ព័ត៌មានចុងក្រោយ
សម្រាប់ខែធ្នូនេះ ស្ថានភាពកៅស៊ូធម្មជាតិនៅប្រទេសកម្ពុជាបានបង្ហាញថា ផ្ទៃដីកៅស៊ូសរុបមានចំនួន៤០៤ ៥៧៨ហិកតា ក្នុងនោះផ្ទៃដីចៀរជ័រចំនួន៣១៥ ៣៣២ហិកតា ស្មើនឹង៧៨% និងផ្ទៃដីថែទាំចំនួន៨៩ ២៦៤ហិកតា ស្មើនឹង២២%។ ក្នុងខែនេះ បរិមាណផលិតផលសរុបមានចំនួន៥៣ ០១៩តោន បានកើនឡើងចំនួន១ ៤៦៧តោន (=+៣%) ធៀបនឹងខែមុននិងបានកើនឡើងចំនួន២ ១២៨តោន (=+៤%) ធៀបនឹងខែដូចគ្នាក្នុងឆ្នាំ២០២១។ រហូតមកដល់ខែនេះ បរិមាណផលិតផលសរុបមានចំនួន៣៨២ ០០០តោន បានកើនឡើងចំនួន១៤ ០០០តោន (=+៤%) ធៀបនឹងរយៈពេលដូចគ្នាក្នុងឆ្នាំ២០២១។ ក្នុងខែនេះ បរិមាណបញ្ចេញលក់មានចំនួន៥០ ៣១៤តោន បានកើនឡើងចំនួន២ ១៩៥តោន (=+៥%) ធៀបនឹងខែមុន និងបានយចុះចំនួន២ ៥៣៩តោន (=-៥%) ធៀបនឹងខែដូចគ្នាក្នុងឆ្នាំ២០២១។ រហូតមកដល់ខែនេះ បរិមាណបញ្ចេញលក់មានចំនួន៣៧២ ៩០០តោន បានកើនឡើងចំនួន៦ ៦០០តោន (=+២%) ធៀបនឹងរយៈពេលដូចគ្នាក្នុងឆ្នាំ២០២១។ ក្នុងខែនេះថ្លៃលក់ជាមធ្យមស្មើនឹង១ ២៣១US$/តោន មិនមានការកើនឡើងទេ បើធៀបនឹងខែមុន ប៉ុន្តែបានថយចុះចំនួន២៧៥US$/តោន (=-១៨%) ធៀបនឹងខែដូចគ្នាក្នុងឆ្នាំ២០២១។ រហូតមកដល់ខែនេះ ថ្លៃលក់ជាមធ្យមស្មើនឹង១ ៤១៥US$/តោន បានថយចុះ២២៥US$/តោន (=-១៤%) ធៀបនឹងរយៈពេលដូចគ្នាក្នុងឆ្នាំ២០២១។
យោងតាមរបាយការណ៍ប្រចាំខែធ្នូ ឆ្នាំ២០២២ របស់សមាគមបណ្តាប្រទេសផលិតកៅស៊ូធម្មជាតិ (ANRPC) បានបង្ហាញថា ផលិតកម្មកៅស៊ូធម្មជាតិពិភពលោកដែលបានចុះបញ្ជីមានកំណើន ០,១% ដោយមានបរិមាណចំនួន១,៣៧៩លានតោន នេះជាកំណើនយឺតបំផុតនៅក្នុងផលិតកម្មប្រចាំឆ្នាំ។ ផ្ទុយទៅវិញ តម្រូវការកៅស៊ូធម្មជាតិពិភពលោកបានកើនឡើងក្នុងល្បឿនលឿនជាងគឺ ២,៥% ដែលមានបរិមាណចំនួន១,៣១១លានតោនក្នុងអំឡុងពេលយោងដូចគ្នានេះ។ ទីផ្សារទិញលក់ភ្លាមៗនិងទីផ្សារទិញលក់តាមកិច្ចសន្យាក៏ដំណើរការល្អប្រសើរផងដែរ ដោយសារតែថ្លៃកៅស៊ូឡើងខ្ពស់ជាងខែមុនៗ។
ថ្លៃកៅស៊ូនៅឆ្នាំ២០២២ បានកើនឡើងនិងធ្លាក់ចុះ ដោយសារតែជំងឺរាតត្បាតកូវិដ-19 និងភាពតានតឹងភូមិសាស្រ្តនយោបាយរវាងរុស្សីនិងអ៊ុយក្រែន បានបន្តបង្កបញ្ហាប្រឈមសម្រាប់សេដ្ឋកិច្ចពិភពលោក ហេតុនេះយើងក៏មិនអាចដោះស្រាយបាននៅឆ្នាំ២០២៣ដែរ។ ការធ្លាក់ចុះនៃសេដ្ឋកិច្ចអាចត្រូវបានគេសង្កេតឃើញនៅបណ្តាប្រទេសដែលមានសេដ្ឋកិច្ចកំពូលមួយចំនួននៅដើមឆ្នាំនេះ។ អ្នកសេដ្ឋកិច្ចភាគច្រើនកំពុងព្យាករថា សេដ្ឋកិច្ចនិងពាណិជ្ជកម្មពិភពលោកនៅឆ្នាំ២០២៣ នឹងក្លាយជាឆ្នាំដ៏លំបាកជាងឆ្នាំ២០២២ ដោយសារតែការរឹតបន្តឹងគោលនយោបាយរូបិយវត្ថុដោយធនាគារកណ្តាលភាគច្រើន ការកើនឡើងថ្លៃជីវភាពនិងបញ្ហាបំណុល ការរំខានដែលបណ្តាលមកពីភូមិសាស្រ្តនយោបាយ និងជម្លោះហានិភ័យដែលអាចកើតមាននៃរលកមួយផ្សេងទៀតនៃជំងឺរាតត្បាតកូវិត-19។ ជាលទ្ធផល ធនាគារពិភពលោកក៏បានកាត់បន្ថយការព្យាកររបស់ខ្លួនសម្រាប់ឆ្នាំ២០២៣ គឺកំណើនសេដ្ឋកិច្ចពិភពលោកមានត្រឹមតែ ១,៧% បើធៀបនឹងការចេញកាលពី៦ខែមុន គឺ៣%៕