ព័ត៌មានចុងក្រោយ
ដោយមានការគាំទ្រពីឧស្សាហកម្មកៅស៊ូនិងកិច្ចសហការគ្នាជាមួយក្រុមប្រឹក្សាកៅស៊ូឥណ្ឌាក្នុងភាពជាដៃគូមិនធ្លាប់មានពីមុនមក ផ្ទៃដីដាំកៅស៊ូនៅភាគឦសាននៃរដ្ឋ Tripura និងរដ្ឋ Assam ទំនងជានឹងកើនឡើងប្រហែល២០ ០០០ហិកតានៅឆ្នាំ២០២១នេះ។ កិច្ចសហការនេះ មានគោលបំណងបង្កើនផ្ទៃដីដាំកៅស៊ូឲ្យបានប្រមាណ២០ម៉ឺនហិកតានៅតំបន់ភូមិភាគ ឦសាន។
ក្រុមប្រឹក្សាកៅស៊ូបានឱ្យដឹងថា ជំហរដ៏រឹងមាំអំពីការពង្រីកផ្ទៃដីកៅស៊ូនឹងអាចចាប់ផ្ដើមនៅខែមេសា ឆ្នាំ២០២១នេះ ដោយរដូវដាំដុះកៅស៊ូថ្មីនឹងចាប់ផ្តើមនៅខែកក្កដា-សីហា។ ការផ្គត់ផ្គង់រុក្ខសម្ភារៈកៅស៊ូ គឺជាបញ្ហាដ៏ចម្បងមួយដែលត្រូវដោះស្រាយ ទោះបីជា កម្មវិធីដាំដុះត្រូវបានសម្រេចរួចហើយក៏ដោយ។
ផ្ទៃដីកៅស៊ូធម្មជាតិសរុបនៅរដ្ឋភាគឦសានទាំង៧ មានចំនួនប្រមាណ១៨៩ពាន់ហិកតា ដែលក្នុងនោះផ្ទៃដីជាង ៦០ ០០០ហិកតាស្ថិតក្នុងរដ្ឋ Tripura ដែលជាតំបន់មិនមែនប្រពៃណី ដំបូងគេនៅក្នុងប្រទេសឥណ្ឌា ដើម្បីធ្វើការពិសោធលើការដាំដុះកៅស៊ូ។ ផលិតកម្មកៅស៊ូប្រមាណ៨៥% នៅក្នុងប្រទេសឥណ្ឌាមានប្រភពមកពីរដ្ឋ Kelera និងផ្នែកខ្លះទៀតមកពីរដ្ឋ Tamil Nadu ដែលជាតំបន់ដាំដុះកៅស៊ូប្រពៃណី។
រដ្ឋ Assam មានផ្ទៃដីដាំកៅស៊ូប្រមាណ ៥៨ ០០០ហិកតា រដ្ឋ Meghalaya ប្រមាណ១៦ ៣០០ហិកតា រដ្ឋ Nagaland ប្រមាណ១៥ ០០០ហិកតា រីឯរដ្ឋផ្សេងៗទៀតប្រហែលជា ៥ ០០០ហិកតា ដែលផ្ដល់ផលិតផលកៅស៊ូសរុបនៅរដ្ឋភាគឦសានចំនួនប្រមាណ ១១២ពាន់តោន។ យោងតាមក្រុមប្រឹក្សាកៅស៊ូឥណ្ឌាបានឲ្យដឹងថា ក្នុងឆ្នាំ២០២០កន្លងទៅ ផលិតផលកៅស៊ូធម្មជាតិសរុបក្នុងប្រទេសមានចំនួន ៧១២ពាន់តោន គឺទាបជាងផលិតផលកំពូលក្នុងឆ្នាំ២០១២-១៣ ដែលមានចំនួន ៩០០ពាន់តោន។
ថវិកាឆ្នាំ២០២១-២០២២
ថវិកាដែលត្រូវបានអនុម័តសម្រាប់វិស័យកៅស៊ូមិនមានអ្វីត្រូវលើកទឹកចិត្តច្រើនទេ។ ទោះជាយ៉ាងណាក៏ដោយ ប្រភពពីក្រុមប្រឹក្សាកៅស៊ូបានឲ្យដឹងថា ការសម្រេចចុងក្រោយអាចនឹងរួមបញ្ចូលគ្នាតែមួយ បន្ទាប់ពីការដាក់សំណើគម្រោងលើកទី១៣ត្រូវបានបញ្ចប់។ ថវិកាសម្រាប់ឆ្នាំ២០២០-២០២១ បានកែសម្រួលពីសំណើដើមចំនួន១២១០លានរូពីមកនៅត្រឹម១៨៨០លានរូពី បន្ទាន់ពីការឆ្លងរាលដាលជំងឺ Covid-១៩។ ការផ្តល់ថវិកាសម្រាប់ឆ្នាំហិរញ្ញវត្ថុខាងមុខនេះ មានប្រមាណ១៩០០លានរូពី សម្រាប់ឲ្យក្រុមប្រឹក្សាកៅស៊ូអនុវត្តគម្រោងណាដែលសំខាន់ៗ៕