I.និន្នាការនៃការនាំចេញនិងនាំចូលកៅស៊ូធម្មជាតិ

សម្រាប់ឆ្នាំនេះប្រទេសចិនរំពឹងថាការនាំចូលកៅស៊ូធម្មជាតិនឹងមានកំណើនយ៉ាងខ្លាំងគឺ ៩,២% ដែលមានបរិមាណចំនួន ៦,៣៣១លាន តោន។ ទោះបីជាយ៉ាងណាក៏ដោយ ទោះបីជាមានការព្យាករណ៍​ជា​វិជ្ជមា​នក៏ដោយ ក៏ការនាំចូលរបស់ប្រទេសចិនសម្រាប់ខែតុលាបានធ្លាក់ចុះ ២,៦% បើប្រៀបធៀប​ទៅ​នឹង​ខែកញ្ញា ដែលបរិមាណសរុបមានចំនួន ៤៨១ ០០០តោន។ ការធ្លាក់ចុះនេះអាចសន្មតថា​ ដោយសារថ្ងៃ ឈប់សម្រាកបុណ្យជាតិរយៈពេលមួយសប្តាហ៍ ដែលជះឥទ្ធិពលជាបណ្តោះអាសន្នដល់ប្រតិបត្តិការនៃ​សកម្មភាពផលិតកម្មកៅស៊ូ។

ផ្ទុយ​ទៅ​វិញប្រទេស​ឥណ្ឌា​កំពុង​ត្រៀម​ខ្លួន​សម្រាប់​ការ​កាត់​បន្ថយ​ការ​នាំ​ចូលកៅស៊ូ​ចំនួន ៧,៨% សម្រាប់​ខែ​នេះ ដែល​មានបរិមាណ​សរុប​ចំនួន ៤៧ ០០០តោន។ តួលេខទាំងនេះ​ស្របនឹងគោលដៅនៃ​ការ​​កាត់បន្ថយការពឹងផ្អែកលើការនាំចូល ដើម្បីបំពេញតម្រូវការក្នុងស្រុករបស់ខ្លួន។​ និន្នាការនេះក៏សង្កេត​ឃើញ​នៅក្នុងសន្ទស្សន៍អ្នកគ្រប់គ្រងការទិញ (PMI) សម្រាប់វិស័យផលិតកម្មកៅស៊ូនៅក្នុងប្រទេសទាំងពីរ ដែលធ្លាក់ចុះក្នុងអំឡុងពេលយោងនេះ។

តារាងទី១៖ និន្នាការនៃការនាំចូលកៅស៊ូធម្មជាតិក្នុងឆ្នាំ២០២៣ ពីប្រទេស​នាំចូលកំពូលទាំងបួន​នៃប្រទេសជាសមាជិក ANRPC

តារាងខាងក្រោមបង្ហាញពីទិដ្ឋភាពទូទៅនៃនិន្នាការនៃការនាំចេញកៅស៊ូធម្មជាតិ ដែលរួម​បញ្ចូល​ទាំងកៅស៊ូចម្រុះនិងសមាសធាតុពីបណ្តាប្រទេសនាំចេញកៅស៊ូធម្មជាតិសំខាន់ៗក្នុងប្រទេសជា​សមាជិក ANRPC ។ ការនាំចេញកៅស៊ូក្នុងខែតុលានៃបណ្តាប្រទេសនាំចេញកៅស៊ូធម្មជាតិទាំងនេះ ​បង្ហាញពីការ​អនុវត្ត​ចម្រុះគ្នា​ក្នុងអំឡុងពេលពីរខែនេះ គឺខែកញ្ញានិងខែតុលា។

ប្រទេសឥណ្ឌូណេស៊ីនិងម៉ាឡេស៊ីរំពឹងថាការនាំចេញកៅស៊ូនឹងមានការធ្លាក់ចុះគឺ ៥,៩% និង ៣,៥% រៀងគ្នានៅក្នុងខែតុលា បើធៀបនឹងខែមុន។ ការធ្លាក់ចុះនៃការនាំចេញនេះ​អាចបណ្តាលមក​ពី​កម្រិតផលិតកម្មកៅស៊ូទាបនៅក្នុងប្រទេសទាំងនេះ។

តារាងទី២៖ និន្នាការនៃការនាំចេញកៅស៊ូធម្មជាតិពីប្រទេស​នាំចេញ​សំខាន់ៗ ក្នុងឆ្នាំ២០២៣ (តោន)

II.និន្នាការទីផ្សារប្រេងឆៅ

ក្នុង​រយៈ​ពេល​បី​សប្តាហ៍​ដំបូង​នៃ​ខែ​កញ្ញាតម្លៃ​ប្រេង​ឆៅ Brent បាន​កើន​ឡើង​លើស​ពី ៩៥ដុល្លារ​ក្នុង​មួយ​បារ៉ែល។ តម្លៃនេះកើនឡើងជាចម្បង ដោយសារការកើនឡើងនៃតម្រូវការ និងក្តីព្រួយបារម្ភលើ​ការ​ផ្គត់ផ្គង់ពីការកាត់បន្ថយការផ្គត់ផ្គង់​ដោយស្ម័គ្រចិត្ត ដែលអនុវត្តដោយអារ៉ាប៊ីសា អូឌីតនិងរុស្ស៊ីដែលបាន​អូស​បន្លាយរហូតដល់ចុងឆ្នាំ២០២៣។ ក្នុងខែកញ្ញាតម្លៃប្រេងឆៅ Brent ជាមធ្យមមានតម្លៃជិត ៩៤ ក្នុដុល្លារ/បារ៉ែល។ ដោយកត់សម្គាល់ការកើនឡើង ២១% ពី ៧៧ដុល្លារ/បារ៉ែល​ដែលបានកត់ត្រាក្នុង​ខែសីហា។ ជាបន្តបន្ទាប់នៅក្នុងខែតុលាតម្លៃប្រេងឆៅ Brent ជាមធ្យមមានស្ថិរភាពប្រហែល ៩១ដុល្លារ/បារ៉ែល ដែលបានធ្លាក់ចុះតិចតួច ៣,១% បើធៀបនឹងខែមុន។

ក្រាហ្វិកទី១៖ តម្លៃតម្លៃប្រេងឆៅ Brent ប្រចាំថ្ងៃ ចាប់ពីថ្ងៃទី១ខែកញ្ញា ឆ្នាំ២០២៣ ដល់ថ្ងៃទី៣០ ខែតុលា ឆ្នាំ២០២៣

III.និន្នាការថ្លៃកៅស៊ូធម្មជាតិប្រចាំខែកញ្ញានិងតុលា ឆ្នាំ២០២៣

១.និន្នាការថ្លៃកៅស៊ូធម្មជាតិនៅតាមបណ្តាទីផ្សារហ៊ុន (Futures Market)

ថ្លៃទិញលក់កៅស៊ូតាមកិច្ចសន្យានៅទីផ្សារហ៊ុនសៀងហៃ អូសាកា និងសឹង្ហបុរី បានបង្ហាញពីនិន្នាការកើនឡើងក្នុងអំឡុងខែកញ្ញានិងតុលា ឆ្នាំ ២០២៣នេះ។ ក្នុងអំឡុងខែកញ្ញា ឆ្នាំ២០២៣ ថ្លៃកៅស៊ូទិញលក់តាមកិច្ចសន្យាសម្រាប់ខែមករា ឆ្នាំ២០២៤ នៅទីផ្សារហ៊ុនសៀងហៃគិតជាមធ្យម ១៤ ១៩៦យ័ន/តោន បានកើនឡើង ៨,៩% បើធៀបនឹងថ្លៃកៅស៊ូទិញលក់តាមកិច្ចសន្យាប្រចាំខែសីហាគិតជាមធ្យម ១២ ២១៧ យ័ន/តោន។ និន្នាការក៏បានបន្តកើនឡើងដល់ខែតុលា ឆ្នាំ២០២៣ ថ្លៃកៅស៊ូទិញលក់តាមកិច្ចសន្យាសម្រាប់ខែមករា ឆ្នាំ២០២៤ គិតជាមធ្យម ១៤ ៤៨៦យ័ន/តោន។

ក្រាហ្វិកទី២៖ និន្នាការថ្លៃកៅស៊ូទិញលក់តាមកិច្ចសន្យាសម្រាប់ខែមករា ឆ្នាំ២០២៣ នៅទីផ្សារហ៊ុនសៀងហៃ ក្នុងអំឡុងខែកញ្ញា-តុលា ឆ្នាំ២០២៣

សន្និធិកៅស៊ូប្រចាំសប្តាហ៍នៅទីផ្សារហ៊ុនសៀងហៃក្នុងអំឡុងខែកញ្ញា ឆ្នាំ២០២៣នេះ មានចំនួន ២៣៤ ៨៩៣តោន បានកើនឡើង១៦,៥% ធៀបនឹងខែសីហា ឆ្នាំ២០២៣ មានចំនួន២០១ ៦៨០តោន។

ក្រាហ្វិកទី៣៖ សនិ្នធិកៅស៊ូប្រចាំសប្តាហ៍នៅទីផ្សារហ៊ុនសៀងហៃក្នុងអំឡុងខែកញ្ញា ចន្លោះឆ្នាំ២០២១-២០២៣

សន្និធិកៅស៊ូប្រចាំសប្តាហ៍នៅទីផ្សារហ៊ុនសៀងហៃក្នុងអំឡុងខែតុលា ឆ្នាំ២០២៣នេះ មានចំនួន ២៤៦ ៧២១តោន បានកើនឡើង៥% បើធៀបនឹងខែកញ្ញា ឆ្នាំ២០២៣ មានចំនួន ២៣៤ ៨៩៣តោន។

ក្រាហ្វិកទី៤៖ សនិ្នធិកៅស៊ូប្រចាំសប្តាហ៍នៅទីផ្សារហ៊ុនសៀងហៃក្នុងអំឡុងខែតុលា ចន្លោះឆ្នាំ២០២១-២០២៣

ក្នុងអំឡុងខែកញ្ញា-តុលា ឆ្នាំ២០២៣នេះ ថ្លៃកៅស៊ូ TSR-20 ទិញលក់តាមកិច្ចសន្យាសម្រាប់ខែធ្នូ ឆ្នាំ២០២៣ និងខែមករា ឆ្នាំ២០២៤  នៅទីផ្សារសិង្ហបុរីបានបង្ហាញពីនិន្នាការដូចគ្នានឹងថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនសៀងហៃ។ ក្នុងអំឡុងខែកញ្ញា ឆ្នាំ២០២៣ ថ្លៃកៅស៊ូ TSR-20 ទិញលក់តាម កិច្ចសន្យាសម្រាប់ខែធ្នូ នៅទីផ្សារហ៊ុនសិង្ហបុរីគិតជាមធ្យម ១,៤២ដុល្លារ/គ.ក្រ បានកើនឡើង បើធៀបនឹងខែមុន។ ចំពោះថ្លៃកៅស៊ូ TSR-20 ទិញលក់កៅស៊ូតាមកិច្ចសន្យាសម្រាប់ខែមករា ឆ្នាំ២០២៤ ក្នុងអំឡុងខែតុលា ឆ្នាំ២០២៣នេះ គិតជាមធ្យម១,៤៦ដុល្លារ/គ.ក្រ បានកើនឡើង បើធៀបនឹងខែកញ្ញា ឆ្នាំ២០២៣។

ក្រាហ្វិកទី៥៖ ថ្លៃកៅស៊ូ TSR-20 ទិញលក់តាមកិច្ចសន្យាសម្រាប់ខែធ្នូ ឆ្នាំ២០២៣ និង​ខែមករា ឆ្នាំ២០២៤ នៅទីផ្សារហ៊ុនសិង្ហបុរីក្នុងអំឡុងខែកញ្ញានិងតុលា ឆ្នាំ២០២៣

ក្រាហ្វិកខាងក្រោមនឹងបង្ហាញពីនិន្នាការថ្លៃកៅស៊ូ RSS-3 ទិញលក់តាមកិច្ចសន្យានៅទីផ្សារហ៊ុនអូសាកាក្នុងអំឡុងខែកញ្ញានិងតុលា ឆ្នាំ ២០២៣នេះ។ ថ្លៃកៅស៊ូ RSS-3 ទិញលក់តាមកិច្ចសន្យានៅទីផ្សារ ហ៊ុនអូសាកាមាននិន្នាការកើនឡើងដូចគ្នានឹងថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនសៀងហៃផងដែរ។ ក្នុងអំឡុងខែកញ្ញា ឆ្នាំ២០២៣នេះ ថ្លៃកៅស៊ូ RSS-3 ទិញលក់តាមកិច្ចសន្យាសម្រាប់ខែកុម្ភៈ ឆ្នាំ ២០២៤ នៅទីផ្សារហ៊ុនអូសាកា គិតជាមធ្យម ២៣៣យ៉េន/គ.ក្រ បានកើនឡើង១៥,៨% បើធៀបនឹងខែសីហា ថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនអូសាកាគិតជាមធ្យម ២០៨យ៉េន/គ.ក្រ។

ក្រាហ្វិកទី៦៖ ថ្លៃកៅស៊ូដុំ RSS-3 ទិញលក់តាមកិច្ចសន្យាសម្រាប់ខែធ្នូ ឆ្នាំ២០២៣ និង​ខែកុម្ភៈ ឆ្នាំ២០២៤ នៅទីផ្សារហ៊ុនអូសាកាក្នុងអំឡុងខែកញ្ញានិងតុលា ឆ្នាំ២០២៣

២.និន្នាការថ្លៃកៅស៊ូធម្មជាតិនៅតាមបណ្តាទីផ្សារទិញលក់ភ្លាមៗ (Physical Market)

ថ្លៃកៅស៊ូដុំនៅទីផ្សារម៉ាឡេស៊ីនិងថៃក្នុងអំឡុងខែកញ្ញានិងតុលា ឆ្នាំ២០២៣នេះ នឹងបង្ហាញក្នុងក្រាហ្វិកខាងក្រោម។ បន្ទាប់ពីស្ថានភាពថ្លៃកៅស៊ូបានធ្លាក់ចុះក្នុងរយៈប៉ុន្មានខែកន្លងមកក្នុងអំឡុងខែកញ្ញា ឆ្នាំ២០២៣នេះ ថ្លៃកៅស៊ូ SMR 20 ទិញលក់ភ្លាមៗនៅទីផ្សារគួរឡាឡាំពួរគិតជាមធ្យម ១,៣៦ដុល្លារ/គ.ក្រ បានកើនឡើង ៤,៦% ធៀបនឹងខែមុន។ ចំពោះថ្លៃកៅស៊ូ STR 20 ទិញលក់ភ្លាមៗនៅទីផ្សារបាងកកគិតជាមធ្យម ១,៤៣ដុល្លារ/គ.ក្រ បានកើនឡើង ៤,៤% បើធៀបនឹងខែមុន។

ក្នុងអំឡុងខែតុលា ឆ្នាំ២០២៣ និន្នាការថ្លៃកៅស៊ូដុំក៏បន្តកើនឡើងបើធៀបនឹងខែកញ្ញា។ ថ្លៃកៅស៊ូ SMR 20 ទិញលក់ភ្លាមៗនៅទីផ្សារ គួឡាឡាំពួរគិតជាមធ្យម ១,៤៥ដុល្លារ/គ.ក្រ និងថ្លៃកៅស៊ូ STR 20 ទិញលក់ភ្លាមៗនៅទីផ្សារបាងកកគិតជាមធ្យម ១,៥៤ដុល្លារ/គ.ក្រ។ 

តារាងទី៣៖ ថ្លៃកៅស៊ូដុំទិញលក់ភ្លាមៗនៅទីផ្សារគួឡាឡាំពួរនិងបាងកកក្នុងអំឡុងខែកញ្ញានិងខែតុលា ឆ្នាំ២០២៣

ក្រាហ្វិកទី៧៖ ថ្លៃកៅស៊ូ SMR-20 និង STR-20 ទិញលក់ភ្លាមៗក្នុងអំឡុងខែកញ្ញានិងខែតុលា ឆ្នាំ២០២៣

ក្នុងអំឡុងខែកញ្ញា ឆ្នាំ២០២៣ ថ្លៃកៅស៊ូសន្លឹក RSS 3 ទិញលក់ភ្លាមៗនៅទីផ្សារបាងកកគិតជា មធ្យម ១,៥៨ដុល្លារ/គ.ក្រ បានកើនឡើង ១,៩% និងបន្តភាពវិជ្ជមានដល់ខែតុលា ឆ្នាំ២០២៣ ថ្លៃគិតជាមធ្យមបានកើនឡើងដល់ ១,៦៧ដុល្លារ/គ.ក្រ។ ចំពោះថ្លៃកៅស៊ូ RSS 4 ទិញលក់ភ្លាមៗនៅទីផ្សារកូតូយ៉ាមគិតជាមធ្យម ១,៧៧ដុល្លារ/គ.ក្រ បានធ្លាក់បន្តិច ០,០១ដុល្លារ/គ.ក្រ ធៀបនឹងខែសីហា។ ប៉ុន្តែថ្លៃកៅស៊ូ RSS 4 ទិញលក់ភ្លាមៗនៅទីផ្សារកូតូយ៉ាមក៏បានងើបឡើងវិញគិតជាធម្យម ១,៨ដុល្លារ/គ.ក្រ។

តារាងទី៤៖ ថ្លៃកៅស៊ូសន្លឹកទិញលក់ភ្លាមៗនៅទីផ្សារបាងកកនិងកូតូយ៉ាមនៅអំឡុងខែកញ្ញានិងខែតុលា ឆ្នាំ២០២៣

ក្រាហ្វិកទី៨៖ ថ្លៃកៅស៊ូសន្លឹក RSS-3 នៅទីផ្សារបាងកក និង កៅស៊ូសន្លឹក RSS-4 នៅទីផ្សារកូតូយ៉ាមក្នុងអំឡុងខែកញ្ញាខែនិងខែតុលា ឆ្នាំ២០២៣

ក្នុងអំឡុងខែកញ្ញា ឆ្នាំ២០២៣នេះ ថ្លៃទឹកជ័រខាប់ទិញលក់ភ្លាមៗនៅទីផ្សារគួរឡាឡាំពួរគិតជាមធ្យម ១,០៥ដុល្លារ/គ.ក្រ បានកើនឡើង ១% ធៀបនឹងខែសីហា និងបានបន្តកំណើន ៨,៥% ក្នុងអំឡុងខែតុលា ដែលថ្លៃទឹកជ័រខាប់ទិញលក់ភ្លាមៗគិតជាមធ្យម ១,១៤ដុល្លារ/គ.ក្រ។

តារាងទី៥៖ ថ្លៃកៅស៊ូទឹកជ័រខាប់នៅទីផ្សារគួរឡាឡាំពួរក្នុងអំឡុងខែកញ្ញានិងខែតុលា ឆ្នាំ២០២៣

ក្រាហ្វិកទី៩៖ ថ្លៃទឹកជ័រខាប់ទិញលក់ភ្លាមៗនៅទីផ្សារគួឡាឡាំពួរក្នុងអំឡុងខែកញ្ញានិងតុលា ឆ្នាំ២០២៣

៣.ទស្សនវិស័យកៅស៊ូក្នុងរយៈពេលខ្លី

កត្តាខាងក្រៅមួយចំនួននឹងជះឥទ្ធិពលលើទីផ្សារកៅស៊ូធម្មជាតិក្នុងរយៈពេលខ្លីខាងមុខ រួមមាន៖

• ការរីករាលដាក់នៃភាពតានតឹងភូមិសាស្រ្តនយោបាយ ជាពិសេសតំបន់មជ្ឍឹមបូព៌ា សង្រ្គាមរវាងអ៊ីស្រាអ៊ែលនិងប៉ាឡេស្ទីន ដែលជះឥទ្ធិពលដល់ការអភិវឌ្ឍសេដ្ឋកិច្ចក្នុងតំបន់
• កំណើនមិនច្បាស់លាស់ពីគោលនយោបាយរូបិយប័ណ្ណនៅតាមបណ្តាប្រទេសដែលទទួលរងឥទ្ធិពលដោយលក្ខខណ្ឌសេដ្ឋកិច្ចចម្បង។ ផ្ទុយទៅវិញបណ្តាប្រទេសមួយចំនួននឹងអនុវត្តគោលនយោបាយរូបិយប័ណ្ណជាឧបករណ៍ ដើម្បីការពារភាពខ្លាំងរូបិយវត្ថុរបស់ពួកគេ ធៀបជាមួយនឹងលុយដុល្លារសហរដ្ឋ​អាម៉េ​រិក
• ការសម្រេចចិត្តរបស់ធនាគារកណ្តាលអាម៉េរិក (Fed) ផ្អាកជំហរនៃការតម្លើងអត្រាការប្រាក់​របស់ខ្លួន ដើម្បីបន្ធូរបន្ថយដល់ភាពតាន តឹននៃវិស័យហិរញ្ញវត្ថុនិងការធ្លាក់ចុះទីផ្សារភាគហ៊ុន
• រំញោចនៃទីផ្សារប្រេងឆៅ​ (Brent) អាចនឹងមានផលវិជ្ជមានដល់ទីផ្សារទំនិញពាណិជ្ជកម្ម

យ៉ាងណាក៏ដោយ កត្តាមួយចំនួនមានឥទ្ធិផលផ្ទាល់លើទីផ្សារកៅស៊ូធម្មជាតិរួមមាន៖

• លក្ខខណ្ឌអាកាសធាតុមិនសមស្រប ខណៈពេលដែលខ្យល់មូសុងនឹងដាក់សម្ពាធលើការ​ផ្គត់​​ផ្គង់កៅស៊ូនៅប៉ុន្មានខែខាងមុខ ទោះបីជាដំណាក់កាលខាងមុខគឺជាពេលវេលាផ្តល់ផលខ្លាំង
• នៅខែវិច្ឆិកាខាងមុខនេះ ផលិតកម្មកៅស៊ូសកលោកនឹងកើនឡើងដល់ ១,៥៣៤តោន (៣,៩%) យ៉ាងណាក៏ដោយ តម្រូវការសកលលោកប្រមាណ១,៣៤៦តោន បានកើនឡើងត្រឹមតែ ០,២%។