លទ្ធផលស្ដីពីការចុះពិនិត្យនិងវាយតម្លៃកម្មវិធីវិនិយោគសម្បទានដីសេដ្ឋកិច្ចលើដំណាំកៅស៊ូនៅខេត្តក្រចេះ និងខេត្តត្បូងឃ្មុំ
ចាប់ពីថ្ងៃទី៥-៧ ខែកញ្ញា ឆ្នាំ២០២២ ក្រុមការងារនៃអគ្គនាយកដ្ឋានកៅស៊ូបានចុះពិនិត្យនិងវាយតម្លៃកម្មវិធីវិនិយោគសម្បទានដីសេដ្ឋកិច្ចលើដំណាំកៅស៊ូនៅខេត្តក្រចេះនិងខេត្តត្បូងឃ្មុំ ដែលដឹកនាំដោយ លោក ឃុន កក្កដា អគ្គនាយករង នៃអគ្គនាយកដ្ឋានកៅស៊ូ។ បេសកកម្មនេះ មានគោលបំណង៖
- ពិនិត្យតាមដាននិងវាយតម្លៃវឌ្ឍនភាពរបស់ក្រុមហ៊ុនវិនិយោគសម្បទានដីសេដ្ឋកិច្ចក្នុងខេត្ត
- ប្រមូលរបាយការណ៍វឌ្ឍនភាពនៃការវិនិយោគរបស់ក្រុមហ៊ុនដែលបានអនុវត្តកន្លងមក និងពិនិត្យស្ថានភាពនៃការអនុវត្តជាក់ស្តែង
- ត្រួតពិនិត្យនិងវាយតម្លៃបច្ចេកទេស ស្រង់ស្ថិតិផ្ទៃដីដាំដុះ ផ្ទៃដីអាជីវកម្ម ការប្រើប្រាស់ពូជ ការប្រើប្រាស់កម្លាំងពលកម្ម និងតម្រូវការកម្លាំងពលកម្មបន្ថែម។
ក.លទ្ធផលនៃការចុះពិនិត្យការងារនៅតាមបណ្តាក្រុមហ៊ុន
ក្រុមការងារបានចុះពិនិត្យវឌ្ឍនៈភាពតាមបណ្ដាក្រុមហ៊ុនវិនិយោគលើដំណាំកៅស៊ូក្នុងខេត្តក្រចេះនិងខេត្តត្បូងឃ្មុំ ទទួលបានលទ្ធផលដូចមានខាងក្រោម៖
I. ខេត្តក្រចេះ (មាន៣១ក្រុមហ៊ុន) ដែលមាន៖
- ផ្ទៃដីកិច្ចសន្យាសរុប = ១៦៧ ៦៥៥ ហ.ត
- ផ្ទៃដីចុះបញ្ជីរួច = ៨៣ ៣៨៦,២១ហ.ត (មាន២០ក្រុមហ៊ុន)
- ផ្ទៃដីមានកៅស៊ូសរុប = ៤៦ ៣២៩,៦៥ ហ.ត ក្នុងនោះចៀរជ័រ= ២៤ ៦១៥,៤៥ ហ.ត និងថែទាំ = ២១ ៧១៤,២០ ហ.ត
- ប្រើប្រាស់ពលកម្មសរុបចំនួន៧ ៧០១នាក់ ក្នុងនោះ៖ (១) បុគ្គលិកខ្មែរចំនួន៣៩០នាក់ និងបរទេសចំនួន៣៧៣នាក់ (២) កម្មករខ្មែរអចិន្ត្រៃយ៍ចំនួន៥ ៦៤០នាក់ និងកម្មករអណ្តែតចំនួន១ ២៩៨នាក់
- តម្រូវការកម្មករចៀរជ័របន្ថែមចំនួន១១០នាក់។
- ២០ក្រុមហ៊ុនបានបញ្ជប់ការចុះបញ្ជីដីឯកជនរបស់រដ្ឋរួចរាល់ (ផ្ទៃដីចំនួន៨៣ ៣៨៦,២១ហ.ត) និង១១ក្រុមហ៊ុនកំពុងអនុវត្ត
- ១២ក្រុមហ៊ុនអនុវត្តការកែសម្រួលកិច្ចសន្យាថ្មីមកត្រឹម៥០ឆ្នាំរួចរាល់ ៣ក្រុមហ៊ុនកំពុងអនុវត្ត និងមិនទាន់អនុវត្តចំនួន១៦
- ៧ក្រុមហ៊ុនបានអនុវត្តការវាយតម្លៃហេតុប៉ះពាល់បរិស្ថាននិងសង្គមពេញលេញរួចរាល់ ១០ក្រុមហ៊ុនកំពុងអនុវត្ត និងមិនទាន់អនុវត្តមានចំនួន១៤។
II. ខេត្តត្បូងឃ្មុំ (មាន៤ក្រុមហ៊ុន) ដែលមាន៖
- ផ្ទៃដីកិច្ចសន្យាសរុប = ៦ ៨១២,៥០ហ.ត
- ផ្ទៃដីចុះបញ្ជីរួច = ៣ ២០១,៦១ហ.ត (៤ ក្រុមហ៊ុន)
- ផ្ទៃដីមានកៅស៊ូសរុប = ១ ០៩៦ហ.ត (ចៀរ= ១ ០៩៦ ហ.ត)
- ប្រើប្រាស់ពលកម្មសរុបចំនួន៤៤៦នាក់ ក្នុងនោះ ៖ (១) បុគ្គលិកខ្មែរចំនួន២៦នាក់ និងបរទេសចំនួន០០៣នាក់ (២) កម្មករខ្មែរអចិន្ត្រៃយ៍ចំនួន២២០នាក់ និងកម្មករអណ្តែតចំនួន២០០នាក់។
- បានបញ្ជប់ការចុះបញ្ជីដីឯកជនរបស់រដ្ឋរួចរាល់ ៣ ២០១,៦១ ហ.ត (៤ក្រុមហ៊ុន)
- កំពុងអនុវត្តការកែសម្រួលកិច្ចសន្យាថ្មីមកត្រឹម៥០ឆ្នាំ
- កំពុងអនុវត្តការវាយតម្លៃហេតុប៉ះពាល់បរិស្ថាននិងសង្គមពេញលេញ
ខ.បញ្ហាប្រឈមនិងសំណូមពរ
- ខ្វះកម្លាំងពលកម្មសម្រាប់ចៀរជ័រ
- កើតមានជំងឺផ្កាកុលាប ជំងឺស្ងួតមុខចៀរ និងបញ្ហាខ្យល់កន្ត្រាក់ដែលបណ្ដាលឱ្យបាក់និងរលំដើមកៅស៊ូ។
- ការខ្វះកម្លាំងពលកម្មរបស់ក្រុមហ៊ុនសម្រាប់ការប្រមូលផល អគ្គនាយកដ្ឋានកៅស៊ូនឹងជួយផ្សព្វផ្សាយពីតម្រូវការពលកម្ម ប៉ុន្ដែក្រុមហ៊ុនក៏ត្រូវបន្ដការសហការឱ្យបានជិតស្និតជាមួយអាជ្ញាធរមូលដ្ឋាន និងស្ថាប័នពាក់ព័ន្ធជាពិសេសមន្ទីរការងារនិងបណ្ដុះបណ្ដាលវិជ្ជាជីវៈដើម្បីជួយអន្តរាគមន៍លើតម្រូវការកម្លាំងពលកម្ម។
- ក្រុមហ៊ុនត្រូវយកចិត្តទុកដាក់ក្នុងការកសាងហេដ្ឋារចនាសម្ព័ន្ធនានាមានដូចជា ផ្ទះស្នាក់នៅ ទឹកប្រើប្រាស់ អគ្គីសនី មណ្ឌលសុខភាព សាលារៀន វត្តអារាម និងការឧបត្ថមផ្សេងៗដែលជាភាពទាក់ទាញទៅដល់ប្រជាជនដែលរស់ក្បែរក្រុមហ៊ុននិង
- ក្រុមហ៊ុនត្រូវបន្ដយកចិត្តទុកដាក់ក្នុងការថែទាំកៅស៊ូ លើការដាក់ជីបំប៉ននិងការព្យាបាលជំងឺ
- ក្រុមហ៊ុនត្រូវរាយការណ៍មកអគ្គនាយកដ្ឋានកៅស៊ូ នៅពេលកៅស៊ូជ្រុះស្លឹកខុសប្រក្រដីដែលសង្ស័យថាជួបបញ្ហាជំងឺ
- ក្រុមហ៊ុនត្រូវធ្វើរបាយការណ៍ពីសកម្មភាពការងារលទ្ធផលសម្រេចបាននិងបញ្ហាប្រឈមប្រចាំ ត្រីមាស ឆមាស ៩ខែ និងប្រចាំឆ្នាំ និងព្រឹត្តិប័ត្រព័ត៌មាន (ដោយភ្ជាប់ផែនទីដាំដុះ និងឯកសារពាក់ព័ន្ធ) ឱ្យបានទៀងទាត់និងទាន់ពេលវេលា។
គ. សន្និដ្ឋាននិងការវាយតម្លៃ
- ឃើញថាក្រុមហ៊ុនខិតខំបំពេញបែបបទគតិយុត្តិ ការថែទាំ ការយកផលកៅស៊ូ និងការសាងសង់ហេដ្ឋារចនាសម្ព័ន្ធ។ ជាពិសេសបុគ្គលិកនិងកម្មករបានចាក់វ៉ាក់សាំងការពារជំងឺ Covid-19 បាន១០០%។ សម្រាប់ខេត្តក្រចេះនិងខេត្តត្បូងឃ្មុំនេះ ជាខេត្តគោលដៅចុងក្រោយនៃការចុះអនុវត្តសកម្មភាពទី១.៥.៤.២ ការផ្ដល់របាយការណ៍ស្ថិតិផ្ទៃដី ផលិតផល និងការប្រើប្រាស់កម្លាំងពលកម្មពីបណ្ដាក្រុមហ៊ុនមួយចំនួននៅ មានភាពយឺតយ៉ាវនិងខ្វះចន្លោះច្រើនក្នុងការបំពេញតារាងទិន្នន័យដែលក្រុមការងារផ្ដល់ជូន ដែលក្រុមការងារត្រូវ បន្ដខិតខំបន្ថែមទៀតតាមប្រព័ន្ធទំនាក់ទំនង។ ដោយមានការណែនាំនិងចង្អុរបង្ហាញរបស់ឯកឧត្ដមប្រតិភូ ដែលជានិច្ចកាលតែងបានផ្តល់នូវអនុសាសន៍ល្អៗ គាំទ្រ និងលើកទឹកចិត្ត ទើបធ្វើឱ្យលទ្ធផលនៃការអនុវត្តការងារទទួលបាននូវលទ្ធផលល្អនិងមានប្រសិទ្ធភាពខ្ពស់៕
