ព័ត៌មានចុងក្រោយ
ចាប់ពីថ្ងៃទី១៣ - ១៥ ខែធ្នូ ឆ្នាំ២០២២ នាយកដ្ឋានផែនការ ហិរញ្ញវត្ថុ និងស្ថិតិ នៃអគ្គនាយកដ្ឋានកៅស៊ូបានរៀបចំវគ្គសិក្ខាសាលាស្ដីពី “ការ វិវត្តកៅស៊ូធម្មជាតិ” នៅសណ្ឋាគារដំរីជាន់ខ្លាវល្លិ៍មាសទីរួមខេត្ដកំពង់ធំ ក្រោមអធិបតីភាពលោកបណ្ឌិត អូន សុវណ្ណ អគ្គនាយករង នៃអគ្គនាយកដ្ឋានកៅស៊ូ និងលោក ដៀប ពិសិដ្ឋ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ព្រមទាំងមានការអញ្ជើញចូលរួមពីមន្រ្តីអគ្គនាយកដ្ឋានកៅស៊ូ មន្ត្រីការិយាល័យកៅស៊ូតាមខេត្ត និងនិយោជិកក្រុមហ៊ុនចំការកៅស៊ូកសិឧស្សាហកម្មសរុបចំនួន២៥នាក់ (ស្រី ២នាក់)។
វគ្គសិក្ខាសាលានេះ មានគោលបំណងដើម្បីបង្កើននិងពង្រឹងចំណេះដឹងដល់មន្ត្រីរាជការនិងនិយោជិកក្រុមហ៊ុនអំពីការប្រមើលសេដ្ឋកិច្ចកៅស៊ូនៅបរិការណ៍វិបត្ដិពិភពលោកនិងការវិភាគទិន្នន័យ កៅស៊ូដោយប្រើកម្មវិធី Excel។
ជាកិច្ចចាប់ផ្តើម លោក ដៀប ពិសិដ្ឋ បានសំដែងនូវកិច្ចស្វាគមន៍ដល់គណៈអធិបតីនិងសិក្ខាកាមទាំងអស់ ព្រមទាំងបានថ្លែងអំណរគុណដល់អគ្គនាយកដ្ឋានកៅស៊ូ ទោះបីជាបញ្ហាជំងឺ Covid-19 នៅតែជាបញ្ហាប្រឈមក៏ដោយ ក៏នៅតែបន្ដការខិតខំយកចិត្តទុកដាក់ក្នុងការពង្រឹងសមត្ថភាពដល់មន្ត្រីរាជការការិយាល័យកៅស៊ូតាមបណ្តាខេត្ត និងក្រុមហ៊ុនចម្ការកៅស៊ូកសិ-ឧស្សាហកម្ម ឱ្យទទួលបានចំណេះដឹងថ្មីៗបន្ថែមទៀត។ លើសពីនេះទៅទៀតលោកក៏បានលើកពីសក្ដានុពលដំណាំកៅស៊ូក្នុងខេត្តកំពង់ធំ ដែលបានចូលរួមយ៉ាងសកម្មក្នុងការបង្កើតការងារនិងផ្ដល់ចំណូលដល់ប្រជាពលរដ្ឋ ព្រមទាំងបញ្ហាប្រឈមដែលកសិករកៅស៊ូគ្រួសារជួបប្រទះផងដែរ។
បន្ទាប់មក លោក ទី រិត្ថា អនុប្រធាននាយកដ្ឋានផែនការ ហិរញ្ញវត្ថុ និងស្ថិតិបានសំដែងនូវកិច្ចស្វាគមន៍ដល់គណៈអធិបតីនិងសិក្ខាកាមទាំងអស់ និងបានជម្រាបជូនអំពីគោលបំណងនៃវគ្គសិក្ខាសាលានិងអត្ថប្រយោជន៍ដំណាំកៅស៊ូ ព្រមទាំងរាយការណ៍នូវទិន្នន័យកៅស៊ូកម្ពុជានៅរយៈ- ពេល១១ខែ ឆ្នាំ២០២២នេះ មានផ្ទៃដីសរុបចំនួន៤០៤ ៥៧៨ ហិកតា (ផ្ទៃដីចៀរជ័រ៣១៥ ៣៣២ហិកតា និងផ្ទៃដីថែទាំ៨៩ ២៤៦ ហិកតា) ដែលក្នុងនោះផ្ទៃដីក្រុមហ៊ុនកៅស៊ូកសិ-ឧស្សាហកម្មសរុបមានចំនួន២៣៩ ៤២២ហិកតា ស្មើនឹង៦០% និងផ្ទៃដីកៅស៊ូគ្រួសារសរុបមានចំនួន១៦៥ ១៥៦ហិកតា ស្មើនឹង៤០%។ ផលិតផលកៅស៊ូសម្រេចបានសរុបចំនួន៣២៨ ៩៨១តោន ដែលបរិមាណនៃការនាំចេញជ័រកៅស៊ូសម្រេចបានសរុបចំនួន៣២២ ៥៨៦ តោន និងការនាំចេញឈើកៅស៊ូសម្រេចបានចំនួន២៤ ៩៨៩ម៣ ដោយទទួលបានចំណូលជាទឹកប្រាក់សរុបប្រមាណជាង៤៦៩ ៧០២ ៦២៨លានដុល្លារសហរដ្ឋអាម៉េរិក (ចំណូលជ័កៅស៊ូចំនួន៤៦៥ ៨៣៨ ៣៨៨ដុល្លារសហរដ្ឋអាម៉េរិក និងចំណូលពីឈើកៅស៊ូចំនួន៣ ៨៦៤ ២៤០ដុល្លារសហរដ្ឋអាម៉េរិក)។ កៅស៊ូថ្លៃជាមធ្យម១ ៤៤៤ដុល្លារសហរដ្ឋអាម៉េរិក/តោន និងឈើកៅស៊ូថ្លៃជាមធ្យមចំនួន១៩៦ដុល្លារសហរដ្ឋអាម៉េរិក/ម៉ែត្រគូប។
ជាកិច្ចបន្ទាប់ លោកបណ្ឌិត អូន សុវណ្ណ បានមានមតិសំណេះសំណាលនិងប្រកាសបើកវគ្គសិក្ខាសាលា ដោយបានលើកឡើងអំពីអត្ថប្រយោជន៍នៃដំណាំកៅស៊ូធៀបទៅនឹងដំណាំផ្សេងៗនិងស្ថានភាពរីកចម្រើននៃវិស័យនេះ ដោយសារប្រទេសកម្ពុជាមានស្ថានភាពនយោបាយនិងសន្តិសុខល្អប្រសើរ សក្តានុពលនៃដីសមស្រប និងគោលនយោបាយទីផ្សារសេរីលើការលក់ដូរផលិតផលកៅស៊ូគ្រួសារក្នុងស្រុក។ ទន្ទឹមនឹងការរីកចម្រើនអនុវិស័យនេះ ការគ្រប់គ្រងនិងការតាមដានការវិវត្តកៅស៊ូធម្មជាតិ ក៏ជាជារឿងចាំបាច់ដែលត្រូវយកចិត្តទុកដាក់ ដើម្បីទទួលបានធាតុចូលជាក់លាក់សម្រាប់រៀបចំគោលនយោបាយ និងផែនការយុទ្ធសាស្រ្តអភិវឌ្ឍន៍រយៈពេលខ្លីនិងវែង សំដៅការអភិវឌ្ឍវិស័យកៅស៊ូកម្ពុជាប្រកបដោយនិរន្តរភាព។ វគ្គសិក្ខាសាលានេះរំពឹងថា នឹងផ្ដល់ជូនសិក្ខាកាមនូវចំណេះដឹងពីការប្រមើលសេដ្ឋកិច្ចកៅស៊ូនៅក្នុងបរិការណ៍ វិបត្ដិពិភពលោកនិងការវិភាគទិន្នន័យកៅស៊ូ ដោយប្រើកម្មវិធី Excel។ ជាចុងក្រោយ លោកក៏បានផ្តាំផ្ញើដល់សិក្ខាកាមទាំងអស់ឱ្យយកចិត្តទុកដាក់ស្តាប់និងលើកឡើងនូវសំនួរដែលខ្លួនមាន ដើម្បីទទួលបាននូវចំណេះដឹងនិងបទពិសោធន៍ពីវគ្គសិក្ខាសាលានេះទៅអនុវត្តនិងចែករំលែកបន្ដ។
វគ្គសិក្ខាសាលារយៈពេលបីថ្ងៃនេះ បានចាប់ដំណើរការតាមកម្មវិធីដែលបានគ្រោងទុករួមមាន៖ ការធ្វើបទបង្ហាញដោយលោកបណ្ឌិត អូន សុវណ្ណ ពាក់ព័ន្ធនឹង៖
ក. “ការប្រមើលសេដ្ឋកិច្ចកៅស៊ូនៅបរិការណ៍ វិបត្ដិពិភពលោក” ៖
១.សេចក្តីផ្តើម
២.កត្ដាមានឥទ្ធិពលលើតម្លៃកៅស៊ូ
៣.ការប្រមើលអនាគតកៅស៊ូធម្មជាតិ
៤.សន្និដ្ឋាន
ខ.“ទិន្នន័យកៅស៊ូសំខាន់” ៖
១.សេចក្តីផ្តើម
២.ការរៀបចំស្ថិតិ
៣.សន្និដ្ឋាន
គ. “ការសរុបសង្ខេបទិន្នន័យកៅស៊ូតាម Pivot Table” ៖
១. សេចក្តីផ្តើម
២. ជំហានអនុវត្ដ
ឃ. “ការដកស្រង់ទិន្នន័យដោយ Slicer” ៖
១. សេចក្តីផ្តើម
២. ជំហានអនុវត្ដ
ង. “ការបង្ហាញលទ្ធផលដោយផ្ទាំងសរុប Dash- board”៖
១. សេចក្ដីផ្ដើម
២. ជំហានអនុវត្ដ
សន្និដ្ឋាន
សិក្ខាសាលានេះបានសម្រេចទៅដោយរលូន ដោយមានការបកស្រាយ ពន្យល់យ៉ាងក្បោះក្បាយពីវាគ្មិន និងមានការចូលរួមយ៉ាងសកម្មពីសិក្ខាកាមទាំងអស់។ ព្រមទាំងបានផ្ដល់នូវអត្ថប្រយោជន៍និងការយល់ដឹងជាច្រើនដល់សិក្ខាកាមដូចជា របៀបបង្កើតទម្រង់បញ្ចូលទិន្នន័យក្នុង Excel ការសរុបទិន្នន័យ PivotTable ការរៀបចំវិធីដកស្រង់ទិន្នន័យដោយ Slicer និងការបង្ហាញលទ្ធផលដោយផ្ទាំងសរុប Dashboard និងគន្លឹះសំខាន់ៗបន្ថែមទៀត។ ជាងនេះទៅទៀត កម្មវិធីសិក្ខាសាលានេះក៏បានផ្ដល់ឱកាសដល់សិក្ខាកាមដែលចូលរួមបានផ្លាស់ប្ដូរ និងចែករំលែកបទពិសោធន៍ជាក់ស្ដែងកន្លងមកនិងបានអនុវត្ដផ្ទាល់ផងដែរ និងខិតខំយកចិត្តទុកដាក់អនុវត្តតាមវិធានការ៣កុំ-៣ការពារ និងការណែនាំផ្សេងៗ របស់ក្រសួងសុខាភិបាលក្នុងការទប់ស្កាត់ និងបង្កាជំងឺកូវីដ-១៩ ទោះបីជាបានធ្វើការចាក់វ៉ាក់សាំងពេញលេញក៏ដោយ។
សំណូមពរ
សិក្ខាកាមបានសំណូមពរមកកាន់ក្រុមការងារ រួមមាន៖
