោយផ្អែកលើនិន្នាការនៃការដាំដុះកៅស៊ូ និងការពង្រីកសក្តានុពលនៃផ្ទៃដី ចៀរជ័រនៅក្នុងប្រទេសនីមួយៗ (តារាងទី 4) ។

តារាងទី ៤៖ ការព្យាករណ៍អំពីការផ្គត់ផ្គង់និងតម្រូវការកៅស៊ូធម្មជាតិ ពិភពលោកឆ្នាំ២០២២-២០២៨ ('000 តោន)

5. ថ្លៃប្រេងឆៅត្រូវរំពឹងថា នឹងកើនឡើងបន្ថែមទៀតនៅក្នុងខែវិច្ឆិកានិងខែធ្នូ ឆ្នាំ២០២១នេះ ដោយហេតុថាតម្រូវការប្រេងក្នុងរដូវរងាកើនខ្ពស់ និងម៉្យាងតម្រូវការប្រេងក៏នឹងកើនឡើងផងដែរពីការរស់ឡើងវិញនៃសកម្មភាពសេដ្ឋកិច្ច ការធ្វើឱ្យមានប្រក្រតីភាពឡើងវិញនៃវិស័យដឹកជញ្ជូន ក្នុងនោះរួមទាំងឧស្សាហកម្មអាកាសចរណ៍ផងដែរ។ ដូចនេះ កៅស៊ូធម្មជាតិអាចទទួលបានផលវិជ្ជមានពីការ កើនឡើងបន្ថែមទៀតនៃថ្លៃប្រេងឆៅដែលបានរំពឹងទុក។ នៅក្នុងកិច្ចប្រជុំបន្ទាប់របស់ខ្លួននៅថ្ងៃទី៤ ខែវិច្ឆិកា ឆ្នាំ២០២១ យើងបានគេរំពឹងថាសម្ព័ន្ធភាព OPEC+ នឹងធ្វើការពិនិត្យឡើងវិញចំពោះទិន្នផលប្រេងឆៅជាសាកលនិងធ្វើសេចក្តីសម្រេចអំពីផែនការរបស់ខ្លួនសម្រាប់បង្កើនផលិតកម្មប្រេងប្រចាំខែ។

6. កិច្ចប្រជុំរបស់គណៈកម្មាធិការទីផ្សារបើកចំហរសហព័ន្ធ (FOMC) នៃធនាគារកណ្តាលអាមេរិកដែលនឹងត្រូវបញ្ចប់នៅថ្ងៃទី៣ ខែវិច្ឆិកា បានគេរំពឹងយ៉ាងទូលំទូលាយថា ពួកគេនឹងធ្វើការប្រកាសកាលបរិច្ឆេទសម្រាប់ការវិលត្រឡប់មកវិញនូវកម្មវិធីទិញមូលបត្របំណុលប្រចាំខែចំនួន ១២០លានដុល្លារសហរដ្ឋអាមេរិក ហើយពួកគេនិងប្រកាសបញ្ចប់ទាំងស្រុងនូវគោលនយោបាយគាំពារសម័យកាលជំងឺកូវីដ១៩ រាតត្បាតនៅពាក់កណ្តាលឆ្នាំ២០២២ ពោលគឺលឿនជាងធនាគារកណ្តាលនៅអឺរ៉ុបនិងនៅប្រទេសជប៉ុន។ គេក៏បានរំពឹងផងដែរថា កិច្ចប្រជុំនេះនឹងធ្វើឱ្យថ្លៃប្រាក់ដុល្លារសហរដ្ឋអាមេរិករឹងមាំ។ ភាពខ្លាំងរបស់ប្រាក់ដុល្លារធៀបនឹងរូបិយប័ណ្ណគូប្រជែងរបស់ខ្លួនចំនួនប្រាំផ្សេងទៀត បានឈានដល់កម្រិតខ្ពស់បំផុតក្នុងឆ្នាំនេះដូចនៅថ្ងៃទី៣ ខែវិច្ឆិកា ឆ្នាំ២០២១។ ប្រាក់ដុល្លារទំនងជានៅធ្វើដំណើរលើភាពរឹងមាំបន្តទៅមុខទៀត។ ក្នុងពេលប្រាក់ដុល្លារឡើងថ្លៃបែបនេះ ជាធម្មតាវាធ្វើឱ្យពួកពាណិជ្ជករកមិនចង់ធ្វើការជួញដូរទំនិញ។

7. សរុបសេចក្តីមកថ្លៃកៅស៊ូធម្មជាតិក្នុងរយៈពេលខ្លីនេះទំនងជានៅបន្តទទួលបានផលល្អពីស្ថានភាពនៃតម្រូវការការផ្គត់ផ្គង់អំណោយ ផលនិងម៉្យាងពីថ្លៃប្រេងឆៅខ្ពស់ផងដែរ។ តម្រូវការប្រើប្រាស់កៅស៊ូកើនឡើងដែលបណ្តាលមកពីការរស់ឡើងវិញនៃសកម្មភាពសេដ្ឋ- កិច្ចពិភពលោក ដូច្នេះការកើនឡើងនៃតម្រូវការបូករួមនឹងការរំពឹងទុកនៃឱនភាពកៅស៊ូចំនួន ២០០ ០០០តោនក្នុងឆ្នាំនេះផង អាច ជួយឱ្យថ្លៃកៅស៊ូធម្មជាតិកើនឡើងបន្ថែមទៀតក្នុងរយៈពេលពីរខែចុងក្រោយនៃឆ្នាំនេះ។

8. ខណៈពេលដែលក្តីរំពឹងថា នឹងមានតុល្យភាពនៃតម្រូវការការផ្គត់ផ្គង់នៅឆ្នាំ២០២២ សេដ្ឋកិច្ចកៅស៊ូធម្មជាតិត្រូវបានព្យាករណ៍ថា នឹងចូលទៅដល់សម័យកាលឱនភាពរយៈពេលវែងនៅឆ្នាំ២០២៣ ដែលពេលនោះតម្រូវការប្រើប្រាស់នឹងកើនឡើងយ៉ាងហោចណាស់ក្នុងអត្រាតិចបំផុតក៏ ៣%ដែរ។ បើនិយាយឱ្យកាន់តែច្បាស់សេដ្ឋកិច្ចកៅស៊ូធម្មជាតិពិភពលោកស្ទើរតែចេញរួចពីស្ថានភាពមួយដែលសមត្ថភាពផលិតច្រើនលើស និងការផ្គត់ផ្គង់លើសតម្រូវការដែលបានអូសបន្លាយរយៈពេលវែងណាស់មកហើយ។ សេដ្ឋកិច្ចកៅស៊ូធម្មជាតិនឹងស្ថិតនៅលើកម្រិតឱនភាពក្នុងរយៈពេលវែងដែលត្រូវអូសបន្លាយរហូតដល់ឆ្នាំ២០៣១ ហើយក្នុងរយៈពេលនេះ ការផ្គត់ផ្គង់និងតម្រូវការប្រើប្រាស់កៅស៊ូ នឹងមានចារិកលក្ខណៈស្ថិតនៅឃ្លាតឆ្ងាយពីគ្នាឆ្ងាយទៅៗ។

ក្រាហ្វិកទី១៖ ថ្លៃកៅស៊ូទិញលក់ភ្លាមៗប្រភេទ STR-20 នៅទីផ្សារបាងកកនិងថ្លៃកៅស៊ូ ទិញលក់ភ្លាមៗប្រភេទ SMR-20 នៅទីផ្សារគួរឡាឡាំពួរ (US$/100Kg)

ក្រាហ្វិកទី២៖ ថ្លៃកៅស៊ូទិញលក់ភ្លាមៗប្រភេទ RSS-3 នៅទីផ្សារបាងកកនិងថ្លៃកៅស៊ូទិញលក់ភ្លាមៗប្រភេទ RSS-4 នៅទីផ្សារកូតូយ៉ាម (US$/100Kg)

ក្រាហ្វិកទី៣៖ ថ្លៃទឹកជ័រខាប់ទិញលក់ភ្លាមៗនៅទីផ្សារគួឡាឡាំពួរ (US$/100Kg)

ក្រាហ្វិកទី៤៖ ថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនសៀងហៃប្រចាំថ្ងៃ សម្រាប់ខែមករា ឆ្នាំ២០២២ (យ័ន/តោន)

ក្រាហ្វិកទី៥៖ ថ្លៃកៅស៊ូទិញលក់តាមកិច្ចសន្យាប្រភេទ TSR-20 នៅទីផ្សារ​ហ៊ុន​ប្រទេស​សឹង្ហបុរីសម្រាប់ខែមករា ឆ្នាំ២០២២ (ដុល្លារសឹង្ហបុរី/១០០គ.ក្រ)

ហ្វិកទី៦៖ ថ្លៃកៅស៊ូទិញលក់តាមកិច្ចសន្យាប្រភេទ RSS-3 នៅទីផ្សារ​ហ៊ុន​​អូសាកាសម្រាប់ខែមីនា ឆ្នាំ២០២២ (ដុល្លារយេន/គ.ក្រ)