ព័ត៌មានចុងក្រោយ
យោងតាមរបាយការណ៍របស់សមាគម ANRPC បានបង្ហាញថាទស្សនវិស័យនៃផលិតកម្មកៅស៊ូធម្មជាតិពិភពលោក (NR) ក្នុងឆ្នាំ២០២៣ ត្រូវបានគេរំពឹងថានឹងកើនឡើង ៣,៥% ដែលមានបរិមាណសរុបចំនួន ១៥,១៤៥លានតោន បើធៀបនឹងឆ្នាំមួយឆ្នាំ។ ចំណែកឯតម្រូវការកៅស៊ូធម្មជាតិពិភពលោកវិញត្រូវបានព្យាករណ៍ថា នឹងទាបជាងឆ្នាំមុនបន្តិចដែលមានបរិមាណចំនួន ១៥,៤៣៨លានតោន។
សម្រាប់ផលិតកម្មធម្មជាតិពិភពលោកក្នុងខែវិច្ឆិកាបានកើនឡើង ០,៧% ដែលបរិមាណមានចំនួន ១,៥៧៥លានតោន ធៀបនឹងខែមុនដែលមានបរិមាណចំនួន ១,៥៦៤លានតោន។ ប្រទេសផលិតកៅស៊ូធម្មជាតិបែបប្រពៃណីដូចជា៖ ប្រទេសថៃ ឥណ្ឌូនេស៊ី វៀតណាម ម៉ាឡេស៊ី និងមីយ៉ាន់ម៉ាឃើញថាមានការថយចុះផលិតកម្ម ដោយសារមានភ្លៀងធ្លាក់ខ្លាំងដែលបានរំខានដល់ការចៀរជ័រ ដោយបានកាត់បន្ថយផលិតកម្មកៅស៊ូក្នុងរដូវផលិតកំពូលនេះ។ ចំណែកឯតម្រូវការកៅស៊ូពិភពលោកមានចំនួន ១,៥៧៥លានតោន បានកើនឡើង ៥,៣% បើធៀបនឹងឆ្នាំមុន។
ស្ថានភាពកៅស៊ូធម្មជាតិនៅប្រទេសកម្ពុជានៅខែវិច្ឆិកា ឆ្នាំ២០២៣ បានបង្ហាញថាផ្ទៃដីកៅស៊ូសរុបមាន ៤០៤ ៥៧៨ហិកតា ក្នុងនោះផ្ទៃដី ចៀរជ័រចំនួន ៣១៥ ៣៣២ហិកតា ស្មើនឹង ៧៨% និងផ្ទៃដីថែទាំចំនួន ៨៩ ២៤៦ហិកតា ស្មើនឹង២២%។ ក្នុងខែនេះបរិមាណផលិតផលសរុបមានចំនួន ៥១ ៦៨២តោន បានកើនឡើងចំនួន ១០ ៥៣០តោន (=+២៦%) បើធៀបនឹងខែមុន និងបានកើនឡើងចំនួន ១៣០តោន (=+០,២៥%) ធៀបនឹងរយៈពេលដូចគ្នានៃឆ្នាំមុន។ គិតត្រឹមរយៈពេល១១ខែ បរិមាណផលិតផលសរុបមានចំនួន ៣៣៤ ៨៨៣តោន បានកើនឡើងចំនួន ៥ ៥២៧តោន (=+១,៧%) ធៀបនឹងរយៈពេលដូចគ្នានៃឆ្នាំមុន។ ក្នុងខែនេះបរិមាណបញ្ចេញលក់មានចំនួន ៥០ ៣៤៧តោន បានថយចុះចំនួន ៩ ១៧១តោន (=+២២,៣%) ធៀបនឹងខែមុននិងបានកើនឡើងចំនួន ២ ២២៨តោន (=+៥%) ធៀបនឹងរយៈពេលដូចគ្នានៃឆ្នាំមុន។ ត្រឹមរយៈពេល១១ខែបរិមាណបញ្ចេញលក់មានចំនួន ៣៣៤ ១៧៦តោន បានកើនឡើងចំនួន ១១ ៥៩០ តោន (=+៤%) ធៀបនឹងរយៈពេលដូចគ្នានៃឆ្នាំមុន។ ក្នុងខែនេះ ថ្លៃលក់ជាមធ្យមស្មើនឹង ១ ៣៦៥US$/តោន បានកើនឡើងចំនួន ១៣ US$/តោន ស្មើនឹង (=+០,៩%) ធៀបនឹងខែមុន និងបានកើនឡើងចំនួន១៣៤US$/តោន (=+១១%) ធៀបនឹងរយៈពេលដូចគ្នានៃឆ្នាំមុន៕