ព័ត៌មានចុងក្រោយ
ការកើនឡើងនៃភាពតានតឹងភូមិសាស្ត្រនយោបាយនិងលក្ខខណ្ឌអាកាសធាតុមិនល្អ ជាពិសេសក្នុងរដូវខ្យល់មូសុងក្នុងបណ្តាប្រទេសផលិតកៅស៊ូធម្មជាតិ (NR) ដូចជាប្រទេសថៃបានដើរតួនាទីយ៉ាង សំខាន់លើការប្រែប្រួលទីផ្សារ។ ការកើនឡើងទឹកភ្លៀងនាំឲ្យមានទឹកជំនន់ភ្លាមៗ និងការកាប់បំផ្លាញព្រៃឈើ ជាពិសេសនៅក្នុងប្រទេសថៃបានជះឥទ្ធិពលអាក្រក់ដល់ផលិតកម្មកៅស៊ូ។ កត្តាទាំងនេះបានជំរុញឱ្យតម្លៃកៅស៊ូ កើនឡើងលើសពី ១,៣០ដុល្លារ/គីឡូក្រាម ដោយសារក្តីបារម្ភនៃការផ្គត់ផ្គង់លើសក្នុងអំឡុងពេលនេះ។
ស្ថានភាពកៅស៊ូធម្មជាតិនៅប្រទេសកម្ពុជានៅខែកញ្ញា ឆ្នាំ២០២៣ បានបង្ហាញថាផ្ទៃដីកៅស៊ូសរុបមាន ៤០៤ ៥៧៨ហិកតា ក្នុងនោះផ្ទៃដី ចៀរជ័រចំនួន ៣១៥ ៣៣២ហិកតា ស្មើនឹង ៧៨% និងផ្ទៃដីថែទាំចំនួន ៨៩ ២៤៦ហិកតា ស្មើនឹង២២%។ ក្នុងខែនេះ បរិមាណផលិតផលសរុបមានចំនួន ៣៧ ១៣០តោន បានកើនឡើងចំនួន ២ ៦០៣តោន (=+៨%) ធៀបនឹងខែមុន និងបានកើនឡើងចំនួន ៧១៧តោន (=២%) ធៀបនឹងរយៈពេលដូចគ្នានៃឆ្នាំមុន។ រហូតមកដល់នព្វមាសនេះ បរិមាណផលិតផលសរុបមានចំនួន ២៤១ ៧៥៤តោន បានកើនឡើងចំនួន ៦ ៩៣៧តោន (=+២%) បើធៀបនឹងរយៈពេលដូចគ្នានៃឆ្នាំមុន។ ក្នុងខែនេះបរិមាណបញ្ចេញលក់មានចំនួន ៣៧ ១៣៧តោន បានកើនឡើងចំនួន ២ ៩៣៨តោន (=-+៨,៥៩%) ធៀបនឹងខែមុន និងបានកើនឡើងចំនួន ១ ៨៥០តោន (=+៥%) បើធៀបនឹងរយៈពេលដូចគ្នានៃឆ្នាំមុន។ បរិមាណបញ្ចេញលក់រយៈពេល៩ខែ មានចំនួន ២៤២ ៣០៤តោន បានកើនឡើងចំនួន ៨ ២០៤តោន (=+៣,៥%) ធៀបនឹងរយៈពេលដូចគ្នានៃឆ្នាំមុន។ ក្នុងខែនេះថ្លៃលក់ជាមធ្យមស្មើនឹង ១ ៣០៤US$/តោន បានកើនឡើងចំនួន ២៧US$/តោន ស្មើនឹង (=+២,១២%) ធៀបនឹងខែមុន និងបានថយចុះចំនួន ៦US$/តោន (=-០,៥%) ធៀបនឹងរយៈពេលដូចគ្នានៃឆ្នាំមុន។ ថ្លៃលក់រយៈពេល៩ខែ ជាមធ្យមស្មើនឹង ១ ៣២៣US$/តោន បានថយចុះ ១៩៦US$/តោន (=-១៣%) ធៀបនឹងរយៈពេលដូចគ្នាក្នុងឆ្នាំ២០២២៕