ការពិនិត្យមើលនិន្នការទីផ្សារកៅស៊ូធម្មជាតិនៅក្នុងពាក់កណ្តាលចុងខែមករា ឆ្នាំ២០២៣

១.​ការប្រៀបធៀបថ្លៃកៅស៊ូធម្មជាតិគិតជាមធ្យមនៅតាមបណ្តាទីផ្សារសំខាន់ៗដូចជា ទីផ្សាទិញលក់តាមកិច្ចសន្យា (Futures markets) និង​ទីផ្សារទិញលក់ភ្លាមៗ (Physical markets) ក្នុងអំឡុងពេលពាក់កណ្តាលចុងខែមករា ឆ្នាំ២០២៣ ត្រូវបានបង្ហាញនៅក្នុងតារាងទី១ខាងក្រោម។ និន្នាការថ្លៃកៅស៊ូប្រចាំថ្ងៃក្នុងទីផ្សារទិញលក់ភ្លាមនិងទីផ្សារទិញលក់តាមកិច្ចសន្យាសំខាន់ៗ ក៏មានផ្តល់ជូនបន្ថែមនៅក្នុង​ ក្រាហ្វិកក្នុងឧបសម្ព័ន្ធផងដែរ។

តារាងទី១៖ ថ្លៃកៅស៊ូធម្មជាតិក្នុងអំឡុងពាក់កណ្តាលចុងខែមករា ឆ្នាំ២០២៣ នៅ ទីផ្សារទិញលក់ភ្លាមៗ​​​និងទីផ្សារទិញលក់តាមកិច្ចសន្យានៅតំបន់អាស៊ី

២.​នៅក្នុងទីផ្សារទិញលក់កៅស៊ូភ្លាមៗក៏ដូចជានៅក្នុងទីផ្សារទិញលក់តាមកិច្ចសន្យា ថ្លៃកៅស៊ូគិតជាមធ្យមបានកើនឡើងក្នុងអំឡុងពេលពាក់កណ្តាលចុងខែមករា ឆ្នាំ២០២៣នេះ ធៀបនឹងពាក់កណ្តាលដើមខែមករា ឆ្នាំ២០២៣។

៣.​ថ្លៃទឹកជ័រខាប់ (Latex 60%) គិតជាមធ្យមនៅក្នុងទីផ្សារកៅស៊ូទិញលក់ភ្លាមៗបានកើនឡើងខ្ពស់បំផុតក្នុងអំឡុងពាក់កណ្តាលចុងខែមករា ឆ្នាំ​២០២៣ នៅក្នុងក្រុងកូឡាឡាំពួរ។

៤.​ កំណើននៃថ្លៃកៅស៊ូនេះត្រូវបានគាំទ្រមួយផ្នែកពីការរអាក់រអួលនៃផលិតកម្មកៅស៊ូធម្មជាតិ ដោយសារមានភ្លៀងធ្លាក់នៅក្នុងប្រទេសផលិតកៅស៊ូមួយចំនួនដូចជានៅក្នុងប្រទេសថៃនិងប្រទេសម៉ាឡេស៊ី។

៥.​ ចំពោះកៅស៊ូសន្លឹក (RSS) បានឃើញថា ថ្លៃកៅស៊ូ RSS 3 គិតជាមធ្យមនៅក្នុងទីផ្សារទីក្រុងបាងកកបានកើនឡើង ៨% ធៀបនឹងពាក់កណ្តាលដើមខែមករា ឆ្នាំ២០២៣។ ក្នុងចន្លោះពេលថ្ងៃទី១៩-៣១ ខែមករា ឆ្នាំ២០២៣ ថ្លៃកៅស៊ូ RSS 4 គឺស្ថិតនៅទាបជាងថ្លៃកៅស៊ូ RSS 3។ ព្រឹត្តិការណ៍នេះគឺកើតលើកដំបូងចាប់តាំងពីខែមេសា ឆ្នាំ២០២២មកម្ល៉េះ ដែលថ្លៃកៅស៊ូនៅប្រទេសឥណ្ឌាបានធ្លាក់មកនៅក្រោមថ្លៃនៅក្នុងប្រទេសថៃវិញ។

៦.​នៅក្នុងទីផ្សារទិញលក់តាមកិច្ចសន្យានៅទីផ្សារហ៊ុនសៀងហៃ បានបង្ហាញពីកំណើនខ្ពស់បំផុតនៅក្នុងពាក់កណ្តាលចុងខែមករា ឆ្នាំ២០២៣ ធៀបនឹងពាក់កណ្តាលដើមខែមករា ឆ្នាំ២០២៣។

៧. ដោយសារតែមានក្តីរំពឹងទុកពីកំណើនសេដ្ឋកិច្ចនៅក្នុងប្រទេសចិន ខណៈពេលដែលការធ្លាក់ចុះនៃតម្លៃប្រាក់យ៉េនជប៉ុនបានធ្វើឱ្យថ្លៃកៅស៊ូនៅក្នុងទីផ្សារហ៊ុនអូសាកាបានកើនឡើងក្នុងអំឡុងពាក់កណ្តាលចុងខែមករា ឆ្នាំ២០២៣។ ទីផ្សារកៅស៊ូទិញលក់តាមកិច្ចសន្យានៅអូសាកាបានកើនឡើងនៅថ្ងៃទី២៧ ខែ មករា ឆ្នាំ២០២៣ ដល់កម្រិតមួយខ្ពស់បំផុតក្នុងរយៈពេលបីខែមកនេះ។

៨.ទីផ្សារទិញលក់តាមកិច្ចសន្យានៅសៀងហៃបានបិទទ្វារសម្រាប់ថ្ងៃទី២១-២៩ ខែមករា ឆ្នាំ២០២៣ ដោយសារតែជាថ្ងៃឈប់សម្រាកបុណ្យចូលឆ្នាំចិន។

៩.​ អំឡុងពាក់កណ្តាលចុងខែមករា ឆ្នាំ២០២៣ ទាំងរូបិយប័ណ្ណរបស់ប្រទេសម៉ាឡេស៊ី (រីងហ្គីត) និងប្រាក់បាតថៃមាននិន្នាការថ្លៃកើនឡើង។

១០. តម្លៃប្រេងឆៅបានកើនឡើងក្នុងអំឡុងពាក់កណ្តាលចុងខែមករា ឆ្នាំ២០២៣នេះ។

១១. ថ្លៃកៅស៊ូ SMR 20 នៅទីផ្សារម៉ាឡេស៊ីបានមានសន្ទុះកើនឡើងរបស់ខ្លួន និងឱ្យឈានដល់កម្រិតខ្ពស់បំផុតនៅថ្ងៃទី២៧ ខែមករា ឆ្នាំ ២០២៣ គិតចាប់តាំងពីខែកញ្ញា ឆ្នាំ២០២២។

១២.ទាំងនៅក្នុងទីផ្សារទីក្រុងគួឡាឡាំពួនិងទីផ្សារក្រុងបាងកក ថ្លៃកៅស៊ូដុំក្នុងអំឡុងពាក់កណ្តាលចុងខែមករា ឆ្នាំ២០២៣ មាននិន្នាការកើនឡើង។

១៣. ថ្លៃដុំ STR 20 និង SMR 20 គិតជាមធ្យមបានកើនឡើងចំនួន ៤,១២%  និង ៦,៩២% នៅក្នុងទីផ្សារបាងកកនិងទីផ្សារគួឡាឡាំពួរ តាមលំដាប់រៀងគ្នាក្នុងអំឡុងពេលពាក់កណ្តាលចុងខែមករា ឆ្នាំ២០២៣ បើធៀបនឹងពាក់កណ្តាលដំបូងនៃខែមករា ឆ្នាំ២០២៣ដដែលនេះ ។

១៤. និន្នាការថ្លៃកៅស៊ូប្រភេទ STR 20 និង SMR 20 ប្រចាំថ្ងៃនៅក្នុងទីផ្សារបាងកកនិងគួឡាឡាំពួរនៅក្នុងពាក់កណ្តាលចុងខែមករា ឆ្នាំ ២០២៣ ត្រូវបានផ្តល់ជូនក្នុងក្រាហ្វិកទី១ខាងក្រោម។

ក្រាហ្វិកទី១៖ ថ្លៃកៅស៊ូ STR 20 និង SMR 20 ប្រចាំថ្ងៃ នៅទីផ្សារបាងកកនិងគួឡាឡាំពួរក្នុងអំខែមករា ឆ្នាំ២០២៣

១៥. ចំពោះកៅស៊ូសន្លឹកសម្ងួតដោយផ្សែង (Ribbed Smoked Sheets -​ RSS) នៅទីផ្សារបាងកកថ្លៃ​គិត​ជាមធ្យមសម្រាប់កៅស៊ូ RSS 3 បានកើនឡើងចំនួន ៨,២២% និងនៅទីផ្សារកូតូយ៉ាមវិញ ថ្លៃកៅស៊ូ RSS 4 បានកើនឡើងចំនួន ៣,២១% នៅក្នុងពាក់កណ្តាលចុងខែមករា ឆ្នាំ២០២៣ បើធៀបនឹងពាក់កណ្តាល ដើម​ខែមករា ឆ្នាំ២០២៣កន្លងទៅ។

១៦. កៅស៊ូធម្មជាតិនៅតែរក្សាតម្លៃខ្ពស់នៅក្នុងទីផ្សារសំខាន់ៗក្នុងរដ្ឋ Kerala ប្រទេសឥណ្ឌាបានកើនឡើង ដោយសារតែចំនួនប្រតិបត្តិការ ជួញដូរមានតិច ព្រោះតែការផ្គត់ផ្គង់កៅស៊ូធ្លាក់ចុះទាប។

ក្រាហ្វិកទី២៖ និន្នាការថ្លៃប្រចាំថ្ងៃរបស់កៅស៊ូសន្លឹក RSS 3 និង RSS 4 រៀងគ្នា​នៅ​ទីផ្សារក្រុងបាងកកនិងកូតូយ៉ាម ក្នុងអំឡុងពាក់កណ្តាលចុងខែមករា ឆ្នាំ២០២៣

១៧. តម្លៃទឹកជ័រខាប់ក៏មាននិន្នាការកើនឡើងដូចគ្នានៅក្នុងពាក់កណ្តាលចុងខែមករា ឆ្នាំ២០២៣ ​ធៀប​នឹងពាក់កណ្តាលដើមខែមករា ឆ្នាំ២០២៣​កន្លងមក។ ថ្លៃទឹកជ័រជខាប់គិតជាមធ្យមបានបង្ហាញ​ការកើនឡើង​ចំនួន ១៣,៣៩% នៅទីផ្សារគួឡាឡាំពួរនិងចំនួន ១១,២៤% នៅទីផ្សារបាងកក។

ក្រាហ្វិកទី៣៖ និន្នាការថ្លៃទឹកជ័រខាប់នៅគួឡាឡាំពួរ និងទីផ្សារបាងកក FOB ក្នុងពាក់កណ្តាលចុងខែមករា ឆ្នាំ២០២៣

១៨.​ ថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនសៀហហៃសម្រាប់ខែឧសភា ឆ្នាំ២០២៣ បានកើន​ឡើង​ចំនួន ២,៤៨% ក្នុងអំឡុងពាក់កណ្តាលចុងខែមករា ឆ្នាំ២០២៣ ធៀបនឹងពាក់កណ្តាលដើមខែមករា ឆ្នាំ២០២៣កន្លងទៅ។

ក្រាហ្វិកទី៤៖ និន្នាការថ្លៃកៅស៊ូទិញលក់តាមកិច្ចសន្យានៅទីផ្សារហ៊ុនសៀងហៃ ក្នុងអំឡុងពាក់កណ្តាលចុងខែមករា ឆ្នាំ ២០២៣

១៩. ថ្លៃកៅស៊ូ TSR 20 ទិញលក់តាមកិច្ចសន្យានៅទីផ្សារហ៊ុនសឹង្ហបូរីបានកើនឡើងចំនួន ៦,៩៦% ក្នុងអំឡុងពាក់កណ្តាលចុងខែមករា ឆ្នាំ២០២៣ បើធៀបទៅនឹងពាក់កណ្តាលដើមខែមករា ឆ្នាំ២០២៣កន្លងមក ។

ក្រាហ្វិកទី៥៖ និន្នាការថ្លៃកៅស៊ូ TSR 20 ទិញលក់តាមកិច្ចសន្យានៅទីផ្សារហ៊ុន សៀងហៃក្នុងអំឡុងពាក់កណ្តាលចុងខែមករា ឆ្នាំ២០២៣

២០.ថ្លៃកៅស៊ូប្រភេទ RSS 3 ទិញលក់តាមកិច្ចសន្យានៅទីផ្សារហ៊ុនអូសាកាបានកើនឡើងចំនួន ៣,២០% ក្នុងអំឡុងពេលពាក់កណ្តាលចុងខែមករា ឆ្នាំ២០២៣ បើធៀបនឹងពាក់កណ្តាលដើមខែមករា ឆ្នាំ២០២៣។

ក្រាហ្វិកទី៦៖ និន្នាការថ្លៃកៅស៊ូប្រភេទ RSS 3 ទិញលក់តាមកិច្ចសន្យានៅទីផ្សារ​ហ៊ុនអូសាកា ក្នុងអំឡុងពាក់កណ្តាលចុងខែមករា ឆ្នាំ២០២៣

២១. ក្នុងអំឡុងពាក់កណ្តាលចុងខែមករា ឆ្នាំ២០២៣ ប្រាក់យ៉េនរបស់ជប៉ុនបានធ្លាក់ចុះដូចបានបង្ហាញ​ក្នុងក្រាហ្វិកខាងក្រោម ស្តីពីដំណើរវិវត្តន៍នៃប្រាក់យ៉េនជប៉ុនធៀបនឹងប្រាក់ដុល្លារសហរដ្ឋអាមេរិក។

ក្រាហ្វិកទី៧៖ ភាពរឹងម៉ាំនៃប្រាក់យ៉េនជប៉ុនធៀបនឹងប្រាក់ដុល្លារសហរដ្ឋអាមេរិក

២២. ចំពោះភាពរឹងមាំនៃប្រាក់បាតថៃនិងប្រាក់រីងហ្គីតម៉ាឡេស៊ីក្នុងអំឡុងពាក់កណ្តាលទី២នៃខែមករា ឆ្នាំ២០២៣ បានបង្ហាញក្នុងក្រាហ្វិកទី៨ និង៩ រៀងគ្នា។

ក្រាហ្វិកទី៨៖ ភាពរឹងម៉ាំនៃប្រាក់បាតធៀបនឹងប្រាក់ដុល្លារសហរដ្ឋអាម៉េរិក

ក្រាហ្វិកទី៩៖ ភាពរឹងម៉ាំនៃប្រាក់រីងហ្គីតធៀបនឹងប្រាក់ដុល្លារសហរដ្ឋអាម៉េរិក

២៣.​ តម្លៃប្រេងឆៅបានកើនឡើងពី ៨២,៦៥USD/បារ៉ែល នៅថ្ងៃទី១៦ ខែមករា ឆ្នាំ២០២៣ ទៅដល់ ៨៣,៤២USD/បារ៉ែល នៅថ្ងៃទី៣១ ខែមករា ឆ្នាំ២០២៣ (កើនឡើង ០,៩៣%)។

ក្រាហ្វិកទី១០៖ និន្នាការតម្លៃប្រេងឆៅប្រចាំថ្ងៃ ក្នុងអំឡុងពាក់កណ្តាលចុងខែមករា ឆ្នាំ២០២៣

២៤. កត្តាជះឥទ្ធិពលដល់ទីផ្សារកៅស៊ូវិជ្ជមានក្នុងអំឡុងខែមករា ឆ្នាំ២០២៣ គឺគាំទ្រពីការបើកសេដ្ឋកិច្ច​ប្រទេសចិនភ្លាមៗ រួមទាំងការរំពឹងទុកចំពោះកំណើនសេដ្ឋកិច្ចពិភពលោក។ល។

២៥. រដូវផ្អាកផលិតកម្មកៅស៊ូក៏ខិតជិតមកដល់ ខណៈពេលដែលទស្សនវិស័យសេដ្ឋកិច្ចពិភពលោក (World Economic Outlook - WEO) ត្រូវបាននិទស្សន៍ដោយមូលនិធិរូបិយវត្ថុអន្តរជាតិ (IMF) បង្ហាញថា កំណើនសេដ្ឋកិច្ចសកលនឹងត្រូវធ្លាក់ចុះពីការប៉ាន់ប្រមាណ ៣,៤% ក្នុងឆ្នាំ២០២២ មកត្រឹម ២,៩% នៅ​ឆ្នាំ២០២៣ បន្ទាប់មកកើនឡើងវិញដល់ ៣,១% នៅក្នុងឆ្នាំ២០២៤។ ទោះជាយ៉ាងណាក៏ដោយកំណើន​ដែលរំពឹងទុកនេះគឺមានកំរិតខ្ពស់ជាងពីការព្យាករណ៍របស់ធនាគារពិភពលោក (World Bank) សម្រាប់ឆ្នាំ​២០២៣ (១,៧%)។ ការព្យាករណ៍សម្រាប់ឆ្នាំ២០២៣ របស់ IMF គឺមានកំរិត ០,២% ខ្ពស់ជាងការ​ព្យាករណ៍​កាលពីខែតុលា​​ ឆ្នាំ២០២២។ កសិករ​កៅស៊ូគ្រួសារនៅ​ក្នុង​ប្រទេស​ផលិតកៅស៊ូ​ភាគច្រើន​បាន​បញ្ឈប់​ការ​ចៀរជ័រ​កៅស៊ូរបស់ខ្លួន​ជា​បណ្ដោះអាសន្ន​ក្នុង​អំឡុង​ខែ​កុម្ភៈ ​រហូតដល់​ខែ​មេសា​ជា​រៀង​រាល់​ឆ្នាំ​ ដោយ​សារតែពេលវេលានេះជា​​សិសិរ​រដូវ​ប្រចាំឆ្នាំសម្រាប់ដើម​កៅស៊ូ៕