យោងតាមអ្នកវិភាគក្នុងវិស័យកៅស៊ូបានឱ្យដឹងថា កត្តាមូលដ្ឋាននៃការផ្គត់ផ្គង់-តម្រូវការនិងកត្តាមិនមែនមូលដ្ឋាននឹងនៅតែមិនអំណោយផលដល់ទីផ្សារកៅស៊ូធម្មជាតិក្នុងរយៈពេលខ្លីនេះ។

លោក Jom Jacob អ្នកវិភាគឯករាជ្យក្នុងឧស្សាហកម្មកៅស៊ូធម្មជាតិពិភពលោកបានលើកឡើង ថាការបន្តសង្រ្គាមនិងការដាក់​ទណ្ឌកម្ម​សេដ្ឋ- កិច្ច​​ដ៏ធំបណ្តាលឱ្យមានភាពវឹកវរក្នុងឧស្សាហកម្ម ផលិតបន្ទះឈីប និងធ្វើឲ្យជាប់គាំងដល់បដិវត្តន៍​យានយន្តអគ្គីសនីពិភពលោក។

ការវិវឌ្ឍន៍ទាំងអស់នេះ មានឥទ្ធិពលផ្ទាល់ ដល់តម្រូវការកៅស៊ូធម្មជាតិពិភពលោក ដោយ​សារ​តែកៅស៊ូធម្មជាតិពឹងផ្អែកលើវិស័យយានយន្ត។ ដូច​គ្នានេះដែរ ការបិទខ្ទប់ដ៏តឹងរ៉ឹងនៅក្នុងទីក្រុងសៀងហៃកំពុងធ្វើឱ្យប៉ះពាល់ដល់សកម្មភាពផលិតកម្មនិងធុរៈកិច្ចនៅក្នុងប្រទេសចិនផងដែរ។​ ការអភិវឌ្ឍននេះមាន​សារៈ​សំខាន់ណាស់សម្រាប់តម្រូវការកៅស៊ូធម្មជាតិពិភពលោក ដោយសារតែប្រទេសចិនតំណាងឱ្យ​តម្រូវការ​កៅស៊ូ​ធម្មជាតិពិភពលោកប្រហែលជា ៤៣%។

ទស្សនវិស័យនៃការផ្គត់ផ្គង់

ក្រៅពីនោះ សកម្មភាពផលិតកម្មនៅទូទាំង​ពិភព​លោកត្រូវបានរងផលប៉ះពាល់ ដោយសារតែ​អតិផរ​ណាកើនឡើងថ្លៃវត្ថុធាតុដើមកើនឡើង ថ្លៃ​ដឹកជញ្ជូនកើនឡើង និងភាពប្រែប្រួលកើនឡើង និងភាពមិនច្បាស់លាស់ផ្សេងៗទៀត។

ទោះជាយ៉ាងណាក៏ដោយ ការផ្គត់ផ្គង់កៅស៊ូធម្មជាតិនៅទូទាំងពិភពលោកត្រូវបានកំណត់ថានឹងកើនឡើងក្នុងរយៈពេលខ្លី ដោយសារកសិករកៅស៊ូ​គ្រួសារនៅក្នុងប្រទេសផលិតកៅស៊ូធំៗនឹងបន្តការចៀរកៅស៊ូឡើងវិញ បន្ទាប់ពីរដូវរងាបានបញ្ចប់។

ជាក់ស្តែងកសិករមួយភាគធំបានបើកការចៀរកៅស៊ូ​របស់ពួកគេឡើងវិញ ហើយ​ទីផ្សារក៏បាន​​​ចាប់ផ្តើមមានភាពប្រសើរឡើងវិញ​នៅក្នុង​ប្រទេស​មួយចំនួន។ ជាមួយគ្នានោះ កសិករ​​នៅភាគខាង​ត្បូ​ងប្រទេសថៃ ប្រទេសឥណ្ឌូណេស៊ី និង​ប្រទេស​ម៉ាឡេស៊ីរំពឹងថា​នឹងចាប់ផ្តើមចៀរជ័រឡើងវិញ បន្ទាប់​ពីពិធីបុណ្យតមអាហារមូស្លីមត្រូវបានបញ្ចប់នៅចុងខែនេះ។

លោក KN Raghavan នាយកប្រតិបត្តិក្រុមប្រឹក្សាកៅស៊ូបាននិយាយថា នៅឆ្នាំនេះផលិតកម្ម​ក៏ល្អ​ផងដែរ។ តម្រូវការក៏ខ្ពស់ ថ្លៃក៏បាន​ល្អពោលគឺ​វិស័យនេះមាន​ការកើនឡើង​ រីឯការ​បាញ់​ថ្នាំ​ការ​ពារ​ជំងឺក៏​ត្រូវ​បាន​បញ្ចប់​ផង​ដែរ៕