ព័ត៌មានចុងក្រោយ
ទិន្នផលកៅស៊ូធម្មជាតិមានការថយចុះ ដោយសារភ្លៀងធ្លាក់ខ្លាំងនៅតំបន់ជាច្រើននិងការជន់លិចក្នុងតំបន់មួយចំនួន។ ទោះបីជាបញ្ហាខ្វះកុង តឺន័រដឹកជញ្ជូនចាប់ផ្តើមមានភាពល្អប្រសើរឡើងវិញក៏ដោយ ក៏នៅមានកត្តាហានិភ័យផ្សេងទៀតដូចជា៖ ជំងឺជ្រុះស្លឹក Pestalotiopsis និងសង្គ្រាមរវាងរុស្ស៊ី - អ៊ុយក្រែនដែលបានអូសបន្លាយ។ កត្តាទាំងនេះ បានជះឥទ្ធិពលដល់ថ្លៃថាមពលនិងទំនិញនិងការប្រែប្រួលនៃទីផ្សារហិរញ្ញវត្ថុពិភពលោក។ លើសពីនេះសេដ្ឋកិច្ចរបស់ដៃគូពាណិជ្ជកម្មក៏បានធ្លាក់ចុះផងដែរ។ អតិផរណានិងថ្លៃដើមផលិតកម្មបានកើនឡើង ពិសេស នៅអាស៊ីនិងប្រទេសថៃ ដោយសារការកើនឡើងថ្លៃនៃវត្ថុធាតុដើមនិងផលិតផលនាំចូល បន្ទាប់ពីការកើនឡើងថ្លៃដឹកជញ្ជូន។ ការកើនឡើងនៃអត្រាអតិផរណានៅក្នុងប្រទេសជាច្រើនបានប៉ះពាល់ដល់អំណាចទិញរបស់អតិថិជន។ ជាលទ្ធផលដៃគូពាណិជ្ជកម្មសំខាន់ៗបានបន្ថយការនាំចូលរបស់ពួកគេ។ ម្យ៉ាងទៀតតម្រូវការបរទេសក៏បានធ្លាក់ចុះ។ លើសពីនេះ អ្នកទិញសំបកកង់បរទេសបានបន្ថយការបញ្ជាទិញរបស់ពួកគេសម្រាប់ផលិតផលសម្រេចពីកៅស៊ូ។ នៅឆ្នាំ២០២២ ថ្លៃនៃការនាំចេញកៅស៊ូរំពឹងថានឹងកើនឡើង ៥% ចំណែកបរិមាណកៅស៊ូគឺមានស្ថេរភាព។
កត្តាហានិភ័យផ្សេងទៀតដែលត្រូវពិនិត្យមានរួមមាន៖ (១)យន្តការកែតម្រូវព្រំដែនកាបូនរបស់សហភាពអឺរ៉ុប (EU Carbon Border Adjus- tment Mechanism : CBAM) ដោយសមាគមកៅស៊ូថៃចាត់ទុកថា ការដាំកៅស៊ូជាមធ្យោបាយមួយក្នុងការជួយកាត់បន្ថយការឡើងកំដៅផែនដី ជាពិសេសកៅស៊ូក៏ជាប្រភពដ៏សំខាន់នៃការស្រូបយកឬស្តុកកាបូនឌីអុកស៊ីតនៅក្នុងពិភពលោក។ យោងតាមអាជ្ញាធរកៅស៊ូថៃ ដើមកៅស៊ូអាចផ្ទុកកាបូនឌីអុកស៊ីតចំនួន៤,២២តោន/រ៉ៃ ហេតុនេះ វាអាចកាត់បន្ថយកាបូននៅក្នុងខ្យល់ដែលជាឧស្ម័នផ្ទះកញ្ចក់ដ៏សំខាន់មួយ។ ដូច្នេះកៅស៊ូធម្មជាតិគឺជាផលិតផលពណ៌បៃតង។ (២) ការអនុគ្រោះពន្ធលើផលិតផលដែលគ្មានប្រភពមកពីការការប់បំផ្លាញព្រៃឈើរបស់ សហភាពអឺរ៉ុប។ កាលពីខែកក្កដា ឆ្នាំ២០២២នេះ ភាគីពាក់ព័ន្ធបានស្នើឱ្យពិចារណាពង្រីកវិសាលភាពនៃផលិតផលរួមមាន៖ ជ្រូក ចៀម ពពែ បសុបក្សី ពោត កៅស៊ូ ធ្យូង និងផលិតផលក្រដាសបោះពុម្ព។ ជាលទ្ធផលកសិករនឹងរងផលប៉ះពាល់ដោយសារការចំណាយខ្ពស់។ លើសពីនេះ ដំណើរការពិនិត្យដ៏ត្រឹមត្រូវជាមួយកសិករចំនួន២លាននាក់នៅក្នុងប្រទេសថៃ អាចចំណាយពេលច្រើននិងពិបាកក្នុងការអនុវត្តព្រោះត្រូវតែមានយន្តការ ឧបករណ៍ និងបច្ចេកវិទ្យា ហើយត្រូវការថវិកាច្រើនពីរដ្ឋាភិបាល។ ជាងនេះទៅទៀតប្រទេសថៃកំពុងប្រឈមមុខនឹងបញ្ហាសេដ្ឋកិច្ច ដោយសារជំងឺកូវីដ-១៩ និងបញ្ហាភូមិសាស្ត្រនយោបាយ។ ប្រសិនបើ សភាសហភាពអឺរ៉ុបរួមបញ្ចូលផលិតផលកៅស៊ូនៅក្នុងច្បាប់វានឹងប៉ះពាល់យ៉ាងធ្ងន់ធ្ងរទៅដល់កសិករកៅស៊ូគ្រួសាររបស់ប្រទេសថៃ ដែលបណ្តាលឱ្យកសិករមិនអាចលក់កៅស៊ូបាននិងបង្កជាបញ្ហារបាំងពាណិជ្ជកម្មដែលប៉ះពាល់ដល់ថ្លៃកៅស៊ូទាំងមូល។ ទោះយ៉ាងណាក៏ដោយសមាគមកៅស៊ូថៃ (TRA) ចាត់ទុកកៅស៊ូធម្មជាតិនៅតែមានមូលដ្ឋានគ្រឹះសេដ្ឋកិច្ចវិជ្ជមាន ជាពិសេសជាមួយនឹងការកើនឡើងនៃតម្រូវការស្រោមដៃកៅស៊ូជាសាកល ដោយសារតែការផ្ទុះឡើងនៃជំងឺ COVID-19 និងតម្រូវការរថយន្តអគ្គិសនីយក៏បានកើនឡើងផងដែរ។ ក្រុមប្រឹក្សាកៅស៊ូអន្តរជាតិ (ITRC) ដែលមានប្រទេសថៃ ឥណ្ឌូនេស៊ី និងប្រទេសម៉ាឡេស៊ីបានសហការគ្នាយ៉ាងមុតមាំដើម្បីដាក់ចេញនូវវិធានការសំខាន់ៗ សម្រាប់ដោះស្រាយស្ថានភាពផ្សេងៗ។ រដ្ឋាភិបាលថៃបានដាក់ចេញនូវវិធានការជួយដល់កសិករកៅស៊ូគ្រួសារនិងសហគ្រិនផងដែរ៕