ក្រសួងចម្ការឧស្សាហនិងមុខទំនិញកំពុងរិះរកគំនិត​ថ្មីៗសម្រាប់ការអនុវត្តការគ្រប់គ្រងពាណិជ្ជកម្មសាជីវកម្ម ដើម្បីឆ្ពោះទៅរកការសម្រេចបាននូវនិរន្តរភាពសម្រាប់កសិករកៅស៊ូគ្រួសារនាពេលអនាគត។

រដ្ឋមន្រ្តីលោកស្រីបណ្ឌិត Zuraida Kamaruddin​ បានលើកឡើងថា ការផ្លាស់ប្តូរនេះគឺសំខាន់ណាស់ដើម្បីធានាបាននូវការផ្គត់ផ្គង់កៅស៊ូប្រកបដោយនិរន្តរភាពរបស់ប្រទេសសម្រាប់ទីផ្សារពិភពលោក។ ជាច្រើនទសវត្សរ៍កន្លងមក យើងមានអង្គភាពសាជីវកម្មដូចជា Sime Darby និងអ្នកផ្សេងៗទៀតកំពុងគ្រប់គ្រងចម្ការកៅស៊ូរបស់យើង ប៉ុន្តែពួកគេបានបញ្ឈប់ការគ្រប់គ្រងចម្ការកៅស៊ូទាំងនោះ។ បច្ចុប្បន្ន ៩០% នៃការផ្គត់ផ្គង់កៅស៊ូ​របស់ប្រទេស​ម៉ាឡេស៊ី​ត្រូវបានផលិតដោយកសិករកៅស៊ូគ្រួសារនៅទូទាំងប្រទេស ដូច្នេះយើងត្រូវរក្សាចម្ការកៅស៊ូនោះ។ យើងក៏​កំពុង​ប្រឈម​មុខ​នឹង​បញ្ហានេះ​ ដោយសារ​ ៤០% ​នៃ​កសិករកៅស៊ូគ្រួសារ​​អសកម្ម​ដោយពួកគាត់​ភាគ​ច្រើន​ជា​មនុស្ស​ចាស់​និងមានសុខភាពមិនល្អដែល​មិន​ ចៀរកៅស៊ូបាន​។

លោកស្រីបណ្ឌិតបានជម្រាបដល់អ្នកកាសែតថា បន្ទាប់ពីការបើកតំបន់ទេសចរណ៍មុខទំនិញកសិកម្មនៅភាគខាងជើង Keluarga Malay- sia Agro-commodity Tour នៅរដ្ឋ Dewan Al Hana ដែលមានកសិករកៅស៊ូគ្រួសារចូលរួមចំនួន៣០០នាក់ ហើយពួកគេភាគច្រើនមានទំនោរលក់​ចម្ការ​កៅស៊ូ​របស់ខ្លួន ដោយសារតែពួកគេលែងសាកសមនឹង​ការងារនៅចម្ការកៅស៊ូទៀតហើយ។

លោកស្រីក៏បានធ្វើជាសាក្សីក្នុងការចុះហត្ថលេខាលើអនុស្សរណៈនៃការយោគយល់គ្នារវាងក្រុមប្រឹក្សាកៅស៊ូម៉ាឡេស៊ី (Malaysian Rubber Board: MRB) និងសាជីវកម្មអភិវឌ្ឍន៍កៅស៊ូម៉ាឡេស៊ី Bhd (Mardec) នៅក្នុងព្រឹត្តិការណ៍នេះផងដែរ។ MoUនេះ ភាគី MRB និង Mardec នឹងអនុវត្តសិក្សាលើការគ្រប់គ្រងចម្ការកៅស៊ូរបស់កសិករកៅស៊ូគ្រួសារដែលមាននិរន្តរភាព គឺយើង​ចង់បង្កើត​គំរូ​មួយ​អំពី​របៀប​ដែល​​អាចប្រែក្លាយប្រតិបត្តិការរបស់កសិករកៅស៊ូគ្រួសារ​ទៅ​ជាអ្នកមាន​វិជ្ជាជីវៈ​ និងមានផលិតភាពបានច្រើន ​មាន​កម្មករធ្វើការ​ពេញ​ម៉ោង។

​ក្រោម​គំនិត​ធ្វើ​ពាណិជ្ជកម្ម​នេះ គោលបំណងរបស់​យើង​គឺ​ធានា​បាន​នូវ​ប្រាក់​ចំណូលខ្ពស់និងមានស្ថិរភាពសម្រាប់កសិករកៅស៊ូគ្រួសាររបស់​យើងតាមរយៈ​កម្មវិធី​លើកទឹកចិត្ត​ផលិតកម្ម​ជ័រកៅស៊ូ​ ហើយក្រសួងក៏បានផ្តួចផ្តើមគំនិតដើម្បីដោះស្រាយបញ្ហាប្រឈមក្នុងការផ្គត់ផ្គង់កៅស៊ូដូចជាការបង្រួមទំហំចម្ការកៅស៊ូទូទាំងប្រទេស ដោយសារតែចំនួនប្រជាជនមានវ័យចំណាស់ជាកសិករកៅស៊ូគ្រួសារនិងការបំប្លែងទៅជាចម្ការ​ ដូងប្រេង។ ទន្ទឹមនឹងនោះ ក្រសួងត្រូវមានគំរូដ៏មានប្រសិទ្ធភាពមួយដើម្បីដោះស្រាយបញ្ហាប្រឈមទាំងនេះ នឹងអនុវត្តគម្រោងសាកល្បងនៅតំបន់ភាគខាង​ជើងនិងបាន​ជ្រើសរើសយកតំបន់ Kedah  សម្រាប់​ជាគម្រោង​សាកល្បង​នេះ ដោយសារ​រដ្ឋ​​បានដើរតួជាអ្នក​​ផ្គត់ផ្គង់​កៅស៊ូ​ធំ​បំផុតនៅ​ក្នុង​ប្រទេសក្នុងអត្រា ​៣០%។

កៅស៊ូ​ធម្មជាតិ​ដែល​ផលិតនៅ​ក្នុង​ប្រទេស​ម៉ាឡេស៊ី​មាន​តម្រូវ​ការ​ខ្ពស់​នៅក្នុង​ទីផ្សារពិភពលោក ជាពិសេស​ក្នុង​ប្រទេស​អឺរ៉ុប។ ដូច្នេះយើងត្រូវការការ​ស្រា​វជ្រាវបន្ថែមទៀត​ ដើម្បីផលិតផលិតផលសម្រេចពី​កៅស៊ូសម្រាប់ទីផ្សារពិភពលោក ហើយតាមរយៈការ​ធ្វើ​បែបនេះយើងនឹងអាចរក្សាស្ថិរភាព​ថ្លៃទំនិញកៅស៊ូ​របស់យើងក្នុងរយៈពេលវែង៕