បើយោងតាមក្រសួងចម្ការឧស្សាហកម្មនិងមុខទំនិញបានឲ្យដឹងថា​ ភាគរយនៃកសិករកៅស៊ូគ្រួសារ​​ដែលដាក់ពាក្យស្នើសុំគម្រោងលើកទឹកចិត្តផលិតកម្មកៅស៊ូ (Rubber Production Incentive :IPG) រំពឹងថានឹងកើនឡើងនៅឆ្នាំនេះ ដែលនាំឲ្យប្រាក់ចំណូលប្រចាំខែរបស់កសិករកៅស៊ូគ្រួសារនឹងកើនឡើង២៥%។

ឯកឧត្តមបណ្ឌិត Mohd Khairuddin Aman Razali រដ្ឋមន្រ្តីក្រសួងចម្ការឧស្សាហកម្ម​និង​មុខទំនិញបានបញ្ជាក់ថា​ ជំនួយឧបត្ថម្ភលើក​ទឹកចិត្តផលិតកម្មកៅស៊ូនឹងត្រូវផ្តល់ជូនដោយផ្ទាល់ ដល់កសិករកៅស៊ូគ្រួសារ​ ​​ដោយមិនចំបាច់ដាក់ពាក្យស្នើសុំដោយផ្ទាល់ទេ បន្ទាប់ពីឈ្មួញកណ្តាលនិងអ្នកទិញកៅស៊ូតម្រូវឱ្យប្រើកម្មវិធី RRIMniaga ចាប់ពីថ្ងៃទី១ ខែមករា​ ឆ្នាំ២០២១​ដោយមានជំនួយឧបត្ថម្ភពីគម្រោង IPG ប្រាក់ចំណូលប្រចាំខែ​របស់​កសិករ​កៅស៊ូគ្រួសាររំពឹងថា​ នឹងកើនឡើង២៥% ចាប់ពី​២៣០​ដុល្លារ ដល់ ២៨៨ដុល្លារ។ ជំនួយ​ឧបត្ថម្ភនេះផ្អែកទៅ​ទំហំផ្ទៃដីមធ្យម២​ហិកតា/គ្រួសារ និងតម្លៃជ័រចាន​នៅមាត់ចម្ការគឺ០,៥០ដុល្លារ/គ.ក្រ ។

លោកបានបន្តថា កាលពីឆ្នាំ២០២០ កសិករ​​កៅស៊ូគ្រួសារសរុបចំនួន៣០,១៦% ដែលចូលរួមក្នុងគម្រោង Rubber Transaction Authorisation Permit :PAT-G នឹងទទួលបានជំនួយពី គម្រោងឧបត្ថម្ភលើកទឹកចិត្ត IPG នេះ។ ចំនួនកសិករដែល​បានដាក់ពាក្យស្នើសុំមានចំនួន ១៣៥ ៦៣២នាក់ ក្នុងចំណោម ៤៩៥ ២៩៦នាក់ ដែលមាន​ប័ណ្ណ PAT-G បានដាំដុះកៅស៊ូ លើផ្ទៃដីទំហំ២៩៤ ​ ០៩៥, ៧៩ហ.ត “រដ្ឋាភិបាលតែងតែជួយកសិករកៅស៊ូគ្រួសារជានិច្ច ជាពិសេសនៅពេលដែលតម្លៃកៅស៊ូ​ធា្លក់ចុះ”។

គម្រោង IPG និងការប្រើប្រាស់កម្មវិធី RRIMniaga ស្ថិតក្នុងចំណោមគំនិតផ្តួច​ផ្តើម​របស់​ក្រសួងនិងក្រុមប្រឹក្សាកៅស៊ូម៉ាឡេស៊ី ដើម្បីជួយទប់ស្កាត់ផលប៉ះពាល់ការធ្លាក់ចុះតម្លៃនិងធានា ដំណើរការផលិតកម្មមុខទំនិញផ្សេងៗ ព្រមទាំងធានាស្ថេរ​ភាព​ចំណូលរបស់កសិករកកៅស៊ូគ្រួសារ។

កម្មវិធី RRIMniaga ត្រូវបានបង្កើតឡើងដោយក្រុមប្រឹក្សាកៅស៊ូម៉ាឡេស៊ីកាលពីដើមឆ្នាំ​កន្លងទៅ ដើម្បីជួយសម្រួលដល់ប្រតិបត្តិការកៅស៊ូ​ដែលពាក់ព័ន្ធនឹងអ្នកទិញនិងឈ្មួញកណ្តាល។ ថវិកានៅក្នុងឆ្នាំ២០២១ ការត្រៀមបំរុងថវិកាមូល​និធិ IPG បានកើនឡើងទ្វេ​ដងរហូតដល់ ៣០០​លាន​រីងហ្គីតធៀបនឹងឆ្នាំកន្លងទៅ។

កសិករកៅស៊ូចំនួនជាង៤៥០ ០០០គ្រួសារ​នៅតែព្រួយបារម្ភពីស្ថានភាពសេដ្ឋកិច្ចដ៏លំបាកដែលកាន់តែអាក្រក់ទៅៗ ដោយសារតែការរាតត្បាតនៃជំងឺ Covid-19 តាំងពីឆ្នាំ២០២០កន្លង ទៅ៕