អង្គការមូលនិធិរូបិយវត្ថុអន្ដរជាតិ (​International Monetary Fund : IMF) បានព្យាករណ៍ថា ការផលិតបានវ៉ាក់សាំងទប់ស្កាត់ COVID-19 នឹង​ធ្វើ​ឲ្យ​​សេដ្ឋកិច្ចពិភពលោកងើបឡើងវិញ នៅឆ្នាំ២០២១នេះ។ IMF ដែលមានប្រទេសជាសមាជិកចំនួន១៩០ បានព្យាករណ៍ថា​សេដ្ឋកិច្ចពិភពលោកនឹងកើនឡើង ៥,៥% នៅឆ្នាំ២០២១ បន្ទាប់ពីបានធ្លាក់ចុះ ៣,៥% នៅឆ្នាំ២០២០ ដែលជាឆ្នាំដ៏អាក្រក់បំផុត​ចាប់តាំងពីសង្គ្រាមលោកលើកទី២មក។

វ៉ាក់សាំងអាចទប់ស្កាត់ការរីករាលដាលវិរ៉ុស Covide-19 ដោយអនុញ្ញាតឱ្យរដ្ឋាភិបាល​នានានៅ​ជុំវិញពិភពលោកបានបន្ធូរបន្ថយការបិទប្រទេស និងលើកទឹកចិត្តឱ្យមានការវិលត្រឡប់ ទៅរកសកម្មភាពសេដ្ឋកិច្ចធម្មតាវិញ។ កាលពីចុងឆ្នាំមុន សេដ្ឋកិច្ចពិភពលោកក៏ទទួលផល​ពីកម្មវិធីជំរុញសេដ្ឋកិច្ចរបស់រដ្ឋាភិបាលនៅសហរដ្ឋអាមេរិកនិង​ជប៉ុន។

ប៉ុន្តែ IMF បានឲ្យដឹងថាសេដ្ឋកិច្ចពិភព​លោក​ត្រូវការការគាំទ្រពីរដ្ឋាភិបាលនៃបណ្តា​ប្រទេសជាសមាជិក ដើម្បីទូទាត់ផលប៉ះពាល់ពី​ការ​រាតត្បាតនៃជំងឺ និងព្រមានថាការបំប្លែងរូបរាងថ្មី​របស់វីរ៉ុសកូរ៉ូណាអាចរារាំងដល់ចក្ខុវិស័យសុខាភិបាលនិងចក្ខុវិស័យកំណើនសេដ្ឋកិច្ចពិភពលោក។

ក្នុងរបាយការណ៍ចក្ខុវិស័យសេដ្ឋកិច្ចពិភពលោក IMF បានរំពឹងថា សេដ្ឋកិច្ច​អាម៉េ​រិក​នឹង​កើនឡើង ៥,១% នៅឆ្នាំនេះ បន្ទាប់ពីបាន​ធ្លាក់​ចុះ ៣,៤% នៅឆ្នាំ២០២០ បន្ទាប់មកសេដ្ឋកិច្ច លំដាប់លេខ២ គឺ​ប្រទេសចិននឹងមានកំណើន ៨,១% បន្ទាប់ពីការ​កើន​ឡើង២,៣% ក្នុងឆ្នាំ២០២០ ។

IMF បានបន្តថា ប្រទេសចំនួន១៩ នៅ​អឺរ៉ុបដែលមានភាគហ៊ុនជារូបិយប័ណ្ណអ៊ឺរ៉ូនឹងនឹងមានកំណើន ៤,២% នៅឆ្នាំ២០២១ បន្ទាប់ពី​ផល​សេដ្ឋកិច្ចបានធ្លាក់ចុះ៧,២% ក្នុង​ឆ្នាំ២០២០។ សេដ្ឋកិច្ចជប៉ុនព្យាករណ៍ថា ​នឹងកើន​ឡើង៣,១% បន្ទាប់ពីបានធ្លាក់ចុះ​៥,១% នៅឆ្នាំ២០២០។ សេដ្ឋកិច្ច​ប្រទេសឥណ្ឌាកើនឡើងលឿន​ ដោយសារការងើបឡើងវិញយ៉ាងលឿននៅ តាមរោងចក្រនិងចម្ការ នឹងរំពឹងថានឹងកើនឡើង១១,៥% នៅឆ្នាំ​២០២១ ដែលកើន​លឿនបំផុតក្នុងចំណោម​សេដ្ឋ​កិច្ចនៃបណ្តាប្រទេសធំៗ ក្រោយពីបានធ្លាក់ចុះ៨% នៅឆ្នាំ២០២០។ ទន្ទឹមនឹងនោះ ពាណិជ្ជកម្មពិភពលោកនឹងងើបឡើងវិញនៅឆ្នាំ២០២១នេះ ជាមួយនឹងកំណើន៨,១% បន្ទាប់ពីបានធ្លាក់ចុះ ៩,៦% កាលពីឆ្នាំមុន៕