គណៈរដ្ឋមន្ត្រីថៃបានយល់ព្រមអនុម័តថវិកាប្រហែល២២៣លានដុល្លារ ដើម្បីធានាថ្លៃកៅស៊ូ​សម្រាប់កសិករដែលបានចុះបញ្ជីចំនួន១,៦លាន​គ្រួសារ ហើយផែនការនេះគឺជាដំណាក់កាលទី៤ នៃ​កម្មវិធីដែលកំពុងដំណើរការ និងសន្យាថានឹងបែង​ចែកប្រាក់ចំណូលរវាងអ្នកចៀរនិងម្ចាស់​ចម្ការកៅស៊ូ ពី៤០ ទៅ ៦០%។

យោង​តាម​គណៈកម្មាធិការ​ជាតិ​កៅស៊ូ​បាន​ឲ្យដឹង​ថា ​ការធានាថ្លៃកៅស៊ូសម្រាប់រដូវកាលឆ្នាំ២០២២-២០២៣ សម្រាប់កសិករកៅស៊ូចំនួន១,៦​ លានគ្រួសារ​ ជាមួយនឹងផ្ទៃដីដាំកៅស៊ូចំនួន២,៩លាន​ហិកតា។ ម្ចាស់​ចម្ការកៅស៊ូនិង​កម្មករសរុប​មាន​​ចំនួន១,៣៧លាន​នាក់ ក្នុងនោះកម្មករ​កៅស៊ូមានចំនួន២៣១ ៥១៤នាក់។

កម្មវិធីគម្រោង​សម្រាប់​កសិករនេះនឹងទទួលបានសំណង ​ប្រសិនបើ​តម្លៃ​ទីផ្សារ​កៅស៊ូ​ធ្លាក់​ចុះ​ក្រោម​តម្លៃ​គោល។

កសិករត្រូវបានផ្តល់ជូនការធានាតម្លៃអតិបរមានៃកៅស៊ូសន្លឹកគឺ១,៧៦$/គ.ក្រ ទឹកជ័រ១,៦៧$/គ.ក្រ និងជ័រចាន០,៦៧$/គ.ក្រ ដែលបានកំណត់ ត្រឹម ៤ហិកតា/គ្រួសារ។

កម្មវិធីនេះ ត្រូវបានគ្រប់គ្រងដោយធនាគាររដ្ឋសម្រាប់វិស័យកសិកម្មនិងសហគមន៍កសិកម្ម។

នាយករដ្ឋមន្ត្រី Prayut Chan-o-cha បានលើកឡើងនាពេលថ្មីៗនេះថា ការដោះស្រាយការធ្លាក់ថ្លៃដំណាំនៅតែជាអាទិភាពមួយ ខណៈដែលរដ្ឋាភិបាលកំពុងព្យាយាមរកដំណោះស្រាយដ៏ល្អបំផុត។

នៅថ្ងៃទី១៩ ខែកុម្ភៈ នាយករដ្ឋមន្ត្រីបានលើកឡើងក្នុងអំឡុងពេលដំណើរទស្សនកិច្ចទៅកាន់ខេត្ត Nakhon Si Thammarat ថាថ្លៃកៅស៊ូ​ទាប​គឺ​ជា​បញ្ហា​សំខាន់​បំផុត​។ ផលិតផលកៅស៊ូរបស់យើងភាគច្រើនត្រូវបាននាំចេញ ដោយរក្សាទុកត្រឹមតែ១/៣សម្រាប់ប្រើប្រាស់ក្នុងស្រុក។ យើងត្រូវតែគិតថា តើផលិតផលចំនួនពីរភាគបីអាចប្រើប្រាស់ក្នុងប្រទេសនេះយ៉ាងដូចម្តេច? ដើម្បីទទួលបានតម្លៃកើនឡើង។ រដ្ឋាភិបាល​បាន​ចំណាយ​ថវិកា​ជាតិចំនួន៣០% ​ដើម្បី​ដោះស្រាយ​ការ​ធ្លាក់​ចុះ​​ថ្លៃដំណាំគ្រប់​ប្រភេទ ហើយ​​នឹង​ព្យាយាម​ដោះស្រាយ​បញ្ហា​នេះបន្ថែមទៀត៕