ក្រុមហ៊ុន Bridgestone ផ្តល់ជំនួយឥតសំណងនូវទឹកប្រាក់ចំនួន​៣៥លានដុល្លារអាម៉េរិក ដើម្បី​លើក​កម្ពស់វិស័យកសិកម្មប្រកប​ដោយនិរន្តរភាពនិងពង្រីកផលិតកម្មកៅស៊ូធម្មជាតិរបស់ខ្លួននៅសហរដ្ឋអាម៉េរិកតាមរយៈការដាំដុះរុក្ខជាតិ Guayule នៅលើវាលខ្សាច់។

ជំនួយដែលផ្តល់ឲ្យក្រសួងកសិកម្មនឹងជួយឲ្យក្រុមហ៊ុន Bridgestone ពង្រីកផលិតកម្មកៅស៊ូធម្មជាតិនៅភាគនិរតីនៃសហរដ្ឋអាម៉េរិក។ ក្រុមហ៊ុន Bridgestone បានឲ្យដឹងថានឹងប្រើប្រាស់ការផ្តល់​ជំនួយនេះ ដើម្បីទាក់ទាញកសិកកាន់តែច្រើនឲ្យដាំ​រុក្ខជាតិ Guayule និងជួយកាត់បន្ថយការបំភាយឧស្ម័ន តាមរយៈការផ្តាច់កាបូនចេញពីផលិតកម្មរបស់វា។

មូលនិធិនេះគឺជាផ្នែកមួយនៃភាពជាដៃគូរបស់ USDA សម្រាប់មុខទំនិញពាណិជ្ជកម្មវៃឆ្លាតសម្រាប់អាកាសធាតុ (Climate-Smart Commodities) ដែលត្រូវបានបង្កើតឡើង ដើម្បីបង្កើនផលិតកម្មទំនិញប្រកបដោយនិរន្តរភាព កែលម្អការបំភាយឧស្ម័នផ្ទះ កញ្ចក់នៃប្រតិបត្តិការទាំងនោះ និងបង្កើនឱកាសសម្រាប់អ្នកផលិតខ្នាកតូចនិងក្រុមអ្នកផលិត។ ក្រុម​ហ៊ុន Bridgestone ក៏មាន​បំណង​ជ្រើសរើស​អ្នក​ដាំមាន​ដើម​កំណើតជាជន​អាម៉េរិក ​និងនៅអ្នកនៅក្នុង​ស្រុកសម្រាប់ការផ្តល់ហិរញ្ញប្បទាន​មួយ​ផ្នែក​​។

ក្រុមហ៊ុន Bridgestone បាននឹងកំពុងប្រើប្រាស់​រុក្ខជាតិ Guayule ក្នុងការផលិតកៅស៊ូធម្មជាតិតាំងពីឆ្នាំ២០១២ នៅពេលដែលក្រុមហ៊ុន​បានសាងសង់​ មជ្ឈមណ្ឌលកែច្នៃនិងស្រាវជ្រាវរុក្ខជាតិ Guayule នៅតំបន់ Mesa ក្នុងរដ្ឋ Arizona ហើយបានវិនិយោគអស់ទឹកប្រាក់ជាង១០០លានដុល្លារអាម៉េរិក ដើម្បីធ្វើពាណិជ្ជកម្មដំណាំនេះ។ ក្រុមហ៊ុនសំបកកង់ក៏មានផ្ទៃដាំរុក្ខជាតិ Guayule ចំនួន៨៣ហិកតានៅតំបន់ Eloy ក្នុងរដ្ឋ Arizona ហើយគ្រោងដាំបន្ថែម ទៀតចំនួន១៤២ហិកតានៅឆ្នាំ២០២៣។

កាលពីដើមឆ្នាំនេះ ក្រុមហ៊ុន Bridgestone បានប្តេជ្ញានិយោគទឹកប្រាក់ចំនួន៤២លានដុល្លារអាម៉េរិកបន្ថែមទៀតនៅឆ្នាំ២០៣០ ដើម្បីពង្រីកផលិត កម្មរុក្ខជាតិ Guayule ហើយសង្ឃឹម​ថា​នឹង​បង្កើន​ផ្ទៃដីដាំ​ដំណាំនេះឲ្យកើន​ដល់​១០១១៧ហិកតា​។

រុក្ខជាតិ Guayule គឺជាដើមឈើដែលធន់នឹងកំដៅ ហើយដុះលូតលាស់នៅក្នុងវាលខ្សាច់ ពិសេសនៅវាលខ្សាច់ភាគនិរតីនៃសហរដ្ឋអាម៉េរិក។ រុក្ខជាតិនេះមានសារធាតុជ័រដែលអាចប្រើដូចជ័រកៅស៊ូបាននិងអាច​​ប្រមូល​ផលបាន​ក្នុង​រយៈពេល​តិច​ជាង​ពីរ​ឆ្នាំ​បន្ទាប់​ពី​ការ​ដាំ ហើយ​​ត្រូវ​បាន​គេ​សិក្សា​ថាជា​ប្រភព​សម្រាប់​ជីវឥន្ធនៈ​ផង​ដែរ។

ការដាំរុក្ខជាតិនេះ​ គឺត្រូវការ​ទឹក​តិច​ជាង​ពាក់​កណ្តាល បើធៀបនឹងដាំ​ដំណាំ​ដែល​មាន​ស្រាប់នៅ​ក្នុង​ចម្ការដូចជា ដើម​កប្បាសនិង A​lfalfa។ ការ​បង្កើនប្រសិទ្ធភាពទឹកដែលជាផ្នែកមួយនៃគោលដៅ​​​​​របស់ក្រុមហ៊ុន Bridgestone សម្រាប់ការផ្តល់ជំនួយនេះ ជាពិសេសការទឹកខ្វះខាតនៅក្នុងតំបន់ ហើយអាងទន្លេ Colorado  Basin ចាប់ផ្តើមដំណើរការកង្វះទឹកកម្រិតទី២ នៅខែមករា ឆ្នាំ២០២៣ខាងមុខនេះ។

ក្រុមហ៊ុន Bridgestone បានផលិតសំបកកង់ដំបូងចេញពីកៅស៊ូធម្មជាតិដែលផលិតដោយជ័រ Guayule តាំងពីឆ្នាំ២០១៥ និងក៏បានបន្តមានគោលដៅប្រើប្រាស់សម្ភារៈនិរន្តរភាពទាំងអស់នៅឆ្នាំ ២០៥០។

ប្រភពធម្មជាតិបានផ្តោតលើការផលិតសំបកកង់ប្រកបដោយនិរន្តរភាពនៅទូទាំងឧស្សាហកម្ម។ ឧទាហរណ៍៖ ក្រុមហ៊ុន Goodyear កំពុងផលិតសំបកកង់ពីកៅស៊ូធម្មជាតិដែលផលិតពីរុក្ខជាតិ Dandelion ហើយថែមទាំងបានបង្កើតសំបកឡានក្រុងជាមួយនឹងប្រេងសណ្តែកដីផងដែរ។

ជំនួយ USDA របស់ក្រុមហ៊ុន Bridgestone នឹងត្រូវបានផ្តល់ក្នុងរយៈពេល៥ឆ្នាំ ហើយត្រូវបានរៀបចំឡើងដើម្បីកាត់បន្ថយថ្លៃដើមសម្រាប់កសិករដាំរុក្ខជាតិ Guayule។ ក្រុមហ៊ុនក៏នឹងប្រើប្រាស់មូលនិធិនេះ ដើម្បីជួយអប់រំនិងលើកទឹកចិត្តកសិករអំពីការអនុវត្តប្រកបដោយនិរន្តរភាពនិងកាត់បន្ថយផលប៉ះពាល់ពីកាបូនមកដល់សូន្យ រួមទាំងការលើកទឹកចិត្តដល់ផ្តាច់កាបូននៅក្នុងដីវាលខ្សាច់។

ដៃគូបន្ថែមនៅក្នុងជំនួយឥតសំណង៣៥លានដុល្លារអាម៉េរិកសម្រាប់ Guayule Climate-Smart រួមមាន៖ សាកលវិទ្យាល័យ Arizona, Colorado State University, OpenET, Environmental Defense Fund, Tohono O'odham Nation និង Colorado River Indian Tribes និងអ្នកដាំដុះក្នុងតំបន់ចំនួនប្រាំបី។ ជំនួយនេះជាផ្នែកមួយនៃដំណាក់កាលដំបូងនៃកម្មវិធី USDA ដែលរួមបញ្ចូលរហូតដល់ ២,៨ ពាន់លានដុល្លារអាម៉េរិក សម្រាប់គម្រោងកសិកម្មនិរន្តរភាពចំនួន៧០ នៅទូទាំងប្រទេស៕