ថ្លៃកៅស៊ូធម្មជាតិក្នុងស្រុកបានធ្លាក់ចុះ​ជាង ៥% ចាប់តាំងពីដើមខែនេះ ដោយសារភ្លៀង​ធ្លាក់ខុស​ប្រក្រតី តម្រូវការឧស្សាហកម្មធ្លាក់ចុះ និងនិន្នាការធ្លាក់ចុះនៅក្នុងទីផ្សារអន្តរជាតិ។

ក្នុង​រយៈ​ពេល​ពីរ​ខែ​កន្លង​មក​នេះ ថ្លៃកៅស៊ូបាន​ធ្លាក់​ចុះ០,២៨ដុល្លារ/គ.ក្រ កាល​ពី​ថ្ងៃ​សុក្រ ថ្លៃកៅស៊ូ​ប្រភេទ RSS-4 មាន​តម្លៃ ១,៩៧ដុល្លារ/គ.ក្រ បើ​ធៀប​នឹងដើមខែគឺ ២.០៦ដុល្លារ/គ.ក្រ។ ថ្លៃទឹកជ័រក៏បានធ្លាក់ចុះពី១,៥៩ដុល្លារ ដល់ ១,៨០ដុលារ។

ទោះជាយ៉ាងណាក៏ដោយ ប្រភពផ្លូវការបានបញ្ជាក់ថាការធ្លាក់ចុះនេះគឺបណ្តោះអាសន្នប៉ុណ្ណោះ ហើយថ្លៃទំនងជានឹងកើនឡើងក្នុងពេលឆាប់ៗនេះ។ ពួកគេបានសន្មតថាមានកត្តាជាច្រើនដែលរួមចំណែកដល់ការធ្លាក់ចុះនេះ ដែលរាប់ទាំងការថយចុះនៃការប្រើប្រាស់ ដោយសារតែការផ្គត់ផ្គង់កៅស៊ូធម្មជាតិបានធូរស្រាលឡើងវិញ បន្ទាប់ពីការធ្លាក់ចុះនៅខែកក្កដា។

ក្រុមហ៊ុនសំបកកង់បញ្ជាក់ថា ថ្លៃពិភពលោកបានធ្លាក់ចុះពី២,០៨ដុល្លារ ដល់​ ១,៥៩ដុល្លារកាលពីឆ្នាំមុន និងតម្រូវការទឹកជ័រកៅស៊ូក៏បានធ្លាក់ចុះ ដោយសារអវត្តមាននៃការបញ្ជាទិញនាំចេញនិងការធ្លាក់ចុះនៃតម្រូវការក្នុងស្រុក។

ការ​ផ្គត់ផ្គង់កៅស៊ូ​បាន​ធូរស្រាល ​បន្ទាប់​ពី​មាន​ការ​ធ្លាក់​ចុះ​នៅ​ខែកក្កដា ដោយសារ​ភ្លៀង​បានឈប់​ធ្លាក់។ ការចៀរ​បន្តសកម្មភាព​ឡើងវិញ​ចាប់​ពី​ចុង​ខែ​កក្កដានិង​ដើម​ខែ​សីហា។ ក្រុមហ៊ុនសំបកកង់ដែលជាអ្នកប្រើប្រាស់កៅស៊ូធម្មជាតិដ៏ធំរំពឹងថា នឹងបន្តការទិញកៅស៊ូឡើងវិញនៅក្នុងពេល ឆាប់ៗនេះ ដោយសារកម្រិតសន្និធិរបស់ពួកគេនឹងមិនអនុញ្ញាតឱ្យពួកគេនៅឆ្ងាយពីទីផ្សារក្នុងស្រុកយូរនោះទេ។ កត្តានេះ​នឹង​ជួយ​លើក​កម្ពស់​ថ្លៃផងដែរ។

លោក GeorgeValy ប្រធានសហព័ន្ធឈ្នួញកៅស៊ូឥណ្ឌាបាននិយាយថា ភាពអាចរកបានកៅស៊ូធម្មជាតិពីរដ្ឋភាគឦសាននិងលទ្ធភាពប្រើប្រាស់របស់វាសម្រាប់ក្នុងឧស្សាហកម្មក៏បានរួមចំណែកដល់ការធ្លាក់ចុះថ្លៃផងដែរ។ លោកបានបង្ហាញថាផលិតកម្មកៅស៊ូនៅតំបន់ Assam និង Tripura រំពឹងថានឹងមានចំនួន១,៥ពាន់តោននៅឆ្នាំនេះ ធៀបនឹងឆ្នាំមុន ហើយថ្លៃគឺទាបជាងនៅរដ្ឋ Kerala ផងដែរ។ ម្យ៉ាងទៀតភ្លៀងធ្លាក់ជាបន្តបន្ទាប់ក៏បានប៉ះពាល់ដល់ផលិតកម្មកៅស៊ូផងដែរ។

កត្តាមិនអំណោយផល

លោក Jom Jacob អ្នកវិភាគឯករាជ្យនៅក្នុងឧស្សាហកម្មកៅស៊ូពិភពលោកបានឲ្យដឹងថាថ្លៃកៅស៊ូធម្មជាតិនៅប្រទេសឥណ្ឌាបានធ្លាក់ចុះយ៉ាង ខ្លាំងក្នុងរយៈពេល៤សប្តាហ៍ចុងក្រោយនេះ ដោយសារតែនិន្នាការពិភពលោកធ្លាក់ចុះ។ ទីផ្សារឥណ្ឌាក៏បានថ្លឹងថ្លែងពីការធ្លាក់ចុះផងដែរ ដោយការផ្គត់ផ្គង់ក្នុងស្រុកបានប្រសើរឡើងជាងការរំពឹទុកក្នុងអំឡុងខែសីហានេះ ចំពេលដែលមានភ្លៀងមូសុងដែលជួយសម្រួលមិនប៉ះរំខានដល់ការចៀរជ័រផងដែរ។ ហេតុផលមួយទៀតគឺវិស័យដឹកជញ្ជូនបានវិលទៅរកភាពធម្មតាវិញ ហើយអត្រាថ្លៃដឹកជញ្ជូនតាមសមុទ្របានធ្លាក់ចុះយ៉ាងខ្លាំង ដែលធ្វើឲ្យការនាំចូលកៅស៊ូធម្មជាតិបានលឿននិងថោកជាងមុន។

លោកក៏​បាន​បន្ត​ថា ​​អវត្ដមាន​នៃ​ភាព​មិន​ប្រាកដ​ប្រជា​និង​ការ​ព្រួយ​បារម្ភ​លើ​ការ​ពន្យារ​ពេល​នៃ​ការ​ដឹក​ជញ្ជូន ក្រុមហ៊ុន​សំបក​កង់​របស់​​ឥណ្ឌាបាន ​​កាត់​បន្ថយ​សន្និធិកៅស៊ូធម្មជាតិរបស់​ខ្លួន ដើម្បីព្យាយាមបញ្ចុះ​តម្លៃ​ដើមភាគហ៊ុនកាន់កាប់។ ក្រៅពីកត្តាតម្រូវការនិងផ្គត់ផ្គង់មិនអំណោយផល កត្តាមិនមែនមូលដ្ឋានមួយចំនួនទៀត​ក៏កំពុងជះឥទ្ធិពលដល់រំញោចទីផ្សារពិភពលោកផងដែររួមមាន៖​​ ភាពតានតឹងភូមិសាស្ត្រនយោបាយរវាង​ចិន​និងតៃវ៉ាន់ ភាពមិនប្រាកដប្រជាដែលកើតឡើងពីសង្គ្រាមរវាររុស្ស៊ីនិងអ៊ុយក្រែនដែលបានអូសបន្លាយ ការបិទខប់ដោយសារជំងឺកូវីដនៅតំបន់មួយចំនួន​នៃប្រទេសចិន ភាពរឹងមាំដ៏ខ្លាំងនៃប្រាក់ដុល្លារដល់កម្រិតមួយខ្ពស់ជិតពីរទសវត្សរ៍ និងភាពទន់ខ្សោយជាបន្តបន្ទាប់នៃរូបិយប័ណ្ណសំខាន់ៗ​របស់បណ្តាប្រទេសនាំចេញកៅស៊ូធម្មជាតិសំខាន់ៗ៕