យោងតាមអ្នកជំនាញឧស្សាហកម្មកៅស៊ូ​ប្រទេសវៀតណាមបានឲ្យដឹងថា ឧស្សាហកម្មកៅស៊ូ​វៀតណាមចាំបាច់ត្រូវពង្រឹងខ្សែច្រវ៉ាក់ផលិតកម្មរបស់ខ្លួន ដើម្បីឆ្លើយតបទៅនឹង​តម្រូវការ​កើនឡើងនៃទីផ្សារនាំចេញ ជាពិសេស​ទីផ្សារដែល​មានសន្ទុះលឿនដូចជានៅអឺរ៉ុបនិងសហរដ្ឋអាម៉េរិក។

          លោក To Xuan Phuc អ្នកជំនាញការនៃ​ក្រុម​ហ៊ុន Forest Trend បានលើកឡើងថា ការនាំ​ចេញកៅស៊ូកែច្នៃរបស់វៀតណាមបានកើនឡើងទៅកាន់ប្រទេសជាច្រើន។ ទោះយ៉ាងណា ការនាំចេញផលិតផល​កៅស៊ូរបស់វៀតណាមត្រូវតែបំពេញទៅតាម​លក្ខខណ្ឌតម្រូវនៃទីផ្សារនាំចេញ រួមទាំងបញ្ហា​ច្បាប់ផងដែរ។

           បច្ចុប្បន្ននេះ ប្រទេសវៀតណាមបាននាំចេញទឹកជ័រនិងផលិតផលកៅស៊ូចម្រាញ់ឡើងវិញទៅកាន់ប្រទេសចំនួន១៧៥ ហើយតួលេខនេះកំពុងបន្តកើនឡើងបន្ថែមទៀត។ ទីផ្សារនាំចេញផលិតផលកៅស៊ូធំបំផុតរបស់វៀតណាម គឺប្រទេសសហរដ្ឋអាម៉េរិកដែលគិតជាទឹកប្រាក់មានប្រមាណ១ពាន់លានដុល្លារអាម៉េរិក នៅឆ្នាំ២០២០ និងមានចំណែកទីផ្សារ ហ៊ុន៣៣,២% បន្ទាប់មកគឺប្រទេសជប៉ុន ចិន សាធារណរដ្ឋកូរ៉េ និងអាល្លឺម៉ង់។

           លោក Phuc បន្តថា ទោះយ៉ាងណាស្ថានភាពបរិមាណផល​ដែលបានប្រមូលពីចម្ការកៅស៊ូតូចៗគឺ​ខ្ពស់ជាង​ចម្ការកៅស៊ូធំៗ។ ដូច្នេះ ឧស្សាហកម្មកៅស៊ូ​វៀតណាម​ចាំបាច់ត្រូវតែ ធ្វើការផ្លាស់ប្តូរនាពេលអនាគត ដើម្បីឆ្លើយតប​នឹងលក្ខខណ្ឌតម្រូវនៃទីផ្សារ។ ឧស្សា​ហ​​កម្មកៅស៊ូត្រូវតែមានតម្លាភាពអំពីខ្សែច្រវ៉ាក់ផ្គត់ផ្គង់ផលិតផលកៅស៊ូ រួមទាំងព័ត៌មានអំពីការ ផ្គត់ផ្គង់និងសកម្មភាពខ្សែច្រវ៉ាក់ផ្សេងៗ។

          លោកស្រី Tran Thi Thuy Hoa មន្រ្តីជំនាញនៃវិទ្យាស្ថានស្រាវជ្រាវកៅស៊ូវៀតណាមបានឲ្យដឹងថា ចម្ការកៅស៊ូតូចៗបានក្លាយជាផ្នែក​មួយ​​ដ៏សំខាន់បំផុតនៅក្នុងឧស្សាហកម្ម កៅស៊ូ។ ពិសេសផលិតកម្មកៅស៊ូធម្មជាតិដែលការផ្គត់ផ្គង់មកពីចម្ការកៅស៊ូតូចៗមានចំនួនជាង៦០% នៃផលិតផលកៅស៊ូធម្មជាតិសរុប។ ទោះជាយ៉ាងណា ចម្កាកៅស៊ូ​​តូចៗត្រូវបាន អភិវឌ្ឍជាចម្បងដោយឯក​ឯង។

          កសិករគ្រួសារបានលក់ទឹកជ័រទៅឲ្យឈ្មួញ ដោយមិនបានកត់ត្រាព័ត៌មានឲ្យបានគ្រប់គ្រាន់រាល់ការលក់។ ដូច្នេះ ការខ្វះព័ត៌មានពីគ្រប់​ដំណាក់កាល​នៃខ្សែច្រវ៉ាក់ផ្គត់ផ្គង់ រួមទាំង​បណ្តាញ​ព័ត៌មានរវាង​កសិករកៅស៊ូគ្រួសារនិងឈ្មួញ ទើប​ធ្វើឲ្យការនាំចេញ​មិនឆ្លើយតបនឹងលក្ខខណ្ឌតម្រូវការទីផ្សារនាំចេញ។

          លោកស្រី Hoa បានបន្តថា បញ្ហានេះក៏បាន​កាត់បន្ថយឱកាស​និងការ​ធ្វើធុរកិច្ចកៅស៊ូរបស់កសិករកៅស៊ូ​គ្រួសារក្នុងការចូលដល់ទីផ្សារ ថែមទាំង​​ជាហានិភ័យដល់ឧស្សាហកម្ម កៅស៊ូវៀតណាមផងដែរ នៅ​ពេលដែលចូលដល់ទីផ្សារនាំចេញនា​ពេល​អនាគត។​ ម៉្យាងទៀត និន្នាការទីផ្សារទាមទារ​នូវផលិតផលស្របច្បាប់និងប្រកបដោយនិរន្តរភាព​ដែល ឧស្សាហកម្មកៅស៊ូរបស់ប្រទេសវៀត​ណាមត្រូវ ​តែគោរពតាម​លក្ខខណ្ឌតម្រូវការ​ទីផ្សារ ​​ដោយ​មិន​​​អាច​ចៀសបាននាពេលអនាគត។

          យោងតាមសមាគមកៅស៊ូវៀតណាមបានឲ្យដឹងថា ក្នុងឆ្នាំ២០២០ ទឹកប្រាក់នាំចេញកៅស៊ូ​ធម្មជាតិរបស់វៀតណាមមានចំនួនជាង២,៣៨ពាន់លានដុល្លារ ស្មើនឹង ៣០,៣% នៃ ទឹកប្រាក់នាំចេញ​សរុបរបស់ឧស្សាហកម្មកៅស៊ូ។ ចំណែកទឹកប្រាក់​នាំចេញផលិតផលកៅស៊ូកែច្នៃមានប្រមាណ៣,១១ ពាន់លានដុល្លារក្នុងឆ្នាំ២០២០ ស្មើនឹង៣៩,៦ %។ រីឯទឹកបា្រក់នាំចេញឈើកៅស៊ូមានចំនួន២,៣៦​ពាន់លានដុល្លារ ស្មើនឹង ៣០,១%។

         ការផ្លាស់ប្តូរនៃការនាំចេញកៅស៊ូធម្មជាតិ​និងផលិតផលកៅស៊ូរបស់វៀតណាមបានកើនឡើងក្នុងរយៈពេលប៉ុន្មានឆ្នាំចុងក្រោយនេះ។ ប្រទេសវៀតណាមមានផ្ទៃដីដាំកៅស៊ូធំជាង គេទី៥​ នៅលើ​ពិភពលោក ប៉ុន្តែផលិតផលបែរជាស្ថិតនៅលំដាប់ទី​៣​ បន្ទាប់ពីប្រទេសថៃនិងឥណ្ឌូនេស៊ី និងបាន​នាំចេញទឹកជ័រដែលជាវត្ថុធាតុដើមចម្បងមាន ៧៨, ៤% និង ២១,៦% បានកែច្នៃ​ជា​​ផលិតផលដូចជា៖ សំបកកង់ ស្រោមដៃ គ្រឿង​បន្លាស់ និងបាតស្បែកជើង៕