ព័ត៌មានចុងក្រោយ
ចាប់ពីថ្ងៃទី២២ - ២៣ ខែធ្នូ ឆ្នាំ២០២៣ អគ្គនាយកដ្ឋានកៅស៊ូបានរៀបចំវេទិកាពិភាក្សារវាង “អ្នកផ្គតផ្គង់និងអ្នកប្រើប្រាស់កៅស៊ូធម្មជាតិ” ដែលប្រព្រឹត្តិទៅនៅសាលប្រជុំសួនទឹកគជ់ស្វាយព្រៃ ខេត្តស្វាយរៀង ក្រោមអធិបតីភាពដ៏ខ្ពង់ខ្ពស់ ឯកឧត្ដម ប៉ុល សុផា អនុរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពី ឯកឧត្ដម ហ៊ឹម អូន ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកៅស៊ូ ឯកឧត្ដម សរ សុដានី អភិបាលរងនៃគណៈអភិបាលខេត្តស្វាយរៀង លោកអគ្គនាយករងនៃអគ្គនាយកដ្ឋានកៅស៊ូ និងលោក/លោកស្រីតំណាងដៃគូរអភិវឌ្ឍន៍ជាគណៈអធិបតី។ ក្នុងវេទិកានេះ ក៏មានសមាសភាពពាក់ព័ន្ធសំខាន់ៗជាច្រើនបានចូលរួមពិភាក្សារួមមាន៖ សហគមន៍កសិកម្មកៅស៊ូគ្រួសារចំនួន ៧រោងចក្រកែច្នៃ ផលិតផលជ័រកៅស៊ូ រោងចក្រកម្មន្តសាលផលិតផលសម្រេចពីកៅស៊ូ តំណាងមន្ទីរកសិកម្ម រុក្ខាប្រមាញ់ និងនេសាទ មន្ទីរសេដ្ឋកិច្ចនិងហិរញ្ញវត្ថុ មន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងថ្នាក់ដឹកនាំនិងមន្រ្តីជំនាញនៃអគ្គនាយកដ្ឋានកៅស៊ូសរុបប្រមាណ៥០នាក់ ក្នុងនោះស្រីចំនួន១០នាក់។
វេទិកាពិភាក្សានេះ មានគោលបំណងភ្ជាប់ទំនាក់ទំនងរវាងអ្នកផ្គត់ផ្គង់និងអ្នកប្រើប្រាស់កៅស៊ូជួបពិភាក្សានិងស្វែងយល់អំពី៖ ១) តម្រូវការ-ការផ្គត់ផ្គង់ ២) លក្ខខណ្ឌតម្រូវស្តង់ដារផលិតផលកៅស៊ូ សម្រាប់ជាវត្ថុធាតុដើមកែច្នៃសំបកកង់យានយន្ត ៣) បង្កើនជំនឿទុកចិត្តគ្នាក្នុងការធ្វើធុរកិច្ចកៅស៊ូទាំងបរិមាណនិងគុណភាពនិង ៤)រៀបចំយន្តការនិងរិះរកដំណោះស្រាយបញ្ហាប្រឈមទីផ្សារនាពេលអនាគត។
1.ការប្រព្រឹត្តទៅនៃវេទិកាពិភាក្សា
នៅថ្ងៃទី២២ ខែធ្នូ ឆ្នាំ២០២៣ វេលាម៉ោង៩:០០នាទីព្រឹក ឯកឧត្តម ប៉ុល សុផា បានដឹកនាំថ្នាក់ដឹកនាំអគ្គនាយកដ្ឋានកៅស៊ូប្រជុំពិភាក្សាជាមួយ ថ្នាក់ដឹកនាំសហគ្រាសខាតថាយអឺរ ឯ.ក ដោយផ្តោតលើ៖ (១) វឌ្ឍនភាពនៃខែ្សច្រវាក់ផលិតកម្មកែច្នៃសំបកកង់យានយន្ត (២) ការប្រើប្រាស់កៅស៊ូធម្មជាតិ (៣) បញ្ហាប្រឈមនិងសំណូមពរនិង (៤) ទិសដៅការងារបន្ត។ ឆ្លៀតក្នុងឱកាសនេះ ក្រុមការងារក៏បានទស្សនកិច្ចសិក្សាខ្សែច្រវាក់ផលិតកម្មកែច្នៃសំបកកង់យានយន្តខាតថាយអឺរ ឯ.ក។ បន្ទាប់មក ឯកឧត្តមអនុរដ្ឋលេខាធិការ និងថ្នាក់ដឹកនាំអគ្គនាយកដ្ឋានកៅស៊ូក៏បានបន្តប្រជុំពិភាក្សាជាមួយរោងចក្រកែច្នៃស្រោមដៃ RMKH (Cambodia) Co., LTD ដោយផ្តោតលើ៖ ១) ខ្សែច្រវាក់ផលិតកម្មកែច្នៃស្រោមដៃ ២) ការប្រើប្រាស់ប្រភេទកៅស៊ូកែច្នៃស្រោមដៃ ៣) បញ្ហាប្រឈមនិងសំណូមពរ ៤) ទិស ដៅការងារបន្ត។ ជាចុងក្រោយក្រុមការងារក៏បានទស្សនកិច្ចសិក្សាខ្សែច្រវាក់កែច្នៃស្រោមដៃនិងត្រលប់មកសម្រាកពិសាអាហារថ្ងៃត្រង់ដើម្បីត្រៀមចូលរួមវេទិកាពិភាក្សា។
នៅវេលាម៉ោង២:០០នាទីរសៀល វេទិកាពិភាក្សារវាង “អ្នកផ្គត់ផ្គង់និងអ្នកប្រើប្រាស់កៅស៊ូ” បានចាប់ផ្តើមដំណើរការ។ កិច្ចចាប់ផ្តើម ឯកឧត្ដម សរ សុដានី បានមានមតិស្វាគមន៍និងថ្លែងអំណរគុណចំពោះឯកឧត្តមអនុរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ ថ្នាក់ដឹកនាំអគ្គនាយកដ្ឋានកៅស៊ូដែលបានរៀបចំវេទិកាពិភាក្សានេះក្នុងខេត្តស្វាយរៀង។ លោកបានធ្វើសេចក្តីរាយការណ៍សង្ខេបអំពីផ្ទៃដីខេត្តសរុប ២ ៩៦៦,៤០ គីឡូម៉ែត្រការ៉េ។ បច្ចុប្បន្នប្រជាជនភាគច្រើនប្រកបមុខរបរកសិកម្មប្រមាណ ៥៤,៨% ក្នុងនោះផ្ទៃដីដំណាំស្រូវចំនួន ១៨៨ ០០០ហិកតា និងផ្ទៃដីដំណាំកសិឧស្សាហកម្មចំនួន ១៧ ៤៧៦ ហិកតា (ដំណាំកៅស៊ូជាង ២០០០ហិកតា)។
ជាកិច្ចបន្ទាប់ ឯកឧត្ដម ហ៊ឹម អូន បានថ្លែងសុន្ទរកថាស្វាគមន៍និងថ្លែងអំណរគុណចំពោះ វត្តមានរបស់ ឯកឧត្ដម ប៉ុល សុផា អនុរដ្ឋលេខាធិការ គណៈអធិបតី និងប្រតិបត្តិករកៅស៊ូទាំងអស់ក្នុងវេទិកាពិភាក្សារវាង “អ្នកផ្គត់ផ្គង់និងអ្នកប្រើប្រាស់កៅស៊ូធម្មជាតិ” និងបានបញ្ជាក់ពីសារៈប្រយោជន៍នៃវេទិកានាថ្ងៃនេះ។ ឆ្លៀតក្នុងឱកាសនេះ ឯកឧត្តមប្រតិភូក៏បានរាយការណ៍សង្ខេបពីស្ថានភាពកៅស៊ូក្នុងឆ្នាំ២០២២ ប្រទេសកម្ពុជាមានផ្ទៃដីដំណាំកៅស៊ូសរុបចំនួន ៤០៤ ៥៧៨ហិកតា ក្នុងនោះផ្ទៃដីចម្ការកៅស៊ូកសិ-ឧស្សាហកម្មមានចំនួន២៣៩ ៤២២ហិកតា ស្មើនឹង៥៩% និងផ្ទៃដីចម្ការកៅស៊ូគ្រួសារចំនួន ១៦៥ ១៥៦ហិកតា ស្មើនឹង៤១%។ ផ្ទៃដីកៅស៊ូចៀរជ័រមានចំនួន ៣១៥ ៣៣២ហិកតា ដោយផ្តល់ទិន្នផលមធ្យម ១ ២១២គ.ក្រ./ហ.ត/ឆ្នាំ។ ផលិតផលកៅស៊ូស្ងួតសម្រេចបានប្រចាំឆ្នាំចំនួន ៣៨២ ០០០តោន និងទទួលបានចំណូលចំនួន ៥២៧,៧៧៥លានដុល្លារអាម៉េរិក (តម្លៃមធ្យមគឺ១ ៤១៥ដុល្លារ/ តោន)។
ជាកិច្ចបន្ទាប់ ឯកឧត្ដម ប៉ុល សុផា បានមានមតិស្វាគមន៍ចំពោះគណៈអធិបតីនិងប្រតិបត្តិករកៅស៊ូទាំងអស់ដែលមានវត្តមាននាថ្ងៃនេះ។ ឯកឧត្តមក៏បានលើកឡើងថា ស្របពេលដែលផ្នែកលំហូរខាងក្រោមនៃអនុវិស័យនេះបាននឹងកំពុងរីកចម្រើន ប៉ុន្តែខ្សែច្រវាក់នៃការផ្គត់ផ្គង់នៃកៅស៊ូធម្មជាតិនៅតែឆ្លងកាត់ឈ្មួញជាច្រើនដំណាក់កាលនិងមិនទាន់ឆ្លើយតបនឹងលក្ខខណ្ឌតម្រូវស្ដង់ដារផលិតផលកៅស៊ូ សម្រាប់ធ្វើជាវត្ថុធាតុដើមកែច្នៃសំបកកង់យានយន្ត។ ដូច្នេះដើម្បីដោះស្រាយនូវបញ្ហាខ្សែច្រវាក់នៃការផ្គត់ផ្គង់និងផ្ដល់តម្លៃបន្ថែមដល់សហគមន៍កសិកម្មកៅស៊ូគ្រួសារ ក៏ដូចជាការកាត់បន្ថយថ្លៃដើមចំពោះអ្នកកែច្នៃជ័រកៅស៊ូនិងរោងចក្រកម្មន្តសាលឱ្យទទួលបានផលប្រយោជន៍រួមទៅវិញទៅមក ដោយផ្អែកលើគោលការណ៍ “អ្នកផ្គត់ផ្គង់និងអ្នកប្រើប្រាស់កៅស៊ូធម្មជាតិគឺសម្លេងតែមួយ”។
ជាចុងក្រោយ ឯកឧត្តមអនុរដ្ឋលេខាធិការក៏បានថ្លែងអំណរគុណក្រុមការងារអគ្គនាយកដ្ឋានកៅស៊ូ ដៃគូរអភិវឌ្ឍន៍ OXFAM, NGO FORUM និង WWF ដែលបានសហការគ្នាយ៉ាងល្អនិងជួយគាំទ្ររៀបចំវេទិកានេះឡើង ព្រមទាំងសហគ្រាសខាតថាយអឺរ ឯ.ក និងរោងចក្រ RMKH Glove (Cambodia) Co., Ltd ដែលបានសម្របសម្រួលឲ្យមានទស្សនកិច្ចសិក្សាសូមបន្តកិច្ចសហការនិងជួយគាំទ្របន្តទៀតនិងបើកវេទិកាចាប់ពីពេលនេះ។
I. បទបង្ហាញនិងសេចក្តីរាយការណ៍សង្ខេប
វេទិកាបានចាប់ផ្តើមធ្វើបទបង្ហាញនិងពិភាក្សា ដូចបានគ្រោងទុកខាងក្រោម៖
១. “ខ្សែច្រវាក់តម្លៃកៅស៊ូនៅកម្ពុជា” ដោយលោក គុយ ភក្តី អនុប្រធាននាយកដ្ឋានទីផ្សារនិងសហប្រតិបត្តិការអន្តរជាតិ
២.“វឌ្ឍនភាពសហគមន៍កសិកម្មកៅស៊ូគ្រួសារខេត្តស្ទឹងត្រែង” ដោយលោក សៀ ហេង ប្រធានសហគមន៍កសិកម្មកៅស៊ូគ្រួសារខេត្តស្ទឹងត្រែង
៣.“វឌ្ឍនភាពសហគមន៍កសិកម្មកៅស៊ូគ្រួសារខេត្តរតនគិរី” ដោយលោក សេវ ថ្វាន ប្រធានសហគមន៍កសិកម្មកៅស៊ូគ្រួសារខេត្តរតនគិរី
៤.“វឌ្ឍនភាពសហគមន៍កសិកម្មកៅស៊ូគ្រួសារសារខេត្តមណ្ឌលគិរី” ដោយលោក តេះ សេន ប្រធានសហគមន៍កសិកម្មកៅស៊ូគ្រួសារខេត្តមណ្ឌលគិរី
៥.“ស្ថានភាពសហគ្រាសខាតថាយអឺរ ឯ.ក” ដោយកញ្ញា PAN YU YUAN ប្រធានផ្នែកបញ្ជាទិញនិងទីផ្សារ
៦.“ស្ថានភាពរោងចក្រ RMKH Glove” ដោយ លោក WILUOM CHATH ប្រធានគ្រប់គ្រងរោងចក្រ។
ថ្ងៃទី២៣ ខែធ្នូ ឆ្នាំ២០២៣
សិក្ខាកាមទាំងអសើបានទស្សនៈកិច្ចនៅសហគ្រាសខាតថាយអឺរ និងរោងចក្រផលិតស្រោមដៃ RMKH Glove ដើម្បីសិក្សាស្វែងយល់បន្ថែមអំពីខ្សែ ច្រវាក់ផលិតកម្មរបស់រោងចក្រនីមួយៗ ប្រកដោយបរិយាកាសរីករាយ។
2.លទ្ធផល
បន្ទាប់ពីវេទិកានិងទស្សនកិច្ចសិក្សាបានប្រព្រឹត្តទៅអស់រយៈពេល២ថ្ងៃ អ្នកផ្គត់ផ្គង់និងអ្នកប្រើប្រាស់កៅស៊ូធម្មជាតិ ព្រមទាំងអ្នកពាក់ព័ន្ធបានជួបជុំពិភាក្សាគ្នា ផ្លាស់ប្ដូរមតិយោបល់និងចែករំលែបទពិសោធន៍ទទួលបានលទ្ធផល ដូចខាងក្រោម៖
១.សហគមន៍កសិកម្មកៅស៊ូគ្រួសារបានស្វែងយល់ពីតម្រូវការផលិតផលកៅស៊ូដុំនិងកៅស៊ូសន្លឹក ដែលសហគ្រាសប្រើប្រាស់ជាវត្ថុធាតុដើមកែច្នៃសំបកកង់យានយន្តនាពេលបច្ចុប្បន្ន។
២.រោងចក្រកម្មន្តសាលបានស្វែងយល់ពីប្រព័ន្ធទីផ្សារកៅស៊ូក្នុងស្រុក និងត្រៀមខ្លួនក្នុងការប្រមូលទិញផលិតផលកៅស៊ូដើម្បីសម្រេចបាន៖
- ឆ្នាំ២០២៣នេះ សហគ្រាសខាតថាយអឺរបានប្រើប្រាស់កៅស៊ូធម្មជាតិក្នុងស្រុកចំនួន ៣០ ៤៥២តោន (ក្នុងនោះមាន CSR 10 ចំនួន ៣០ ៣០៥ តោន និងកៅស៊ូ RSS3 ចំនួន ១៤៧តោន)
- ឆ្នាំ២០២៤ខាងមុខសហគ្រាសនឹងប្រើប្រាស់កៅស៊ូក្នុងស្រុកចំនួន ៤៥ ០០០តោន
- ឆ្នាំ២០២៥ សហគ្រាសនឹងប្រើប្រាស់កៅស៊ូក្នុងស្រុកចំនួន ៨០ ០០០ - ៩០ ០០០តោន ក្នុងករណីសហគ្រាសសាងសង់រោងចក្រកែច្នៃសំបកកង់ប្រភេទរថយន្តទេសចរណ៍ទី៣ រួចរាល់ក្នុងឆ្នាំ២០២៤។
៣.ប្រតិបត្តិករកៅស៊ូបានស្វែងយល់អំពីចំណុខ្វះខាតរៀងៗខ្លួន ដើម្បីបំពេញលក្ខខណ្ឌតម្រូវឲ្យគ្នាទៅវិញទៅមក។
៤.កសាងភាពជិតស្និទ្ធនិងជឿទំនុកចិត្តគ្នារវាងអ្នកផ្គត់ផ្គង់និងអ្នកប្រើប្រាស់ក្នុងការធ្វើធុរកិច្ចប្រកបដោយ ប្រសិទ្ធិភាពសេដ្ឋកិច្ចខ្ពស់។
៥.ជួយជំរុញសកម្មភាពក្នុងអនុវិស័យកៅស៊ូឲ្យមានការអភិវឌ្ឍប្រកបដោយចីរភាពនិងលើកកម្ពស់ជីវភាពរបស់កសិករកៅស៊ូគ្រួសារឲ្យកាន់តែ ប្រសើរឡើង។
៦.ទទួលបានធាតុចូលសំខាន់ៗជាមូលដ្ឋានរៀបចំប្រព័ន្ធទីផ្សារកៅស៊ូក្នុងស្រុកប្រកបដោយនិរន្តរភាព៕
