ព័ត៌មានចុងក្រោយ
នៅខែសីហា ឆ្នាំ២០២៣នេះ ទីផ្សារកៅស៊ូធម្មជាតិ (NR) មានភាពមិនប្រក្រតីដោយសារភាពតានតឹងផ្នែកភូមិសាស្ត្រនយោបាយដែលកំពុងបន្ត និងការកើនឡើងនៃអត្រាការប្រាក់នាពេលថ្មីៗនេះ របស់ធនាគារកណ្តាលសហព័ន្ធ។ ផលិតកម្មកៅស៊ូធម្មជាតិពិភពលោកបានកើនឡើង ៤,២% នៃមូលដ្ឋានប្រចាំឆ្នាំ ចំណែកឯតម្រូវការកៅស៊ូធម្មជាតិពិភពលោកវិញបានកើនឡើងតែ ០,២% ប៉ុណ្ណោះ។
បន្ថែមពីក្តីបារម្ភដែលកំពុងមានស្រាប់ ជាមួយនឹងការអភិវឌ្ឍន៍ពិភពលោកនិងកំណើនសេដ្ឋកិច្ចក្នុងបណ្តាប្រទេសប្រើប្រាស់សំខាន់ៗ ចំពេលដែលកត្តាខាងក្រៅមិនអំណោយផលផ្សេងៗទៀត នៅដើមខែសីហាអតុល្យភាពនៃកំណើនរវាងផលិតកម្មនិងតម្រូវការកៅស៊ូធម្មជាតិពិភព- លោកបានបង្កបញ្ហាប្រឈម ចំពោះទីផ្សារទិញលក់តាមកិច្ចសន្យានិងទីផ្សារទិញលក់ភ្លាមៗនៅទូទាំងប្រទេស។
ក្នុងអំឡុងខែសីហា ឆ្នាំ២០២៣ ផ្ទៃដីកៅស៊ូធម្មជាតិកម្ពុជាសរុបមានចំនួន ៤០៤ ៥៧៨ហិកតា ក្នុងនោះផ្ទៃដីចៀរជ័រមានចំនួន ៣១៥ ៣៣២ ហិកតា ស្មើនឹង ៧៨% និងផ្ទៃដីថែទាំចំនួន ៨៩ ២៤៦ហិកតា ស្មើនឹង២២%។ បរិមាណផលិតផលសរុបមានចំនួន ៣៤ ៤០៥តោន បានកើនឡើងចំនួន ៣ ០៩២តោន (=+១០%) ធៀបនឹងខែមុន និងបានកើនឡើងចំនួ ន៣ ៨៩៦តោន (=+១៣%) បើធៀបនឹងរយៈពេលដូចគ្នានៃឆ្នាំមុន។ ក្នុងអំឡុងខែមករា - ខែសីហា បរិមាណផលិតផលសរុបមានចំនួន ២០៤ ៥០២តោន បានកើនឡើងចំនួន ៦ ០៩៨តោន (=+៣,១%) បើធៀបនឹងរយៈពេលដូចគ្នានៃឆ្នាំមុន។ បរិមាណបញ្ចេញលក់មានចំនួន ២០៥ ១៦៧តោន បានកើនឡើងចំនួន ៦ ៣៥៤តោន (=+៣%) ធៀបនឹងរយៈពេលដូចគ្នានៃឆ្នាំមុន។ ថ្លៃលក់ជាមធ្យមគឺ ១ ២៧៧US$/តោន បានថយចុះចំនួន ២៧US$/តោន ស្មើនឹង (=-២,០៣%) បើធៀបនឹងខែមុន និងបានថយចុះចំនួន ១៥៣US$/តោន (=-១១%) ធៀបនឹងរយៈពេលដូចគ្នានៃឆ្នាំមុន៕